ខេត្តរតនគិរី ៖ នៅសៀលថ្ងៃទី១៦ ខែមិថុនា ឆ្នាំ២០១៩ ដោយមានបទបញ្ជាពីលោក ថង សាវុន អភិបាលខេត្តរតនគិរី និងជាប្រធានគណៈបញ្ជាការឯកភាពខេត្ត និងលោកឧត្តមសេនីយ៍ត្រី ថាវ យ៉េន មេបញ្ជាការអាវុធហត្ថខេត្តរតនគិរី លោកអនុសេនីយ៍ឯក សោម សុផល នាយការិយាល័យផែនការសន្តិសុខ នៃទីបញ្ជាការអាវុធ ហត្ថខេត្តរតគិរី បានសហការជាមួយកម្លាំងអាវុធហត្ថមូលដ្ឋានស្រុកអណ្តូងមាស, កម្លាំងនគរបាលស្រុកអណ្តូងមាស និងកម្លាំងនគរបាលការពារព្រំដែនលេខ២០៣ បានចុះរឹបអូសឈើលេខ១ ជាច្រើនកំណាត់ ដែលឈ្មួញលាក់ទុកក្នុងចំការស្វាយចន្ទីមួយកន្លែង ស្ថិតក្នុងភូមិចាយ ឃុំញ៉ាង ស្រុកអណ្តូងមាស ខេត្តរតនគិរី។
តាមលោកអនុសេនីយ៍ឯក សោម សុផល បានប្រាប់សារព័ត៌មានក្នុងស្រុកអោយដឹងនៅព្រឹកថ្ងៃទី១៧ ខែមិថុនា ឆ្នាំ២០១៩នេះថា ក្រុមការងារបានបើកប្រតិបត្តិការតាំងពីរសៀលថ្ងៃទី១៦ ខែមិថុនា ឆ្នាំ២០១៩ ម្សិលមិញ រហូតមកដល់ព្រឹកនេះ បានរុករកប្រទះឃើញទីតាំងស្តុកឈើចំនួន៣កន្លែង ដែលឈ្មួញដឹកមកគរលាក់ទុកក្នុងចំការចន្ទី នាទីតាំងខាងលើ។
លោកអនុសេនីយ៍ឯក សោម សុផល បានបន្តថា ក្រុមការងារក៏បានទទួលបទបញ្ជាពីថ្នាក់លើ ឲ្យប្រមូលឈើលេខ១ទាំងនោះ មករក្សាទុកនៅស្នាក់ការអាវុធហត្ថលេខ ៧៨៧ ប៉ុន្តែដោយមានភ្លៀធ្លាក់ខ្លាំង ស្ថានភាពផ្លូវមានការលំបាក ខ្វះមធ្យោបាយដឹកជញ្ជូន រហូតមកដល់ពេលនេះក្រុមការងារទើបតែដឹកបានប្រមាណ ៣០កំណាត់ប៉ុណ្ណោះ នៅប៉ុន្មានទៀតនឹងបន្កដឹកយកមក រក្សាទុកជាបន្តបន្ទាប់ទៀតផងដែរ៕
ដោយ ៖ សុភា
