ខេត្តក្រចេះ ៖ តាមប្រភពពីមន្ត្រីអង្គការក្រៅរដ្ឋាភិបាលនិងសកម្មកម្មជនព្រៃឈើក្នុងខេត្តក្រចេះ បានឲ្យដឹងថា ចាប់តាំងពីលោក វ៉ា ថន ទទួលបានតំណែងជាអភិបាលខេត្តក្រចេះ ជំនួសលោក សរ ចំរ៉ុង រួចមកគឺបទល្មើសព្រៃឈើក្នុងខេត្តក្រចេះ នៅតែកើតឡើងយ៉ាងពេញបន្ទុកដដែល។
ប្រភពដដែលបានអោយដឹងថាលោក វ៉ា ថន ប្រឹងស្រង់ដើមហើយមើទៅ ដោយជាក់ស្ដែងមេឈ្មួញ គង់ ក្រឹង និងឈ្មួញជាច្រើននាក់ទៀតនៅតែបន្តសកម្មភាពដឹកជញ្ជូនឈើចេញទៅស្រុកយួនតាមច្រកព្រំដែននិងច្រករបៀងក្នុងឃុំ២ធ្នូ ក៏ដូចជាឃុំក្រញូងសែនជ័យ ស្រុកស្នួល ខេត្តក្រចេះ ទាំងថ្ងៃទាំងយប់។
រីឯឈ្មួញមួយចំនួនទៀតកំពុងបន្តសកម្មភាពដឹកជញ្ជូនឈើពីខេត្តក្រចេះ ឆ្លងកាត់ ខេត្តត្បូងឃ្មុំ ចេញទៅស្រុកយួនតាមច្រកព្រំដែនក្នុងស្រុកមេមត់ និងស្រុកពញាក្រែក តាមអំពើចិត្តដោយសារមានការឃុបឃិតជាប្រព័ន្ធ។
ថ្មីៗនេះមន្ត្រីអាជ្ញាធរនិងសមត្ថកិច្ចមូលដ្ឋានក្នុងឃុំ២ធ្នូ ស្រុកស្នួល ខេត្តក្រចេះ បានឲ្យដឹងថា ច្រករបៀងជាច្រើនកន្លែងនៅភូមិវ៉េវ និងភូមិត្រពាំងស្រែ ឃុំ២ធ្នូ គឺជាគោលដៅរបស់មេឈ្មួញ គង់ ក្រឹង ដែលជាឧកញ៉ានិងជាមន្រ្តីយោធា ប្រើប្រាស់ដើម្បីដឹកជញ្ជូនឈើចេញទៅស្រុកយួនយ៉ាងពេញបន្ទុក។
ប្រភពបានឲ្យដឹងទៀតថា មន្ត្រីរដ្ឋបាលព្រៃឈើ ក៏ដូចជានគរបាលប្រឆាំងបទល្មើសសេដ្ឋកិច្ច ក្រុមគយចល័ត ក៏ដូចជាមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើ មិនហ៊ានប៉ះពាល់មេឈ្មួញ គង់ ក្រឹង នោះទេព្រោះដឹងថាឈ្មួញម្នាក់នេះមានខ្នងបង្អែករឹងមាំ។ ទន្ទឹមនឹងនេះមេឈ្មួញ គង់ ក្រឹង ក៏បានបង្ហាញរូបភាពអំពីទំនាក់ទំនងជិតស្និទ្ធជាមួយមន្ត្រីជាន់ខ្ពស់ក្នុងស្ថាប័នរដ្ឋសភា ក៏ដូចជាមន្ត្រីធំៗក្នុងជួររាជរដ្ឋាភិបាលផងដែរ ដើម្បីឲ្យមុខរបររបស់ខ្លួនក្នុងការដឹកជញ្ជូនឈើចេញទៅស្រុកយួនអាចប្រព្រឹត្តទៅដោយរលូនគ្មានឧបសគ្គអ្វីទាំងអស់។
