ខេត្តកំពង់ចាម ៖ នាព្រឹកថ្ងៃអាទិត្យ ៧កើត ខែជេស្ឋ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី០៩ ខែមិថុនា ឆ្នាំ២០១៩ នៅទូទាំង ១៥ ឃុំក្នុងស្រុកកំពង់សៀម ខេត្តកំពង់ចាម និង០៧ ឃុំក្នុងស្រុកតំបែរ ខេត្តត្បូងឃ្មុំ បានរៀបចំទិវាពិសារនំបញ្ចុកសាមគ្គីជាមួយសមាជិកក្រុមការងារថ្នាក់កណ្តាល ថ្នាក់ខេត្ត ស្រុកចុះជួយឃុំ ក្រុមប្រឹក្សាឃុំ មន្ត្រីរាជការ អាជ្ញាធរមូលដ្ឋានគ្រប់ជាន់ថ្នាក់ លោកគ្រូ អ្នកគ្រូ ប្រជាការពារ និងប្រជាពលរដ្ឋយ៉ាងអធិកអធមក្រៃលែង។
ដោយឡែក នៅព្រឹកថ្ងៃនេះ ឯកឧត្តម វេង សាខុន សមាជិកគណកម្មាធិការកណ្តាល និងជាប្រធានក្រុមការងារចុះជួយស្រុកកំពង់សៀម និងស្រុកតំបែរ និងលោកជំទាវ ម៉ក់ ស៊ីថា អមដំណើរដោយសហការីបានអញ្ជើញចូលរួមពិសារនំបញ្ចុកសាមគ្គីជាមួយបងប្អូនប្រជាពលរដ្ឋនៅឃុំវិហារធំ និងឃុំកោះរកា។
ក្នុងឱកាសជួបជុំពិសារនំបញ្ចុកសាមគ្គីនេះ ក្នុងនាមប្រធានក្រុមការងារ និងអាជ្ញាធរមូលដ្ឋាន ឯកឧត្ដមបានពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីសម្តេចតេជោហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តី និងសម្តេចកិត្តិព្រឹទ្ធបណ្ឌិតមកជូនបងប្អូនប្រជាពលរដ្ឋទូទាំងស្រុកកំពង់សៀម និងជូនពរឲ្យបងប្អូនទាំងអស់ជួបតែពុទ្ធិពរទាំង ៤ ប្រការ។
ឆ្លៀតយកឱកាសនេះផងដែរ លោកក៏បានធ្វើការសំណេះ សំណាល សាកសួរសុខទុក្ខអំពីជីវភាព សុខភាព ការងារបង្ក បង្កើនផល សន្តិសុខ និងសុវត្ថិភាពភូមិឃុំ និងបានដោះស្រាយនូវសំណូមពរ និងសំណើមួយចំនួនពីប្រជាពលរដ្ឋទាក់ទងនឹងការកសាង អភិវឌ្ឍន និងការពង្រឹងសន្តិសុខ និងសុវត្ថិភាពមូលដ្ឋានឲ្យកាន់តែល្អប្រសើរថែមទៀត។ ដោយឡែកទិវាពិសារនំបញ្ចុកសាមគ្គីនាថ្ងៃនេះ លោកបានសង្ខេបជូនបងប្អូនប្រជាពលរដ្ឋជ្រាបនូវអត្ថន័យជារួមថា កម្មវិធីមានបំណងសំខាន់គឺ÷ ទី១. យកឱកាសនេះអញ្ជើញបងប្អូនឲ្យមកជួបជុំដើម្បីធ្វើការសន្ទនាគ្នាអំពីសេចក្តីសុខចម្រើន និងបញ្ហាជីវភាពគ្រួសារប្រចាំថ្ងៃ។ ទី២. បង្កើត និងពង្រឹងសាមគ្គីភាព ឯកភាពជាតិក្នុងរង្វង់មហាគ្រួសារខ្មែរ ជាពិសេសបងប្អូនប្រជាពលរដ្ឋនៅមូលដ្ឋានផ្ទាល់។ ទី៣. បង្កើន ឬឲ្យតម្លៃទៅលើផលិតផលបន្លែបង្ការក្នុងស្រុក និងទី៤. រួមគ្នាថែរក្សា និងអភិរក្សនំបញ្ចុកដែលជានំរបស់ខ្មែរ ហើយដែលជានំខ្មែរយើងនិយមបរិភោគស្ទើរតែគ្រប់កម្មវិធីបុណ្យទានផ្សេងៗ។
ចំពោះកម្មវិធីនាថ្ងៃនេះ លោកបានថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងយកអស់ស្មារតីទទួលខុសត្រូវរៀបចំពិធីនេះឡើងបានយ៉ាងល្អប្រសើរ និងទទួលជោគជ័យ។ សកម្មភាពនេះ ស្តែងចេញឲ្យឃើញពីការរួបរួមសាមគ្គី និងឯកភាពគ្នាជាធ្លុងមួយរវាងអ្នកពាក់ព័ន្ធគ្រប់ជាន់ថ្នាក់ ជាពិសេសបងប្អូននៅមូលដ្ឋានផ្ទាល់។ ស្ថិតក្នុងបរិយាកាសសប្បាយរីករាយក្នុងការទទួលទាននំបញ្ចុក លោកបានក្រើនរំលឹកជូនមន្រ្តីមូលដ្ឋានឲ្យយកចិត្តទុកដាក់អនុវត្តអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន និងត្រូវរួមគ្នាថែរក្សាឲ្យបាននូវសុខសន្តិភាព ស្ថិរភាព និងសុវត្ថិភាពភូមិឃុំឲ្យកាន់តែល្អប្រសើរថែមទៀត៕
ដោយ ៖ កូឡាប
