លោក​ សេង​ បញ្ញា​ឬទ្ធិ​ ប្រធាន​មន្ទីរ​សុខា​ភិបាល​ខេត្ត​ព្រៃ​វែង ​ត្រូវ​បាន​មន្ត្រី​ថ្នាក់​ក្រោម​ទ្រាំ​លេង​បាន​នឹង​​ការ​​ដឹក​នាំ​បែប​អមនុស្ស ​និង​ប្រកាន់​បក្ស​ពួក​និយម​នៅ​ក្នុង​អង្គ​ភាព

ខេត្តព្រៃវែង ៖ ក្រៅពីចូលចិត្តជេរប្រមាថ កូនចៅក្រោមឱវាទ លោកវិជ្ជបណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង ក៏បានខិតខំរៀបចំការងារល្អៗដល់មន្ត្រីថ្នាក់ក្រោមផងដែររួមមាន៖

-ទី១ លោកស្រី ទន្តបណ្ឌិត ហ៊ន់ សុធារី ជាភរិយារបស់ លោក ទទួលបានតួនាទីជា ប្រធានការិយាប្រតិបត្តិស្រុកព្រៃវែង
-ទី២ លោកវេជ្ជបណ្ឌិត ហ៊ន់ រិទ្ធិ ជាប្អូនថ្លៃរបស់លោក ទទួលបានតួនាទីជាអនុប្រធានមន្ទីរសុខាភិបាលខេត្តព្រៃវែង
-ទី៣ លោកស្រី ទន់ មករា ជាប្អូនថ្លៃជីដូនមួយរបស់លោក ទទួលបានតួនាទីជា ប្រធានគណនេយ្យ មន្ទីរសុខាភិបាលខេត្តព្រៃវែង-ទី៤ លោកគ្រូពេទ្យ សេង លីអាន ជាបងប្រុសបង្កើតរបស់លោក ទទួលបានតួនាទីជា ប្រធានការិយាល័យប្រតិបត្តិស្រុកពាមជរ និងមានសាច់ញាតិរបស់លោក ជាច្រើននាក់ទៀត ក៏កំពុងទទួលបានតួនាទីសំខាន់ៗ នៅក្នុងមន្ទីរសុខាភិបាលខេត្តព្រៃវែង និងតាមមន្ទីរពេទ្យនានាក្នុងខេត្ត និងតាមមណ្ឌលសុខភាពផងដែរ។

សូមរំលឹកថា ៖ លោកគ្រូពេទ្យ ហ៊ូ ដា ប្រធានការិយាល័យប្រតិបត្តិ (OD) ស្រុកស្វាយអន្ទរ បានធ្វើសន្និសីទកាសែត ទម្លាយរឿងរ៉ាវដ៏ឈឺចុកចាប់ប្រាប់ក្រុមអ្នកសារព័ត៌មានថា៖ លោកវិជ្ជៈ បណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង បានជេរប្រមាថលោកនៅក្នុងអង្គប្រជុំ ឥឡូវរឿងនេះបានជ្រាបដល់ថ្នាក់ដឹកនាំក្រសួងហើយ។

សូមជម្រាបជូនថា កាលថ្ងៃទី០១ ខែមិថុនា ឆ្នាំ២០១៩កន្លងទៅ លោកគ្រូពេទ្យ ហ៊ូ ដា ប្រធានការិយាល័យប្រតិបត្តិ (OD) ស្រុកស្វាយអន្ទរ បានផ្តល់បទសម្ភាសដល់ក្រុមអ្នកកាសែត ពាក់ព័ន្ធនឹងរឿងរ៉ាវដែលលោកវជ្ជបណ្ឌិត សេង បញ្ញាឬទ្ធិ ប្រធានមន្ទីរសុខាភិបាល ខេត្តព្រៃវែង ជេរប្រមាថរូបលោកនៅក្នុងកិច្ចប្រជុំមួយកាលពីថ្ងៃទី២៨  និងថ្ងៃទី៣០ ខែឧសភា ឆ្នាំ២០១៩។

លោកគ្រូពេទ្យ ហ៊ូ ដា បានថ្លែងប្រាប់អ្នកកាសែត ទាំងទឹកភ្នែកប្រកបដោយការឈឺចុកចាប់ ថា « លោកប្រធានមន្ទីរសុខាភិបាល បានជេរប្រមាថខ្ញុំ ថា អាក្រពើ, អារមិលគុណ, អាព្រាត់ប្រាសគ្រួសារ, អាបើកឡានក្រឡាប់ …..។ គាត់ជេរខ្ញុំ ហើយគាត់ប្រាប់ ខ្ញុំថា គាត់ឲ្យឱកាស ៧ថ្ងៃដើម្បីទៅសុំទោសគាត់ទើបរួចខ្លួន»។

លោកគ្រូពេទ្យ ហ៊ូ ដា បានបន្តទាំងទឹកភ្នែកថា «ដោយសារគោរពគាត់ជាមេ ខ្ញុំបានទៅសុំទោសគាត់ និងធ្វើកិច្ចសន្យាជូនគាត់ទៀត ប៉ុន្តែទីបំផុតខ្ញុំត្រូវគាត់ដក ខ្ញុំចេញពីក្រុមការងារអស់រលីង ដែលហាក់កាត់ដៃជើងរបស់ ខ្ញុំពីការងារអស់ហើយ»។

នៅក្នុងបទសម្ភាសរយៈពេលប្រមាណជិត ១ម៉ោងជាមួយក្រុមអ្នកកាសែត លោកគ្រូពេទ្យ ហ៊ូ ដា ប្រធានការិយាល័យប្រតិបត្តិ (OD) ស្រុកស្វាយអន្ទរ បានរៀបរាប់អំពីភាពមិនប្រក្រតីក្នុងការអនុវត្តការងាររបស់វិជ្ជបណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង ជាច្រើនដែលធ្វើឲ្យប៉ះពាល់ដល់ទឹកចិត្តរបស់មន្ត្រីក្រោមឱវាទ។

យោងតាមប្រភពពី មន្ត្រីសុខាភិបាលខេត្តព្រៃវែង មិនមែនតែលោកគ្រូពេទ្យ ហ៊ូ ដា ម្នាក់ទេដែលឈឺចាប់ចំពោះទង្វើរបស់លោក សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង ប៉ុន្តែពួកគាត់មិនហ៊ានតវ៉ា ឬទម្លាយនោះទេ ព្រោះខ្លាចអំណាចរបស់មេ។

ពាក់ព័ន្ធ ករណីនេះ នៅរសៀលថ្ងៃទី០៥ ខែមិថុនា ឆ្នាំ០១៩នេះ    អង្គភាពគេហទំព័រ www.rskynews.com បានទាក់ទងសុំការបំភ្លឺ ពីលោក សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង តាមទូរស័ព្ទ ប៉ុន្តែលោកទទួលហើយ និងបិទទូរស័ព្ទភ្លាមៗ បន្ទាប់ពីដឹងថាជាអ្នកសារព័ត៌មានចង់សម្ភាស រឿងលោកជេរប្រមាថកូនចៅ រហូតកូនចៅទ្រាំលែងបាន ហៅអ្នកកាសែតទៅធ្វើសន្និសីទ ៕

ដោយ ៖ វិបុល