ប្រភពពីនាយទាហាននិងពលទាហានក្នុងអង្គភាពវរការពារព្រំដែនលេខ២០៤ បានឲ្យដឹងថា រហូតមកដល់ពេលនេះមេឈ្មួញ គង់ ក្រឹង ដែលជាមន្ត្រីយោធា ហើយមានងារជាឧកញ៉ាផងនោះនៅតែបន្តសកម្មភាពប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងពេញបន្ទុក។
ប្រភពបានឲ្យដឹងទៀតថា ឈ្មួញតូចធំមួយចំនួនបានដឹកជញ្ជូនឈើពីខេត្តស្ទឹងត្រែង ពីខេត្តក្រចេះ និងពីខេត្តមណ្ឌលគិរី យកមកលក់ឲ្យមេឈ្មួញ គង់ ក្រឹង ដល់ទីតាំងស្តុកឈើត្រង់ចំណុចក្រោលគោខាងក្រោយបន្ទាយយោធាវរៈការពារព្រំដែនលេខ២០៤ យ៉ាងពេញបន្ទុកតែម្តង។ មន្ត្រីយោធាក្នុងខេត្តក្រចេះ បានបង្ហើបឲ្យដឹងថាមេឈ្មួញ គង់ ក្រឹង មានខ្នងបង្អែកយ៉ាងរឹងមាំនៅក្នុងក្រសួងការពារជាតិ ក៏ដូចជានៅក្នុងក្រសួងមហាផ្ទៃ និងក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច ទើបអាចធ្វើអ្វីៗបានតាមអំពើចិត្ត ក្នុងខណៈដែលព្រៃឈើនៅខេត្តស្ទឹងត្រែង ខេត្តក្រចេះ និងខេត្តមណ្ឌលគិរី ត្រូវប្រឈមនឹងសេចក្ដីវិនាស។
ប្រភពពីមន្ត្រីអង្គការក្រៅរដ្ឋាភិបាលក្នុងខេត្តក្រចេះ បានឲ្យដឹងថា មួយរយៈចុងក្រោយនេះមេឈ្មួញ គង់ ក្រឹង សម្រុកដឹកជញ្ជូនឈើចេញទៅស្រុកយួនតាមច្រករបៀងដេ២ និងច្រករបៀងដេ៣ ភូមិត្រពាំងស្រែ ឃុំ២ធ្នូ ស្រុកស្នួល ខេត្តក្រចេះ យ៉ាងពេញបន្ទុកហើយមិនដែលមានមន្ត្រីជំនាញឬសមត្ថកិច្ចពាក់ព័ន្ធណាហ៊ានប៉ះពាល់នោះទេ។
ដោយឡែកលោក ទ្រី សុភ័ក្ត្រ ប្រធានមន្ទីរកសិកម្មខេត្តក្រចេះ និងមេរដ្ឋបាលព្រៃឈើខេត្តក្រចេះ ក៏ដូចជាលោក វ៉ា ថន អភិបាលខេត្តក្រចេះ បានរក្សាភាពស្ងៀមស្ងាត់ក្នុងខណៈដែលមេឈ្មួញ គង់ ក្រឹង បន្តសកម្មភាពប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងរាលដាលដោយគ្មានញញើតអ្វីទាំងអស់។
មតិសារធារណជនបានសំណូមពរដល់ឯកឧត្តម សៅ សុខា និង ឯកឧត្តម វេង សាខុន រដ្ឋមន្ត្រីក្រសួងកសិកម្ម សូមមេត្តាកុំនៅ ស្ងៀមស្ងាត់ត្រូវមើលមន្ត្រីក្រោមឪវ៉ាត់ដែលកំពុងជាប់ចង្កេះ ក្នុងខណៈដែលមេឈ្មួញ គង់ ក្រឹង បង្ហាញឥទ្ធិពលយ៉ាងខ្លាំងក្លាក្នុងការធ្វើសកម្មភាពដឹកជញ្ជូនឈើចេញទៅស្រុកយួនទាំងថ្ងៃទាំងយប់៕
ដោយ ៖ សុភា
