រាជធានីភ្នំពេញ ៖ កាលពីវេលាម៉ោងប្រមាណ៦ល្ងាចថ្ងៃទី៣ ខែមិថុនា ម្សិលមិញនេះ មានករណីវៃប្លន់យកម៉ូតូមិនបានសម្រេចមួយករណី នៅចំណុចផ្លូវវេងស្រេង ភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ ។ ប៉ុន្តែទោះបីយ៉ាងណា ជនសង្ស័យម្នាក់ក្នុងចំណោម២នាក់ ត្រូវបានសមត្ថកិច្ចឃាត់ខ្លួនភ្លាមៗផងដែរ ។
សមត្ថកិច្ច បានឲ្យដឹងនៅថ្ងៃទី៤ ខែមិថុនា នេះ ថា ជនសង្ស័យឈ្មោះ ចាន់ ផានិត ភេទប្រុស អាយុ២៨ឆ្នាំ មុខរបរបុគ្គលិកខារ៉ាអូខេ ស្នាក់នៅបន្ទប់ជួលផ្លូវលំ សង្កាត់កាកាបទី១ ខណ្ឌពោធិ៍សែនជ័យ។ ចំណែកជនរងគ្រោះឈ្មោះ នៅ សុខហួរ ភេទប្រុស អាយុ១៥ឆ្នាំ មុខរបរកម្មករសំណង់ ស្នាក់នៅបន្ទប់ជួល ភូមិម័ល សង្កាត់ដង្កោ ខណ្ឌដង្កោ។
នៅចំពោះមុខសមត្ថកិច្ច ជនសង្ស័យបានសារភាពថា រូបគេនិងបក្ខពួកម្នាក់ទៀត ឈ្មោះ ចិន កេត ដែលកំពុងតែរត់គេចខ្លួនជាមួយម៉ូតូជនរងគ្រោះ ពិតជាបានធ្វើសកម្មភាពវៃប្លន់យកម៉ូតូពីជនរងគ្រោះពិតប្រាកដមែន។
បច្ចុប្បន្ន ជនសង្ស័យត្រូវបានបញ្ជូនទៅកាន់អធិការដ្ឋាននគរបាលខណ្ឌមានជ័យ ដើម្បីចាត់ការបន្តតាមនីតិវិធី ។
ដោយ ៖ វិបុល
