រាជធានីភ្នំពេញ ៖ វប្បធម៌នៃការដោះដូរបានកើតមានឡើងនៅរាជធានីភ្នំពេញ ក្រោយពីមានស្ងប់ស្ងាត់មួយរយៈ ហើយកក្រើកជាថ្មី បណ្តាលមកពីអ្នកមានអំណាច អ្នកមានលុយ ជាក់ស្តែងដីនៅទីតាំងប៉ុស្តិ៍នគរបាលរដ្ឋបាលទឹកថ្លា មានទី តាំងស្ថិតនៅតាមបណ្តោយផ្លូវហាណូយ ភូមិទឹកថ្លា សង្កាត់ទឹកថ្លា ខណ្ឌសែនសុខ មានទំហំប្រមាណប្រហែល ២៥មx៣០ម =៧៥០មែត្រការេ ដោយតំលៃដីលើទីផ្សារប្រហែល១មែត្រការេតំលៃ២៥០០$ ត្រូវបានដោះដូរចេញពីទីតាំងចាស់ទៅនៅទីតាំងថ្មីមានលក្ខណៈចង្អៀតកៀនកោះ ស្ថិតនៅផ្លូវលំ ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ទាក់ទិននិងការដោះដូរប៉ុស្តិ៍នគរបាលទឹកថ្លានេះមានការថ្នាំងថ្នាក់ពីប្រជាពលរដ្ឋមួយចំនួនដែលរស់នៅក្នុងមូលដ្ឋាននេះ នៅពេលដែលត្រូវការសេវាទៅរកគឺមិនឃើញដោយការផ្លាស់ប្តូរបានធ្វើឡើងក្រោយចូលឆ្នាំខ្មែរយើងថ្មីៗនេះ។ ទាក់ទងនិងការដោះដូរនេះអង្គភាពគេហទំព័រ www.rskynews.com បានធ្វើការទំនាក់ទំនងជាមួយលោកមេភូមិទឹកថ្លា ទើបឡើងថ្មីឈ្មោះ កង នឿន បាននិយាយថា៖ រូបលោកពុំបានដឹងទេ រឿងដោះដូរប៉ុស្តិ៍នគរបាលនេះ ដោយសារដី នេះជាដីសារពើភណ្ឌរបស់នគបាល។ ក៏ប៉ុន្តែដោយស្នាក់ការភូមិក៏នៅលើដីប៉ុស្តិ៍នគរបាលនោះដែរ ហើយនៅពេលដូរ ទីតាំងថ្មីលោកបានសំណូមពរសុំធ្វើអគារស្នាក់ការភូមិមានទំហំទទឹង៥មែត្រ និងបណ្តោយ៧មែត្រ លើផ្ទៃដីទំហំ៥២មែត្រការេ អោយនៅដាច់ពីប៉ុស្តិ៍នគរបាល ហើយក៏បានការឯកភាពពីលោកផ្កាយ២ផងដែរ ។
ដោយឡែកលោក តាំង គឹមវិន ចៅសង្កាត់ទឹកថ្លា លោកបាននិយាយអោយដឹងដែរថា រឿងមានការដោះដូរទីតាំងប៉ុស្តិ៍ នគរបាលរដ្ឋបាលទឹកថ្លានេះលោកមិនបានដឹងឡើយ អាចសាកសួរលោក ម៉េង វ៉ាង អធិការខណ្ឌសែនសុខ ដោយលោកគ្រាន់តែដឹងថា ដីនោះជារបស់អគ្គស្នងការនគរបាលជាតិតែប៉ុណ្ណោះ។
ជាមួយគ្នានេះលោក ម៉ូវ មានិត អភិបាលខណ្ឌសែនសុខ ក៏បានប្រាប់តាមទូរស័ព្ទអោយដឹងថា៖ រូបលោកមិនបានដឹង រឿងដោះដូរប៉ុស្តិ៍នគរបាលរដ្ឋបាលទឹកថ្លានេះទេ លោកបានប្រាប់អោយធ្វើការសាកសួរទៅលោក ម៉េង វ៉ាង អធិការ នគរបាលខណ្ឌសែនសុខ ដោយឡែកលោក ម៉េង វ៉ាង ពុំបានទទួលទូរស័ព្ទដើម្បីបំភ្លឺករណីនេះឡើយ។
ទាក់ទងទៅនឹងការដោះដូរប៉ុស្តិ៍នគរបាលរដ្ឋបាលសង្កាត់ទឹកថ្លា មួយនេះត្រូវបានឯកឧត្តម អ៊ឹង សំអុល អគ្គស្នងការរង នគរបាលជាតិ ទទួលបន្ទុកកិច្ចការប៉ុស្តិ៍ នគរបាលទូទាំងប្រទេស បានអះអាងផងដែរថា ៖ លោកមិនបានដឹងឡើយចំពោះការ ដោះដូរប៉ុស្តិ៍នគរបាលនេះទេ ហើយលោកទើបតែចុះទៅថ្មីៗនេះទេ ម្យ៉ាងទៀតការងាររបស់លោកគ្រាន់តែជាអ្នកគ្រប់គ្រងតែខាងនីតិវិធីតែប៉ុណ្ណោះ រីឯទ្រព្យសម្បតិ្តរដ្ឋដែលជាបញ្ជីសារពើភណ្ឌគឺជាដែនសមត្ថកិច្ចរបស់ស្នងការរាជធានីភ្នំពេញ ជាអ្នកគ្រប់គ្រង សម្រេច និងចាត់ចែង។
