លោកព្រះរាជអាជ្ញារង ខាន់ សុផល អ្នកនាំពាក្យអយ្យការអមសាលាដំបូងខេត្តកំពត បានប្រាប់សារព័ត៌មានក្នុងស្រុកតាមទូរស័ព្ទនៅរសៀលថ្ងៃទី០៣ ខែមិថុនា ឆ្នាំ២០១៩នេះថា ស្ថាប័នអយ្យការអមសាលាដំបូងខេត្តកំពត ពិតជាបានទទួលពាក្យបណ្តឹងរបស់លោក យី ថុល ប្តឹងអ្នកកាសែតមែននៅព្រឹកនេះ។
លោកព្រះរាជអាជ្ញារង រូបនេះបន្ថែមថា សំណុំរឿងនេះនៅពុំទាន់ត្រូវបានចាត់ជូនតំណាងអយ្យការរូបណា ជាអ្នកចាត់ការនៅឡើយទេ។
សូមជម្រាបជូនថា លោក យី ថុល ប្រធានការិយាល័យគយ និងរដ្ឋាករ ព្រែកចាកបានដាក់ពាក្យប្តឹងអ្នកកាសែតជាង១០នាក់ ចំនួន៣បទល្មើសរួមមាន៖
១.បទជេរប្រមាថចំពោះអ្នករាជការសាធារណៈ
២.បទប៉ះពាល់ដល់សិទ្ធិខាងរូបភាពនៃបុគ្គល និង
៣.បទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ
ព្រមទាំងទាមទារសំណងជំងឺចិត្តចំនួន១០មុឺនដុល្លារអាមេរិក។
អ្នកកាសែតដែលរងបណ្តឹងរបស់លោក យី ថុល ប្រធានការិយា ល័យគយ និងរដ្ឋាករ ព្រែកចាករួមមាន៖
-ទី១លោក ហ៊ុន សុខា ជាប្រធានក្លិបអ្នកកាសែតឯករាជ្យ និងជានាយកផ្សាយព័ត៌មានប្រជាជនកម្ពុជា (CPNTV)
-ទី២លោក ចន យូដេត ជាសមាជិកនៃក្លិបអ្នកកាសែតឯករាជ្យ
-ទី៣លោក ស៊ាង ប៊ុនសុង ជាសមាជិកនៃក្លិបអ្នកកាសែតឯករាជ្យ
-ទី៤លោក ទុំ ឆោម ជាសមាជិកនៃក្លិបអ្នកកាសែតឯករាជ្យ
-ទី៥លោក ប៉ែន រ៉ា ជាសមាជិកនៃក្លិបអ្នកកាសែតឯករាជ្យ
-ទី៦លោក កែវ សុផាត ជាសមាជិកនៃក្លិបអ្នកកាសែតឯករាជ្យ
-ទី៧លោក ជី ពេជ្រ ជាសមាជិកនៃក្លិបអ្នកកាសែតឯករាជ្យ
-ទី៨លោក អ៊ុត ប៊ុនធឿន ជាសមាជិកនៃក្លិបអ្នកកាសែតឯករាជ្យ និងបក្ខពួក។
គួររលឹកថា បណ្តឹងរបស់លោក យី ថុល ប្រធានការិយាល័យគយ និងរដ្ឋាករ ព្រែកចាក ផ្តើមចេញពីសកម្មភាពរបស់ក្រុមអ្នកសារ ព័ត៌មានប្រមាណជិត ១០នាក់ខាងលើ និងបក្ខពួក បាននាំគ្នាចូលទៅក្នុងបរិវេណ ប៉ុស្ដិ៍គយព្រែកចាក ព្រំប្រទល់កម្ពុជា-វៀតណាម ក្នុងខេត្តកំពត កាលពីថ្ងៃទី២៨ ខែឧសភា ឆ្នាំ២០១៩កន្លងទៅ។
នៅថ្ងៃកើតហេតុ ក្រុមអ្នកកាសែតខាងលើ បានផ្សាយផ្ទាល់តាមបណ្តាញសង្គមហ្វេសប៊ុក (Live) អំពីទំនាស់ពាក្យសម្តីជាមួយអាជ្ញាធរសាធារណៈជេរប្រមាថ និងរុញច្រានដេញចាប់មន្ត្រីគយ ខណៈមន្ត្រីជំនាញកំពុងបំពេញភារកិច្ចប្រចាំថ្ងៃរបស់ខ្លួន គឺពិនិត្យការនាំចូលទំនិញពីប្រទេសវៀតណាមចូលមកកម្ពុជា។
សកម្មភាពរបស់ក្រុមអ្នកកាសែតខាងលើ ត្រូវបានមជ្ឈដ្ឋានទូទៅ រួមទាំងអ្នកកាសែត និងរដ្ឋមន្ត្រីក្រសួងព័ត៌មានផង សុទ្ធតែសម្តែងការហួសចិត្ត ត្បិតមើលឃើញថាក្រុមអ្នកកាសែតទាំងអស់ខាងលើបានប្រព្រឹត្តប្រាសចាកអំពីក្រមសីលធម៌វិជ្ជាជីវៈរបស់ខ្លួន៕
ដោយ ៖ វិបុល
