ខេត្តត្បូងឃ្មុំ ៖ នារយៈពេលប៉ុន្មានថ្ងៃកន្លងទៅនេះតាមច្រករបៀងក្នុងស្រុកពញាក្រែក និងស្រុកមេមត់ ខេត្តត្បូងឃ្មុំ មានឈ្មួញសម្រុកនាំជ្រូកចូលពីស្រុកយួនយ៉ាងពេញបន្ទុក បើទោះបីថ្នាក់ដឹក នាំក្រសួងកសិកម្ម ចេញបទបញ្ជាឲ្យមន្ត្រីជំនាញ និងសមត្ថកិច្ចពាក់ព័ន្ធតាមបណ្ដាខេត្តនានា ចាត់វិធានការទប់ស្កាត់សកម្មភាពនាំចូលជ្រូកពីប្រទេសជិតខាងយ៉ាងណាក៏ដោយ។
ប្រភពពីមន្ត្រីនៅក្នុងមន្ទីរកសិកម្មខេត្តត្បូងឃ្មុំ បានបង្ហើបឲ្យដឹងថា ប្រសិនបើគ្មានការឃុបឃិតបើកដៃពីសំណាក់លោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំ និងលោក រី ដាវិន ប្រធានការិយាល័យ ផលិតកម្ម និងបសុព្យាបាលខេត្តត្បូងឃ្មុំ ទេនោះគឺគ្មានឈ្មួញណាអាចនាំចូលជ្រូកពីស្រុកយួនតាមច្រករបៀងក្នុងខេត្តត្បូងឃ្មុំ ចូលមកដល់ខេត្តកំពង់ចាម និងចូលមកដល់រាជធានីភ្នំពេញ បានឡើយ។
ទោះបីលោក ហេង ពិសិដ្ឋ ខំប្រឹងបិទបាំងទង្វើមិនប្រក្រតីរបស់ខ្លួនយ៉ាងណា ក៏មិនអាចទៅរួចដែរព្រោះនៅពេលសមត្ថកិច្ចខេត្តកំពង់ចាម បង្ក្រាបរថយន្តដឹកជ្រូក គឺឈ្មួញបានបញ្ជាក់ថា ពួកគេនាំចូលជ្រូកតាមច្រកត្នោត ស្រុកពញាក្រែក ខេត្តត្បូងឃ្មុំ។
ថ្មីៗកន្លងទៅនេះមន្ត្រីជំនាញនិងសមត្ថកិច្ចពាក់ព័ន្ធក្នុងខេត្តកំពង់ចាម បានធ្វើការបង្ក្រាបក្រុមឈ្មួញដឹកជញ្ជូនជ្រូកពីស្រុកយួនចូលមកខេត្តកំពង់ចាម ចំនួន៧លើករួចមកហើយ ដោយឈ្មួញខ្លះបញ្ជាក់ថា ពួកគេនាំចូលតាមច្រករបៀងក្នុងខេត្តត្បូងឃ្មុំ។ ប៉ុន្តែអ្វីដែលគួរឲ្យហួសចិត្តនោះ គឺលោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំ តែងតែឆ្លើយយករួចខ្លួនថា គ្មានជ្រូកនាំចូលពីស្រុកយួនតាមច្រករបៀងក្នុងខេត្តត្បូងឃ្មុំ នោះទេ ចម្លើយដោះសារបស់លោក ហេង ពិសិដ្ឋ ប្រធានមន្ទីរ កសិកម្មខេត្តត្បូងឃ្មុំ គឺជាការព្យាយាមបិទបាំងការពិតដោយគ្មានសេចក្ដីអៀនខ្មាសបន្តិចណាឡើយ ក្នុងខណៈដែលឈ្មួញបានបញ្ជាក់ថា ពួកគេនាំចូលជ្រូកតាមច្រកត្នោត ឃុំកក់ ស្រុកពញាក្រែក ខេត្តត្បូងឃ្មុំ យកទៅចែកចាយនៅក្រុងកំពង់ចាម។
បើតាមប្រភពពីមន្ត្រីរាជការនៅក្នុងមន្ទីរកសិកម្មខេត្តត្បូងឃ្មុំ មួយចំនួនបានឲ្យដឹងថា លោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំ និងលោក រី ដាវិន មេពេទ្យសត្វខេត្តត្បូងឃ្មុំ គិតតែពីរឿងផលប្រយោជន៍ផ្ទាល់ខ្លួនប៉ុណ្ណោះ ហើយបច្ចុប្បន្នពួកគេនៅតែឃុបឃិតឲ្យឈ្មួញនាំចូលជ្រូកមាន់ទា ពីស្រុកយួនយ៉ាងពេញបន្ទុកដដែល។ សកម្មភាពរបស់លោក ហេង ពិសិដ្ឋ និងលោក រី ដាវិន ជាភស្ដុតាងបង្ហាញថា មន្ត្រី២រូបនេះបំពានលើបទបញ្ជារបស់លោក វេង សាខុន រដ្ឋមន្ត្រីក្រសួងកសិកម្មយ៉ាងគឃ្លើនបំផុត ហើយព្យាយាមបិទបាំងទង្វើរបស់ខ្លួនដោយគ្មានសេចក្ដីអៀនខ្មាសបន្តិចណាឡើយ។ ជាការពិតក្នុងខណៈដែលលោក ហេង ពិសិដ្ឋ អះអាងថាគ្មានជ្រូកនាំចូលតាមច្រករបៀងនិងច្រកព្រំដែនក្នុងខេត្តត្បូងឃ្មុំ នោះគឺឈ្មួញបានបញ្ជាក់ថា ពួកគេនាំចូលជ្រូកតាមច្រកត្នោត ឃុំកក់ ស្រុកពញាក្រែក ហេតុនេះលោក ហេង ពិសិដ្ឋ មិនអាចបិទបាំងការពិតតទៅទៀតបានឡើយ៕
ដោយ ៖ វិបុល
