ខេត្តប៉ៃលិន ៖ ដោយសម្លឹងឃើញវឌ្ឍនភាព នៃការរីកចម្រើនរបស់ខេត្តប៉ៃលិន ប្រទេសកម្ពុជា ដែលជាអតីតសមរភូមិប្រយុទ្ធដ៏ក្តៅគគុក បានក្លាយជាតំបន់អភិវឌ្ឍន៍លើគ្រប់វិស័យ កាលពីថ្ងៃទ៣០ ខែឧសភា ឆ្នាំ២០១៩ ឯកឧត្តម ផាន់ ចាន់ធុល អភិបាលនៃគណៈអភិបាលខេត្តប៉ៃលិន បានដឹកនាំគណៈប្រតិភូខេត្ត រួមមានលោក ស៊ុន យី អភិបាលក្រុងប៉ៃលិន ទៅបំពេញបេសកកម្មផ្លូវការ នាខេត្ត Shanxi ប្រទេសចិន ដោយមានការស្វាគមន៍ពីលោក Dong Yibing អភិបាលក្រុង Lenfin ខេត្ត Shanxi ប្រទេសចិនផងដែរ។
ឯកឧត្តម ផាន់ ចាន់ធុល អភិបាលនៃគណៈអភិបាលខេត្តប៉ៃលិន បានមានប្រសាសន៍ឲ្យអ្នកយកព័ត៌មានដឹងថា ក្រុងប៉ៃលិនរបស់កម្ពុជា ដែលជាទីក្រុងល្បីល្បាញកាលពីអតីតកាលនោះ បានបោះជំហានទៅមុខ ដោយពេលនេះ ក៏បានចាប់ដៃចងសម្ព័ន្ធភាព លើកិច្ចសហប្រតិបត្តិការ ជាមួយទីក្រុងដ៏ធំ របស់មិត្តចិន ក្នុងគោលបំណង ដើម្បីពង្រឹង និងពង្រីកចំណងមិត្តភាព និងកិច្ចសហប្រតិបត្តិការ លើការអភិវឌ្ឍទីក្រុងឲ្យកាន់តែ រីកចម្រើន ស្របតាមគោលនយោបាយ នៃកិច្ចសហប្រតិបត្តិការគ្រប់ជ្រុងជ្រោយ ដែលដាក់ចេញដោយប្រមុខ នៃរាជរដ្ឋាភិបាលកម្ពុជា ដែលដឹកនាំ សម្ដេចតេជោ ហ៊ុន សែន និងលោកប្រធានាធិបតីចិន ស៊ី ជីនពីង ផងដែរ។
ឯកឧត្ដមអភិបាលខេត្ត មានប្រសាសន៍បន្តថា ផ្តើមចេញពីទំនាក់ទំនងការទូតដ៏យូរអង្វែង និងកិច្ចសហប្រតិបត្តិការទ្វេភាគី រវាងប្រទេសទាំងពីរ កម្ពុជា- ចិន កាន់តែមានភាពស៊ីជម្រៅ លើគ្រប់វិស័យ ចាប់តាំងពីកិច្ចសហប្រតិបត្តិការទ្វេភាគី រហូតដល់ជា ដៃគូយុទ្ធសាស្ត្រ គ្រប់ជ្រុងជ្រោយក្នុងឆ្នាំ២០១០ ជាពិសេស បន្ទាប់ពីជំនួបថ្នាក់ដឹកនាំកំពូល រវាង សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងលោក ស៊ី ជិនពីង ប្រធានាធិបតី សាធារណរដ្ឋប្រជាមានិតចិននាពេលកន្លងមកផងដែរ។
ឯកឧត្តម អភិបាលខេត្ត បានបន្តថា កិច្ចព្រមព្រៀង ដែលភាគីទាំងពីរ បានចុះហត្ថលេខា ទី១.ផ្លាស់ប្តូរកិច្ចសហប្រតិបត្តិការលើវិស័យពាណិជ្ជកម្ម សិក្សាអប់រំ វប្បធម៌ កសិកម្ម ទេសចរណ៍ សុខាភិបាល បណ្ដុះបណ្ដាលផ្នែកវិទ្យាសាស្ត្រ និងបច្ចេកវិទ្យា ដើម្បីជំរុញឲ្យមានការរីកចម្រើនរួមគ្នា, ទី២. សម្របសម្រួលឲ្យមានការផ្លាស់ប្តូរទស្សនកិច្ចរបស់តំណាងរបស់ខ្លួនទៅវិញទៅមក, ទី៣.