ខេត្តក្រចេះ ៖ ប្រភពពី្របជាពលរដ្ឋ មន្ត្រីការពារបរិស្ថាន និង សមត្ថកិច្ចពាក់ព័ន្ធក្នុងស្រុកស្នួល ខេត្តក្រចេះ បានឲ្យដឹងថា ពួកគេមិនហ៊ានប៉ះពាល់មេឈ្មួញ គង់ ក្រឹង ដែលជាឧកញ៉ានិងជាមន្ត្រីយោធា មានអំណាចខ្លាំងក្នុងការប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងពេញបន្ទុកនោះទេ។
ប្រភពបានឲ្យដឹងទៀតថា មន្ត្រីធំៗនិងសមត្ថកិច្ចពាក់ព័ន្ធក្នុងខេត្តក្រចេះ សុទ្ធតែជាខ្នងបង្អែក របស់មេឈ្មួញ គង់ ក្រឹង ក្នុងការដឹកជញ្ជូនឈើចេញទៅស្រុកយួនក្នុងខណៈដែលព្រៃឈើនៅខេត្តស្ទឹងត្រែង ខេត្តក្រចេះ និងខេត្តមណ្ឌលគិរី កំពុងប្រឈមនឹងសេចក្ដីវិនាសសាបសូន្យនាពេលឆាប់ៗខាងមុខនេះ។
ជាក់ស្ដែងសូម្បីតែលោក វេង សាខុន រដ្ឋមន្ត្រីក្រសួងកសិកម្ម និងលោក កែវ អូម៉ាលីស្ស ប្រធានរដ្ឋបាលព្រៃឈើ នៃក្រសួងកសិកម្ម ក៏រក្សាភាពស្ងៀមស្ងាត់ផងដែរ ក្នុងខណៈដែលមេឈ្មួញ គង់ ក្រឹង បង្កើនសកម្មភាពដឹកជញ្ជូនឈើចេញទៅស្រុកយួនយ៉ាងពេញបន្ទុកដោយគ្មានញញើតអ្វីទាំងអស់។
ប្រភពពីមន្ត្រីយោធាក្នុងខេត្តក្រចេះ បានបង្ហើបឲ្យដឹងថា លោក ណៃ តឹងឡឹង មេបញ្ជាការយោធាតំបន់ប្រតិបត្តិការសឹករងខេត្ត ក្រចេះ និងលោក ជឿន សុវណ្ណថា មេបញ្ជាការយោធាភូមិភាគ១ គឺជាខ្នងបង្អែកយ៉ាងរឹងមាំរបស់មេឈ្មួញ គង់ ក្រឹង ក្នុងការដឹក ជញ្ជូនឈើចេញទៅស្រុកយួនយ៉ាងគគ្រឹកគគ្រេង។
រីឯលោក វ៉ា ថន អភិបាលខេត្តក្រចេះ លោក លន់ សុផាត ស្នង ការនគរបាលខេត្តក្រចេះ និងលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ រក្សាភាពស្ងៀមស្ងាត់ទុកឲ្យមេឈ្មួញ គង់ ក្រឹង ប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងសុខស្រួល។ បច្ចុប្បន្ននេះមានឈ្មួញតូចធំជាច្រើននាក់ដឹក ជញ្ជូនឈើទៅលក់ឲ្យមេឈ្មួញ គង់ ក្រឹង ដល់តំបន់ព្រំដែនក្នុងស្រុកស្នួល ខេត្តក្រចេះ តែម្តងព្រោះឈ្មួញទាំងធំទាំងតូចដែលដឹកជញ្ជូនឈើទៅលក់ឲ្យមេឈ្មួញ គង់ ក្រឹង គឺគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានបង្ក្រាបឡើយ។
ថ្មីៗនេះប្រភពព័ត៌មានពីនាយទាហាននិងពលទាហានក្នុងអង្គភាពវរការពារព្រំដែនលេខ២០៤ បានឲ្យដឹងថា លោក គង់ ក្រឹង ដែលមានតួនាទីជាមេបញ្ជាការរងវរការពារព្រំដែនលេខ២០៤ និងមានងារជាឧកញ៉ាផងនោះ កំពុងបង្កើនសកម្មភាពប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងរលូន។ ប្រភពបានឲ្យដឹងទៀតថា ការដែលមេឈ្មួញ គង់ ក្រឹង អាចបន្តសកម្មភាពប្រព្រឹត្តបទល្មើសព្រៃឈើដោយគ្មានមន្ត្រីជំនាញឬសមត្ថកិច្ចណាហ៊ានប៉ះពាល់ គឺដោយសារមេឈ្មួញ គង់ ក្រឹង មានខ្នងបង្អែករឹងមាំនៅក្នុងក្រសួងការពារជាតិនិងនៅក្នុងក្រសួងមហាផ្ទៃ។
សូម្បីតែមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលដឹកនាំដោយលោក សៅ សុខា ពេលចុះទៅបំពេញបេសក កម្មក្នុងខេត្តក្រចេះ ក៏មិនហ៊ានប៉ះពាល់មេឈ្មួញ គង់ ក្រឹង នោះឡើយព្រោះដឹងថាឈ្មួញម្នាក់នេះមានឥទ្ធិពលខ្លាំងណាស់ ។ មិនតែប៉ុណ្ណោះមេឈ្មួញ គង់ ក្រឹង តែងតែអួតអាងប្រាប់គេឯងថា ក្រៅពីលោកនាយករដ្ឋមន្ត្រី ហ៊ុន សែន ដែលជាប្រមុខរាជរដ្ឋា ភិបាល គឺគ្មាននរណាហ៊ានប៉ះពាល់ខ្លួននោះទេព្រោះខ្លួនមានខ្នងបង្អែករឹងមាំចាំការពារពីក្រោយខ្នង៕
ដោយ ៖ សុភា
