ខេត្តមណ្ឌលគីរី ៖ ថ្មីៗនេះប្រភពពីមន្ត្រីគយក្នុងខេត្តមណ្ឌលគិរីបាន ឲ្យដឹងថាចាប់តាំងពីទទួលបានតំណែងជាមេគយខេត្តមណ្ឌលគិរី រួចមកគឺលោក ហ៊ុយ សុជាតិ កំពុងសាងភាពល្បីល្បាញខាង ប្រព្រឹត្តអំពើពុករលួយប្រមូលលុយស្រង់ដើមដោយគ្មានញញើត អ្វីទាំងអស់ ។ ដូច្នេះហើយទើបមានសេចក្ដីអំពាវនាវឲ្យលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ច និង ហិរញ្ញវត្ថុ ក៏ដូចជា លោក បណ្ឌិត គុណ ញឹម ដែលជា អគ្គនាយក នៃអគ្គនាយកដ្ឋានគយ និងរដ្ឋាករ កម្ពុជា គួរចាត់វិធានការទប់ស្កាត់ទង្វើ មិនប្រក្រតីទាំងឡាយ របស់លោក ហ៊ុយ សុជាតិ មេគយខេត្តមណ្ឌលគិរី ជាបន្ទាន់ ។
ប្រភពពីមន្ត្រីដែលបានបំពេញការងារនៅច្រកទ្វេភាគីដាក់ដាំស្រុក អូររាំង ខេត្តមណ្ឌលគិរី បានបង្ហើបឲ្យដឹងថាឈ្មួញនាំចូល ទំនិញ និងប្រេង សាំង គេចពន្ធតាមច្រកនេះយ៉ាងពេញបន្ទុក ព្រោះលោក ហ៊ុយ សុជាតិ មេគយ ខេត្តមណ្ឌលគិរី បើកដៃឲ្យ ប្រធានការិយាល័យ គយច្រក ដាក់ដាំធ្វើអ្វីៗតាមអំពើចិត្ត ។
គួររំលឹកថាកាលលោក ហ៊ុយ សុជាតិនៅធ្វើជាប្រធានការិយាល័យគយ ច្រកទ្វារអន្តរជាតិ ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ លោក ហ៊ុយ សុជាតិ ល្បីល្បាញ យ៉ាងខ្លាំង ក្នុងការប្រើតួនាទី និងអំណាចប្រព្រឹត្តអំពើពុករលួយ យ៉ាង ពេញបន្ទុក ដោយ គ្មានញញើតអ្វីទាំង អស់ ។ ឥឡូវនេះនៅពេល ទទួលបានតំណែងជាមេគយខេត្តមណ្ឌលគិរី គឺលោក ហ៊ុយ សុជាតិ កំពុងប្រើគ្រប់ វិធីដើម្បីប្រមូលលុយយ៉ាងសុខ ស្រួលហើយ មិនចាត់វិធានការបង្ក្រាបក្រុមឈ្មួញនាំចូលទំនិញគេចពន្ធ ទំនិញ បង់ពន្ធមិនគ្រប់ឬ ទំនិញខុសច្បាប់នោះទេ ។ ដូច្នេះហើយទើប មានសេចក្ដីអំពាវនាវជូនឯកឧត្តមនាយករដ្ឋមន្ត្រី អូន ព័ន្ធមុនីរ័ត្ន ដែលជារដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ចាត់វិធានការទប់ស្កាត់ អំពើ ពុករលួយ របស់លោក ហ៊ុយ សុជាតិ ដែលជាមេ គយ ខេត្តមណ្ឌលគិរី ជៀសវាងដើម្បីកុំឲ្យមន្ត្រីគយរូបនេះប្រើតួនាទី និងអំណាច របស់ខ្លួនធ្វើ អ្វីៗតាមអំពើចិត្តទៀត ។
