រាជធានីភ្នំពេញ ៖ លោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ នៅថ្ងៃទី១១ ខែមិថុនា ឆ្នាំ២០១៩នេះ បានចេញលិខិតបង្គាប់ការផ្អាក់ការងារបណ្ដោះអាសន្ន ចំពោះលោកអនុសេនីយ៍ឯក សឹម ប៊ុនធឿន តួនាទីនាយរងផ្នែកការពារ និងអន្ដរាគមន៍ ចំណុះអធិការដ្ឋាននគរបាលខណ្ឌមានជ័យ ដោយមូលហេតុផាក់ពិន័យមិនត្រឹមត្រូវ មិនចេញបង្កាន់ដៃតាមការកំណត់។
នៅក្នុងលិខិតរបស់លោកឧត្តមសេនីយ៍ ក៏បានបញ្ជាក់ផងដែរថា មន្ដ្រីនគរបាលរូបនេះ ត្រូវមកបង្ហាញមុខនៅការិយាល័យបុគ្គលិក រៀងរាល់ម៉ោងធ្វើការ ដើម្បីកែប្រែកំហុសឆ្គង និងរង់ចាំការសម្រេចជាថ្មី។
ជាមួយគ្នានេះ ក្នុងនាមគណៈស្នងការ លោកឧត្តមសេនីយ៍ទោ ភួង ម៉ាល័យ ក៏សូមអំពាវនាវ និងជំរុញឲ្យមន្ដ្រីនគរបាលអនុវត្តច្បាប់ទាំងអស់ ត្រូវអនុវត្តតួនាទី និងភារកិច្ចរបស់ខ្លួនឲ្យមានប្រសិទ្ធភាព តាមច្បាប់ទម្លាប់ត្រឹមត្រូវ ហើយការផាកពិន័យយានយន្ដ ឬទោចក្រយានយន្ដ ត្រូវមានបង្កាន់ដៃឲ្យទៅប្រជាពលរដ្ឋវិញ។
ដោយឡែកប្រជាពលរដ្ឋដែលធ្វើដំណើរតាមដងផ្លូវ ត្រូវរួមគ្នា និងបំពេញកាតព្វកិច្ចគោរពច្បាប់ចរាចរណ៍ ឲ្យបានគ្រប់ៗគ្នា ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍នៅលើដងផ្លូវ៕
ដោយ ៖ វិបុល
