រាជធានីភ្នំពេញ ៖ ប្រជាពលរដ្ឋរស់តាមបណ្តោយផ្លូវសេះស ស្ថិតនៅភូមិទ្រា៤ និងភូមិដំណាក់ធំ៣ សង្កាត់មានជ័យ៣ ខណ្ឌមានជ័យ រាជធានីភ្នំពេញ បានទទូចស្នើសុំដល់លោក ឃួង ស្រេង អភិបាលរាជធានីភ្នំពេញ មេត្តាជួយពន្លឿនជួសជុលផ្លូវសេះស ដែលមានទទឹងប្រវែង ១២ម និងបណ្តោយ៣០០ម ជាង ដែលកំពុងរងការខូចខាត និងពិបាកធ្វើដំណើរនិងរៀបចំដាក់ប្រព័ន្ធលូរបង្ហូរទឹក ដែលរងការជន់លិចពេលដែលមានភ្លៀងធ្លាក់ប្រវែងជាង៣០០ម៉ែត ផ្លូវនេះគឺតភ្ជាប់ពីផ្លូវវេងស្រេង មកដល់ផ្លូវខាងក្រោយបុរីអ័កគីដេវិឡា ។
ប្រជាពលរដ្ឋបានលើកឡើងថា (នៅពេលចុះឃោសនាបោះឆ្នោត ថ្នាក់ជាតិ និងឃុំសង្កាត់ ប្រធានក្រុមការងារគណៈបក្យប្រជាជានតែងតែ បានសន្យាថា និងជួសជុលផ្លូវនិងប្រព័ន្ធលូររំដោះទឹកខាងលើជូនពួកគាត់ធ្វើដំណើរ រហូតមកដល់ពេលនេះបោះឆ្នោត ជិតពាក់កណ្តាលអាណត្តិមកនេះ គឺមិនទាន់បានធ្វើផ្លូវនេះតាមសន្យានៅឡើយទេ)។
ប្រជាពលរដ្ឋបានបន្តថា ឥលូវនេះផ្លូវក៏កាន់តែខូចខ្លាំង ពិបាកក្នុងការធ្វើដំណើរខ្លាំងណាស់ នៅពេលមេឃភ្លៀងម្តងធ្វើឲ្យលិចកំណាត់ផ្លូវនេះយ៉ាងខ្លាំងទៀតផង។ ប្រជាពលរដ្ឋតាមបណ្តោយផ្លូវនេះ គឺបានសូមសុំណូមពរប្រកបដោយភាពជឿរជាក់ទៅដល់លោក ឃួង ស្រេង អភិបាលរាជធានីភ្នំពេញ មេត្តាជួយពន្លឿន ជួសជុលផ្លូវទៅតាមការសន្យារបស់លោកអភិបាលខណ្ឌឲបានឆាប់រហ័សផង ។
រីឯលោក សាំ ពិសិដ្ឋ ប្រធានមន្ទីរសារធារណៈការ និងដឹកជញ្ជូន រាជធានីភ្នំពេញ ធ្លាប់បានប្រាប់អ្នកសារព័ត៌មានយើងថា៖ ផ្លូវនេះមានគំរោងនិងដាក់ដេញថ្លៃរួចរាល់អស់ហើយ នៅឡើយតែយក គ្រឿងចក្រមកដាក់ដើម្បីអនុវត្តតែប៉ុណ្ណោះ៕
ដោយ ៖ វិបុល
