ខេត្តកំពង់ចាម ៖ នៅព្រឹកថ្ងៃសៅរ៍១៤រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០១ ខែមិថុនា ឆ្នាំ២០១៩ ស្នងការដ្ឋាននគរបាលខេត្តកំពង់ចាម បានរៀបចំកិច្ចប្រជុំបូកសរុបសភាពការណ៍ លទ្ធផលកិច្ចប្រតិបត្តិការរក្សាសន្តិសុខសង្គម ការងារនគរបាលនិងសហគមន៍ប្រចាំខែឧសភា,ឆមាសទី១ និងបូកសរុបលទ្ធផលកិច្ចការពារសន្តិសុខ សុវត្ថិភាព សណ្តាប់ធ្នាប់ ដំណើរការបោះឆ្នោត ជ្រើសរើសក្រុមប្រឹក្សា រាជធានី ខេត្ត ស្រុក ក្រុង ខណ្ឌ អាណត្តិទី៣ កិច្ចប្រជុំនេះប្រព្រឹត្តទៅក្រោមអធិបតីភាព លោកឧត្តមសេនីយ៍ទោ ឯម កុសល ស្នងការនគរបាលខេត្ត និងមានការអញ្ជើញចូលរួមពីលោក លោកស្រីស្នងការរង លោកអនុប្រធានផែនការងារ លោកនាយ នាយរងការិយាល័យ លោកនាយផ្នែកនគរបាលបេតិកភ័ណ្ឌ លោកអធិការ អធិការរងស្រុក ក្រុងទាំង១០ លោកនាយប៉ុស្តិ៍នគរបាលរដ្ឋបាលទាំង១០៩ សរុបចំនួន ៣៤១នាក់។
តាមរបាយការណ៍ របស់លោកវរសេនីយ៍ទោ វ៉ា សុធារ៉ា ស្នងការរងទទួលការងារសេនាធិការបានបញ្ជាក់ឱ្យដឹងថា កិច្ចប្រតិបត្តិការប្រចាំខែឧសភា ឆ្នាំ២០១៩ ឆមាសទី១ សភាពការណ៍សន្តិសុខក្នុងភូមិសាស្ត្រខេត្តកំពង់ចាម ពុំមានអ្វីកើតឡើងគួរឱ្យកត់សម្គាល់ឡើយ។
មានប្រសាសន៍ក្នុងកិច្ចប្រជុំនេះ លោកឧត្តមសេនីយ៍ទោ ឯម កុសល ស្នងការនគរបាលខេត្ត បានកោតសរសើរដល់កងកម្លាំងនគរបាលទាំងអស់ដែលបានសហការល្អជាមួយអាជ្ញាធរក្នុងកិច្ចការពារសន្តិសុខ សុវត្ថិភាពជូនប្រជាពលរដ្ឋបានល្អ ពិសេសធានាបានក្នុងកិច្ចការពារសន្តិសុខតាមការិយាល័យបោះឆ្នោតជ្រើសរើសក្រុមប្រឹក្សារាជធានី ខេត្ត ស្រុក ក្រុង ខណ្ឌ អាណត្តិទី៣ ប្រកបដោយក្រមសីលធម៌វិជ្ជាជីវ: នគរបាលជាតិ។
ជាចុងក្រោយលោកឧត្តមសេនីយ៍ស្នងការសំណូមពរឱ្យមន្ត្រីនគរបាលទាំងអស់ធ្វើការផ្សព្វផ្សាយដល់បងប្អូនប្រជាពលរដ្ឋនិងសាច់ញាតិ សូមឱ្យគោរពច្បាប់ចរាចរណ៍ទាំងអស់គ្នាដើម្បីកាត់បន្ថយគ្រោះថ្នាក់ចរាចរណ៍៕
ដោយ ៖ វិបុល
