ខេត្តព្រះសីហនុ ៖ គណៈប្រតិភូសាធារណរដ្ឋប្រជាធិបតេយ្យប្រជាមានិតឡាវ ទស្សនកិច្ចនៅព្រះរាជាណាចក្រកម្ពុជា រយៈ ពេល ៤ថ្ងៃ គឺចាប់ពីថ្ងៃទី ៣ ដល់ថ្ងៃទី ៦ ខែមិថុនា ឆ្នាំ២០១៩ ។
បន្ទាប់ពីបានធ្វើទស្សនកិច្ចនៅ រាជធានីភ្នំពេញរួចមក នៅល្ងាចថ្ងៃអង្គារទី៤ ខែមិថុនា គ.ស ២០១៩ គណៈប្រតិភូបានចូលជួបប្រជុំសំណេះសំណាល ជាមួយ អភិបាលខេត្ដព្រះសីហនុ ដើម្បីសិក្សាស្វែងយល់ពីសក្ដានុពល និងវឌ្ឍនភាពរបស់ខេត្ដព្រះសីហនុ រួមទាំងស្នើសុំអនុសាសន៍ពីអភិបាលខេត្ត ទាក់ទងនឹងយុទ្ធសាស្ត្រអូសទាញវិនិយោគិនអោយចូលមកបណ្តាក់ទុន និងការគ្រប់គ្រងអាជីវកម្មទាំងនោះផងដែរ។
គោលបំណងនៃដំណើរទស្សនកិច្ចមកខេត្ដព្រះសីហនុ របស់គណៈប្រតិភូឡាវនាពេលនេះផ្តោតសំខាន់លើចំនុចចំនួន៣៖ ១.ដើម្បីស្រង់បទពិសោធន៍ការងារគ្របគ្រងវិស័យពាណិជ្ជកម្ម
២.សិក្សាស្រាវជ្រាវវិស័យទេសចរណ៍នៅខេត្តព្រះសីហនុ
៣.សិក្សាឈ្វេងយល់អំពីការគ្រប់គ្រងវិស័យមួយចំនួនដូចជា សេវាកម្មអាជីវកម្មទេសចរណ៍ សណ្ឋាគារ កាស៊ីណូ រួមទាំងគម្រោងធ្វើពាណិជ្ជកម្មជាមួយខេត្តព្រះសីហនុ ជាដើម។ល។
ឯកឧត្ដម សូនីសាយ ស៊ីផានដុន ឧបនាយករដ្ឋមន្ត្រី នៃសាធារណ រដ្ឋប្រជាធិបតេយ្យប្រជាមានិតឡាវ ទទួលបន្ទុកសេដ្ឋកិច្ច កសិកម្ម អភិវឌ្ឍជនបទ និងសង្គមកិច្ច មានប្រសាសន៍ថា ភាគីឡាវធ្លាប់បានមកធ្វើទស្សនកិច្ច ខេត្តព្រះសីហនុ បីដងហើយ តែមកលើកនេះ ឃើញខេត្តព្រះសីហនុ មានការអភិវឌ្ឍន៏លឿនណាស់។ លោកបានសំដែងការកោតសរសើរថ្នាក់ដឹកនាំខេត្តព្រះសីហនុ ថាបានជួយធ្វើអោយខេត្តប្រែមុខមាត់យ៉ាងឆាប់រហ័ស។ ក្នុងនាមជាប្រទេសជិតខាងគ្នា យើង នឹងពង្រឹងពង្រីកទំនាក់ទំនងឲ្យកាន់តែល្អប្រសើរថែមទៀត។
គណៈប្រតិភូឡាវ សំដែងការកោតសរសើរថ្នាក់ដឹកនាំខេត្តព្រះសីហនុ ដែលបានដឹកនាំធ្វើអោយខេត្ដរីកលូតលាស់ខ្លាំង។ ឯកឧត្តមក៏ស្នើគណៈប្រតិភូខេត្តព្រះសីហនុ ទៅទស្សនកិច្ចនៅប្រទេសឡាវ និងមានបំណងបង្កើតចំណងសម្ព័ន្ធមេត្រីភាព រវាងខេត្តព្រះសីហនុ និងខេត្តចំនួន២នៅឡាវនៅពេលខាងមុខ។
ក្នុងឱកាសនោះដែរ ឯកឧត្ដម គណៈប្រតិភូឡាវ ស្នើសុំចែករំលែកបទពិសោធន៍ឬអនុសាសន៍ពីអភិបាលខេត្ដព្រះសីហនុ អំពីការទាក់ទាញអ្នកវិនិយោគអោយចូលមកបណ្តាក់ទុនយ៉ាងច្រើនសំបើមបែបនេះ រួមជាមួយនឹង ការគ្រប់គ្រង់ផងដែរ។