ភាគីទាំង២រក្សាទំនាក់ទំនងជាប្រចាំ ដើម្បីនិរន្តរភាព នៃការចងសម្ព័ន្ធមេត្រី និងជំរុញឲ្យមានកិច្ចពិភាក្សារវាងថ្នាក់ដឹកនាំរដ្ឋបាល និងមន្ទីរវិស័យពាក់ព័ន្ធ ដើម្បីធ្វើកិច្ចសហប្រតិបត្តិការ ផ្លាស់ប្ដូរជាទ្វេភាគី ក្នុងករណីដែលភាគីទាំងពីរ មានចំណាប់អារម្មណ៍ ដោយគោរពតាមច្បាប់ នៃប្រទេសទាំងពីរ និងទី៤.ភាគីទាំងពីរ បានត្រៀមខ្លួនជាស្រេច ដើម្បីអនុវត្តការផ្លាស់ប្ដូរកិច្ចសហប្រតិបត្តិការ ដោយផ្អែកលើមូលដ្ឋាន សមភាព និងផលប្រយោជន៍របស់ភាគីទាំងពីរ។
នាឱកាសជួបពិភាក្សាការងារជាមួយឯកឧត្តម ផាន់ ចាន់ធុល អភិបាល នៃគណៈអភិបាលខេត្តប៉ៃលិន លោក Dong Yibing អភិបាលក្រុង Lenfin នៃសាធារណរដ្ឋប្រជាមានិតចិន បានលើកឡើងថា នេះគឺជាថ្ងៃប្រវត្តិសាស្ត្រ ដែលទីក្រុងទាំង២ ប៉ៃលិន- Lenfin បានចុះហត្ថលេខា ចងសម្ព័ន្ធមេត្រីភាពជាមួយគ្នា និងជាដំណាក់កាលអភិវឌ្ឍន៍ផ្លាស់ប្ដូរបទពិសោធន៍ ក្នុងការអភិវឌ្ឍន៍ទីក្រុងរួមគ្នា ជាមួយគ្នានេះដែរ លោក ក៏បានបង្ហាញពីជំហរយ៉ាងម៉ឺងម៉ាត់ ក្នុងការគាំទ្រគោលនយោបាយចិនតែមួយ និងចូលរួមយ៉ាងសកម្ម សម្រាប់ផែនការ ផ្លូវមួយ ខ្សែក្រវាត់មួយ របស់លោក ស៊ី ជិនពីង ប្រធានាធិបតី នៃសាធារណរដ្ឋប្រជាមានិតចិន ហើយបានចាត់ទុកមិត្តភាពកម្ពុជា-ចិន គឺជាមិត្តដ៏ល្អ ជាដៃគូរួមសុខទុក្ខ ជាមួយគ្នា ជួយគ្នាទៅវិញទៅមក អស់រយៈពេលជាង៦០ឆ្នាំមកហើយដែរ។
សូមបញ្ជាក់ថា ក្នុងការបំពេញបេសកកម្មផ្លូវការ នៅក្រុង Lenfin ប្រទេសចិន ឯកឧត្តម ផាន់ ចានធុល អភិបាលខេត្តប៉ៃលិន និងគណៈប្រតិភូខេត្ត បានអញ្ជើញទស្សនកិច្ច សារមន្ទីរសង្ឃហ្វាសៀន ក្នុងតំបន់អេកូបរិស្ថាន,រោងចក្រផលិតគ្រឿងបន្លាស់ធំជាងគេ ក្នុងក្រុង Linfen ព្រមទាំងជួបសម្ដែងការគួរសមជាមួយលោក Lin Wu អនុលេខាធិការគណៈអភិបាលខេត្ត Shanxi និងលោកស្រី Ly Yali លេខាបក្ស និងលោក Wang Xiao Bin អភិបាលស្រុកស៊ីសៀន ខេត្តសានស៊ី ដើម្បីបង្កើតកិច្ចសហការលើគ្រប់វិស័យ និងត្រៀមចងសម្ព័ន្ធមេត្រីភាពជាមួយគ្នាបន្តទៀតផងដែរ៕
ដោយ ៖ វិបុល