តាមការបង្ហើបពីមន្ត្រីគយក្នុងខេត្តមណ្ឌលគិរី មួយចំនួនបានឲ្យដឹងថាទំនង លោក ហ៊ុយ សុជាតិ ចំណាយលុយយ៉ាងច្រើនដើម្បីទទួលបាន តំណែងជាមេគយ ខេត្តមណ្ឌលគិរី ទើបលោក ហ៊ុយ សុជាតិ ប្រើប្រាស់តួនាទី និងអំណាចរបស់ខ្លួនប្រមូលលុយតាមរបៀបពុករលួយយ៉ាង តក់ក្រហល់ដោយគ្មានខ្លាចក្រែងអ្វីឡើយ។ ប្រភពបានឲ្យដឹងទៀតថាលោក ហ៊ុយ សុជាតិ កំពុងអនុវត្តន៍តាមបទពិសោធន៍កាលនៅធ្វើជា ប្រធានការិយាល័យច្រក ប៉ោយប៉ែត ក្នុងការប្រព្រឹត្តអំពើពុករលួយ ហើយយកឈ្មោះ មេគយធំៗ មកធ្វើជាខែល ដើម្បីបិទបាំងទង្វើរបស់ខ្លួន យ៉ាងងងើល ។ នៅច្រកទ្វេភាគីណាំលៀហៅច្រកប៉ុស្ដិ៍៧ក៏ដូចជាច្រកទ្វេភាគីឡាប៉ាខេក៏ឈ្មួញអាចនាំចូលទំនិញគេចពន្ធ និ ទំនិញបង់ពន្ធមិន គ្រប់យ៉ាងពេញបន្ទុកផងដែរ ព្រោះលោក ហ៊ុយ សុជាតិ បណ្ដោយឲ្យមន្ត្រីគយនៅច្រកទ្វេភាគីទាំង២នោះធ្វើអ្វីៗតាមអំពើចិត្ត ។
ជាពិសេសប្រភពដែលស្និទ្ធនឹងលោក ហ៊ុយ សុជាតិ មេគយខេត្តមណ្ឌលគិរី បានឲ្យដឹងថាដោយសារមានខ្នងបង្អែករឹងមាំនៅក្នុង អគ្គនាយកដ្ឋានគយ និងរដ្ឋាករ កម្ពុជា ទើបលោក ហ៊ុយ សុជាតិ អាចផ្ទេរពីតំណែងប្រធានការិយោល័យគយច្រកទ្វារអន្តរជាតិប៉ោយប៉ែត មក ធ្វើជាមេគយខេត្តមណ្ឌលគិរី យ៉ាងរលូន ។ បន្ទាប់ពីទទួលបានតំណែងជាមេគយប្រចាំខេត្ត មណ្ឌលគិរី រួចមកគឺ លោក ហ៊ុយ សុជាតិ មិនដែលចាត់វិធានការបង្ក្រាប ឬទប់ស្កាត់ក្រុមឈ្មួញនាំចូល ទំនិញគេចពន្ធ ទំនិញបង់ពន្ធមិនគ្រប់ និងប្រេងសាំង គេចពន្ធនោះទេ ហើយ មានតែឃុបឃិតឲ្យឈ្មួញនាំចូលកាន់តែច្រើនឡើងៗ។ ប្រភពបានពីសមត្ថកិច្ចពាក់ព័ន្ធបានបង្ហើបឲ្យដឹងថាករណីក្រុមឈ្មួញសម្រុក ដឹកជញ្ជូនឈើចេញទៅស្រុកយួនតាមច្រកទ្វេភាគីទាំង៣កន្លែងក្នុងខេត្តមណ្ឌលគិរី គឺច្រកដាក់ដាំ ច្រកណាំលៀ និងច្រកឡាប៉ាខេ ក៏ជាប្រភពចំណូលដ៏សំខាន់របស់លោក ហ៊ុយ សុជាតិ ។
រាល់សេចក្តីចោទប្រកាន់ខាងលើចំពោះលោក ហ៊ុយ សុជាតិ អង្គភាពគេហទំព័រ www.rskynews.com មិនអាចសុំការបំភ្លឺពីលោក ហ៊ុយ សុជាតិ បានឡើយនារសៀលថ្ងៃទី ០២ ខែមិថុនា ឆ្នាំ២០១៩ នេះ ទោះយ៉ាងណាអង្គភាពយើងនឹងរងចាំការបកស្រាយគ្រប់ពេលវេលាពីបុគ្គល ដែលត្រូវបានគេចោទប្រកាន់គ្រប់ពេលវេលា៕
ដោយ ៖ វិបុល