ដោយឡែកលោកឧត្តមសេនីយន៌ឯក ស ថេត ស្នងការនគរបាលរាជធានីភ្នំពេញ បានមានប្រសាសន៏តាមទូរស័ព្ទ អោយដឹងថា៖ ការដោះដូរទីតាំងប៉ុស្តិ៍នគរបាលរដ្ឋបាលទឹកថ្លា នេះគឺដើម្បីអោយទៅនៅជិត និងងាយស្រួយផ្តល់សេវា ជូនប្រជាពលរដ្ឋ ហើយការដោះដូរនេះមានអ្នកខ្លះពេញចិត្ត និងអ្នកខ្លះមានការថ្នាំងថ្នាក់ជាដើម ម្យ៉ាងទៀតដីនោះគឺ មានទីស្នាក់ការភូមិទឹកថ្លានៅមួយចំណែកដែរ។
ទាក់ទិនទៅនិងបញ្ហាដោះដូរទីតាំងប៉ុស្តិ៍នគរបាលរដ្ឋបាលទឹកថ្លានេះ ត្រូវបានប្រជាពលរដ្ឋរស់នៅក្នុងសង្កាត់ ទឹកថ្លា បានធ្វើការរិៈគន់ដោយត្រង់ៗថា៖ ប៉ុស្តិ៍នគរបាលទឹកថ្លាចាស់មានទីធ្លាធំ ហើយស្ថិតនៅតាមបណ្តោយផ្លូវហាណូយ ងាយស្រួយក្នុងការទំនាក់ទំនង ចំណែកទីតាំងថ្មីមានអាគារសង់លើដីប្រហែលទំហ៨មែត្រ គុណ១៨មែត្រ ដោយមាន អគារ២ល្វែង និងកំពស់២ជាន់នៅតាមបណ្តោយផ្លូវលំ ស្ថិតនៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ដដែល ដោយពិបាកក្នុងការស្វះស្វែងរុករកទៅសុំសេវាផេ្សងៗ ធ្វើអោយមានការលំបាក់យ៉ាងខ្លាំង។ ហេតុដោយការដោះដូរទីតាំងប៉ុស្តិ៍នគរបាលរដ្ឋបាលដ៏ល្អប្រសើរមួយនេះទំនងជាអ្នកមានអំណាច លុយទិញដីទីតាំងនោះក្នុងតម្លៃ ខ្ពស់ទើបធ្វើអោយវប្បធ៌មនៃការដោះដូរកើតមានឡើងវិញនៅក្នុងរាជធានីភ្នំពេញ។
ប្រភពពីមន្រ្តីតូចតាចនៅក្នុងប៉ុស្តិ៍នគរបាលទឹកថ្លាបានខ្សឹបប្រាប់ពីផលប្រយោជន៏ដែលទទួលបានថា ៖ មន្រ្តីនគរបាល ទាំងអស់ដែលបានធ្វើការនៅក្នុងប៉ុស្តិ៍ទឹកថ្លាទាំងអស់សុទ្ធតែទទួលបានផលប្រយោជន៏ពីការដោះដូរនោះមែន តែពុំ បានប្រាក់ស្មើៗគ្នានោះឡើយ។ អ្នកខ្លះបាន៥០០ដុល្លារអាមេរិក អ្នកខ្លះទៀតបាន១០០០ដុល្លារអាមេរិក ហើយអ្នកខ្លះ ទៀតបានទទួលរហូតដល់៥០០០ដុល្លារអាមេរិក ដោយទំនងជាគេធ្វើការបែងចែកតាមឋានៈនិងតួនាទី ទើបពុំទទួល បានផលប្រយោជន៏ស្មើៗគ្នានេះទេ។
ភាពកក្រើកឡើងវិញនៃវប្បធ៌មនៃការដោះដូរទីតាំងប៉ុស្តិ៍នគរបាលរដ្ឋបាលទឹកថ្លា ក្នុងខណ្ឌសែនសុខ នេះប្រហែលជា ឯកឧត្តមនាយឧត្តមសេនីយន៍សន្តិបណ្ឌិត នេត សាវឿន អគ្គស្នងការនគរបាលជាតិ លោកពុំទាន់បានជ្រាប ឫក៏បានជ្រាប់ដែរ ចំពោះសកម្មភាពរបស់ឯកឧត្តម ស ថេត អគ្គស្នងការរង និងជាស្នងការរាជធានីភ្នំពេញ បានចាប់ផ្តើមគាស់កកាយវប្បធ៌មនៃការដោះដូរនេះមកវិញទេមើលទៅ៕
ដោយ ៖ វិបុល