ឯកឧត្ដម យន្ដ មីន អភិបាលនៃគណៈអភិបាលខេត្តព្រះសីហនុ មានប្រសាសន៍ឆ្លើយតបថា ការគ្រប់គ្រងដឹកនាំទាក់ទាញវិនិយោគិន គឺដោយសារប្រទេសកម្ពុជា មានប្រមុខដឹកនាំដ៏ឆ្លាតវៃ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននាំមកនូវសុខសន្ដិភាពពេញលេញមានគោល នយោបាយច្បាស់លាស់ មានច្បាប់ការពារអ្នកវិនិយោគ សុវត្ថិភាព សន្ដិសុខល្អ ខេត្តព្រះសីហនុ មានសក្តានុពលផង រួមនឹងប្រពៃណីល្អរបស់ប្រជាជនខេត្ដព្រះសីហនុរុះរាយរាក់ទាក់ ជាដើម។ល។
ឯកឧត្តម យន្ត មីន បញ្ជាក់ថា នៅខេត្ដព្រះសីហនុ មានអ្នកវិនិយោគចម្រុះជាតិសាសន៍ ១៦ប្រទេស ក្នុងនោះចិនច្រើនជាងគេ អ្នកវិនិយោគចិន ធ្វើការវិនិយោគលឿនជាងសាសន៍ដទៃ។ ពាក់ព័ន្ធការគ្រប់គ្រងដីធ្លីរបស់ក្រុមហ៊ុនវិនិយោគ គឺគេជួល ឬទិញផ្ទាល់ខ្លួនពីឯកជនតែម្តង។ សព្វថ្ងៃអ្នកមកវិនិយោគភាគច្រើនគេទិញ ឬជួល មួយទៀតចំនួនជួលដីពីរដ្ឋបែបសម្បទានរយៈពេល ៥០ឆ្នាំ ។ល។
ឯឧត្តម យន្ត មីន ថាទន្ទឹមនឹងការរីកចម្រើនក៏មានការប្រឈមខ្លះដែរ នៅពេលមានអ្នកវិនិយោគមកច្រើន ។ តែរដ្ឋបាលខេត្ត ខិតខំដោះស្រាយដោយយកច្បាប់ជាគោល និងមានការសម្រប សម្រួលខ្លះដែរតាមសភាពជាក់ស្តែង។
ឯកឧត្តម បន្ដថា ខេត្តព្រះសីហនុ មានវិស័យអាទិភាពមួយចំនួន រួមមាន វិស័យកសិកម្ម ឧស្សាហកម្ម ពាណិជ្ជកម្ម (មានតំបន់សេដ្ឋកិច្ចពិសេសចំនួន ៥កន្លែង មានរោងចក្រចំនួន ១១០ និងកម្មករនិយោជិតជាង ៨០.០០០នាក់ កំពុងធ្វើការ) វិស័យទេសចរណ៍ និងសេវាកម្មផងដែរ ជាពិសេសខេត្តនេះ មានកំពង់ផែទឹកជ្រៅ ព្រលានយន្តហោះអន្តរជាតិ ប្រព័ន្ធគមនាគមន៍ប្រទាក់ក្រឡា និងមានផ្លូវល្បឿនលឿនកំពុងសាងសង់ផងដែរ។ ខេត្ដព្រះសីហនុ ត្រូវបានរាជរដ្ឋាភិបាលចាត់ទុកជាខេត្តប៉ូលសេដ្ឋកិច្ចពិសេស ឧស្សាហកម្មគំរូពហុបំណងតែមួយគត់នៅព្រះរាជាណាចក្រកម្ពុជា។ ចំពោះគោលនយោបាយទំនាក់ទំនងអន្តរជាតិ ខេត្តព្រះសីហនុ បានបង្កើតចំណងមិត្តភាពជាមួយប្រទេសដទៃ ដោយបង្កើតជាខេត្តក្រុងសម្ពន្ធ័មេត្រីភាព ឬខេត្តក្រុងបងប្អូន។
តាមរយៈជំនួបនេះ អភិបាលខេត្តព្រះសីហនុ មានរំពឹងភាគីទាំងពីរ នឹងកាន់តែមានទំនាក់ទំនងគ្នាល្អ និងបានស្នើភាគីឡាវ ជួយជម្រុញទេសចរណ៏ និងធុរៈជនមកខេត្តព្រះសីហនុ ផងដែរ ៕
ដោយ ៖ វិបុល
