រាជធានីភ្នំពេញ ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង និងជាបញ្ជាការកងទ័ពជើងគោក បានអញ្ជើញជាអធីបតីភាពក្នុងពិធីបើកសិក្ខាសាលាស្តីពី «ការប្រកាសឱ្យប្រើប្រាស់ និងផ្សព្វផ្សាយសៀវភៅក្បាច់គុន នៃកងយោធពលខេមរភូមិន្ទ»។
កម្មវិធីនេះ ប្រព្រឹត្តនៅព្រឹកថ្ងៃទី៦ ខែមិថុនា ឆ្នាំ២០១៩នេះ នៅបញ្ជាការដ្ឋានកងពលតូចថ្មើរជើងលេខ៧០ ដោយមានការអញ្ជើញចូលរួមពីថ្នាក់ដឹកនាំកងយោធពលខេមរភូមិន្ទ មេបញ្ជាការ មេបញ្ជាការរង តាមបណ្តាអង្គភាពយោធភូមិភាគ បណ្តាស្ថាប័នអង្គភាពចំណុះអគ្គបញ្ជាការ នៃកងយោធពលខេមរភូមិន្ទ ព្រមទាំងតំណាងក្រសួងពាក់ព័ន្ធយ៉ាងច្រើនផងដែរ។
ក្រោយពីសៀវភៅក្បាច់គុន កងយោធពលខេមរភូមិន្ទ បានដាក់ឲ្យប្រើប្រាស់ ក្នុងជួរកងទ័ពឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការ រង និងជាមេបញ្ជាការកងទ័ពជើងគោក សង្ឃឹមថា មេបញ្ជាការគ្រប់អង្គភាពទាំងអស់ នៃកងយោធពលខេមរភូមិន្ទ នឹងខិតខំដាក់បញ្ចូលក្បាច់ គុននេះ ទៅក្នុងការហ្វឹកហ្វឺននិងផ្សព្វផ្សាយ ឲ្យបានកាន់តែទូលំទូលាយបន្ថែមទៀត។
ក្នុងសិក្ខាសាលាស្តីពី “ការប្រកាសឱ្យប្រើប្រាស់ និងផ្សព្វផ្សាយសៀវភៅក្បាច់គុន នៃកងយោធពលខេមរភូមិន្ទ” នៅព្រឹកថ្ងៃទី៦ ខែមិថុនា ឆ្នាំ២០១៩នេះ នាបញ្ជាការដ្ឋាន កងពលតូចថ្មើរជើងលេខ៧០ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ព ជើងគោក បានថ្លែងបញ្ជាក់ថា “ឯកឧត្តមមេបញ្ជាការគ្រប់អង្គភាពទាំងអស់ នៃកងយោធពលខេមរភូមិន្ទ ក៏ដូចជាកងនគរបាលជាតិសង្ឃឹមថា ក្រោយពីបានផែនការនេះ ហើយនឹងខិតខំ ដាក់បញ្ចូលទៅក្នុងការហ្វឹកហ្វឺន របស់យើង ។ ព្រោះខ្ញុំទៅស្រុកគេទៅចិន គេហាត់កុងហ្វួ ទៅដល់កូរ៉េ(ហាត់) តៃក្វាន់ដូអីចឹងទៅ ទាហានទាំងអស់ត្រូវតែហាត់តៃក្វាន់ដូ ទៅដល់ជប៉ុនគេហាត់ការ៉ាត់តេដូ អីចឹងទៅ ។ អាហ្នឹងជាយុទ្ធវិធីព្រោះពេលប្រយុទ្ធ មិនចាំបាច់ប្រើគ្រាប់ប្រើអីទេ ពេលខ្លះចូលកៀក ឬមួយការការពារខ្លួនដោយគ្មានអាវុធ” ។
ជាងនេះទៅទៀតមេបញ្ជាការ កងទ័ពជើងគោក អះអាងថា សៀវភៅក្បាច់គុនកងយោធពលខេមរភូមិន្ទ បានដាក់ឲ្យប្រើប្រាស់ក្នុងជួរកងទ័ព គឺជាចលករមួយដ៏សំខាន់ និងជាចំណុចចាប់ផ្ដើម ដើម្បីផ្សព្វផ្សាយក្បាច់គុនខ្មែរឲ្យបរទេស បានស្គាល់ខ្មែរកាន់តែច្បាស់បន្ថែមទៀត។
ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងថ្លែងថា “ខ្ញុំគិតថា នៅពេលយើងដាក់អានេះ (សៀវភៅក្បាច់គុន កងយោធពល ខេម រភូមិន្ទ) ចូលក្នុងទ័ពដែលទ័ពខ្មែរ រាប់ម៉ឺននាក់ ចាប់ផ្ដើមប្រើប្រាស់វា ជាចលករមួយជាចំណុចចាប់ផ្ដើមមួយយ៉ាងខ្លាំង នៅក្នុងការផ្សព្វផ្សាយ ។ ទៅថ្ងៃក្រោយយើងសង្ឃឹមថា ខាងនគរបាលជាតិរបស់យើង នឹងអាចអនុវត្តបន្តទៀត ។ តាមរយៈនៃការចូលរួមការបំផុសនេះឡើងវិញ ការហ្វឹកហ្វឺនច្រើនទៅហាត់ក្បាច់គុនខ្មែរ។
ខ្ញុំសង្ឃឹមថាការដាក់ក្បាច់គុនចូលក្នុងកងយោធពលខេមរភូមិន្ទគឺជាចលករធំណាស់ គ្រាន់តែយើងដាក់ភ្លាមអ្នកដែលត្រូវប្រើប្រាស់ ហ្វឹកហ្វឺន ស្គាល់រាប់ម៉ឺននាក់នេះគឺជាកិច្ចការសំខាន់ហើយយើងនឹងបន្តទៅថ្ងៃក្រោយទៀត”៕
ដោយ ៖ វិបុល
