ខេត្តកំពត ៖ ប្រភពពីប្រជាពលរដ្ឋរស់នៅតំបន់វាលរិញ បានធ្វើការរិៈគន់ និងផ្តល់ព័ត៌មានអោយអង្គភាពគេហទំព័រ www.rskynews.com អោយដឹងថាប្រធានគ្រប់គ្រងស្ថានីយថ្លឹងរថយន្តវាលរិញ បេីកដៃអោយរថយន្តធុនធំបេីកឆ្លងកាត់ដោយមិនបានចូលថ្លឹង យកតែលុយចែកគ្នាដាក់ហោប៉ៅ រាងៗខ្លួន ដោយមិនគិតពីផលប្រយោជន៏សំរាប់សង្គមជាតិឡើយ។
ប្រភពដដែលបានអោយដឹងបន្ថែមថាប្រធានស្ថានីយថ្លឹងរថយន្តវាលរិញ លោក ពេជ្រ រត្ថា កំពុងត្រូវប៉ាន់យកលុយ ដាក់ហោប៉ៅស្ងាត់ៗ តាមរយៈបើកដៃឲ្យឈ្មួញរថយន្ដដឹកទំនិញខ្នាតយក្សជាពិសេសរថយន្តដឹកដីនិងរថយន្តដឹកថ្ម ព្រមទាំងខ្សាច់ ជាដើមនោះ បានធ្វើចរាចរណ៍ ជារាងរាល់យប់ៗដោយរលូន ដែលគេអះអាងថាសុទ្ធតែបានបង់លុយមុនឲ្យមន្ត្រីស្ថានីយ៍ជញ្ជីងថ្លឹងរថយន្តវាលរិញ គឺក្រុមមន្ត្រីអាចរកចំណូលក្រោមតុ សម្រាប់ចែកគ្នាដាក់ហោប៉ៅ ជាពិសេសគឺលោក ពេជ្រ រត្ថា ប្រធានស្ថានីយ៍ជញ្ជីងនេះតែម្ដង។
ប្រជាពលរដ្ឋអ្នករកស៊ីដឹកទំនិញបានសម្ដែងនូវការរិះគន់ចំៗ ដោយពួកគាត់ បាននិយាយថា នៅក្នុងស្ថានីយជញ្ជីងថ្លឹងរថយន្តវាលរិញរបស់ខេត្តកំពត ក្រោមការគ្រប់គ្រងរបស់លោក ពេជ្រ រត្ថា ជាប្រធាននោះបញ្ជាឲ្យកូនចៅ ក្រោមឱវាទ និងបានតម្រូវឲ្យឈ្មួញ និងអ្នករត់ការ រថយន្តដឹកលើសកម្រិតទម្ងន់ មកពីតាមបណ្តាខេត្តនានា នៃប្រទេសកម្ពុជា ឱ្យបង់លុយស្ងាតៗ។
យោងតាមប្រភពខាងលើ បន្តឲ្យដឹងទៀតថាបុគ្គលជាមន្ត្រីខិលខូចទាំងនោះបានណាត់ជាមួយអ្នករត់ការនិងថៅកែរថយន្ត តាមទូរស័ព្ទឲ្យមកឈប់រថយន្តនៅខាងក្រៅ តាមការព្រមព្រៀង ហើយចរចារជាមួយគ្នាជាមុនសិនមុននិងបង់លុយ ឬក៏វេលុយតាមវីនជាដើម ទើបធ្វើការឆ្លងកាត់ជាក្រោយ។
បើតាមប្រភពពីអ្នកបើកបររថយន្តដឹកថ្ម បានឲ្យដឹងថា រថយន្ត របស់ពួកគេភាគច្រើនដឹកលើសទម្ងន់កម្រិតចាប់ពី១៨តោនឡើង គឺមានអ្នករត់ការ ប្រមូលលុយបង់ឲ្យប្រធានស្ថានីយ៍រួចរាល់ទើបពួកគេចេញដំណើរដោយរលូន។ ប្រភពពីអ្នកបើកបររថយន្តបញ្ជាក់ថា ប្រធានជញ្ជីងគាត់កំណត់ឲ្យបង់លុយចំនួនចាប់ពី៥ម៉ឺនរៀល ទៅ១៥ឬ២០ម៉ឺនរៀលក្នុងមួយរថយន្តៗ តាមការដឹកលើសតិចឬលើសច្រើន។
គួរបញ្ជាក់ថា នៅពេលយប់ៗស្ថានីយ៍ជញ្ជីងថ្លឹងរថយន្តវាលរិញនេះភាគច្រើន គេមិនសូវឃើញចាប់រថយន្តដឹកលើសទម្ងន់ កម្រឹតចូលទៅថ្លឹងនៅក្នុងជញ្ជីងនោះទេ ដោយគេកត់សម្គាល់ឃើញតែមនុស្សចូលថ្លឹងទៅវិញបណ្ណោះ។
ឯកឧត្ដម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនថ្លែង នារសៀលថ្ងៃទី២៨ ខែមករា ឆ្នាំ២០១៩ កន្លងទៅក្នុងឱកាសដែល លោកបានអញ្ជើញអធិបតីភាព នៅក្នុងពិធីចុះហត្ថលេខាលើកិច្ចព្រមព្រៀងគម្រោងធ្វើ ឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត) ប្រធានស្ថានីយថ្លឹងរថយន្ត៣កន្លែងផ្សេងគ្នា ត្រូវបានលោកទេសរដ្ឋមន្រ្តី ស៊ុន ចាន់ថុល ស៊ីញ៉េដកចេញ ដោយរកឃើញថាធ្វើការល្មើសច្បាប់ផងដែរ។
គួររំលឹកឡើងវិញថា៖ ថ្មីៗនេះឯកឧត្ដម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា លោកទើបតែចុះហត្ថលេខាដក ប្រធានស្ថានីយថ្លឹងរថយន្ត ៣កន្លែង ដោយសារតែរកឃើញថា ពួកគេបានល្មើសច្បាប់។
ឯកឧត្ដម ទេសរដ្ឋមន្ត្រី រូបនេះបានបន្តថា នេះត្រឹមតែជាដំណាក់ កាលទី១តែប៉ុណ្ណោះ ហើយនឹងបន្តធ្វើជាបន្តបន្ទាប់ទៀត ខណ: ដែលកន្លែងជញ្ជីងខ្លះ រថយន្តមិនបានចូលថ្លឹងផងអោយចេញទៅបាត់។
ឯកឧត្ដម ទេសរដ្ឋមន្ត្រី ស៊ុន ចាន់ថុល បានថ្លែងថា រឿងជញ្ចីងថ្លឹងរថយន្តនេះ សុទ្ធតែជារឿងដែលត្រូវឈឺក្បាលហើយ ដែលបានធ្វើឱ្យមុខមាត់ប្រទេសជាតិ រាជរដ្ឋាភិបាលក៏មិនល្អដែរ ដោយ សារតែកន្លែងជញ្ជីងនេះ ចេះតែមានបញ្ហាមិនចេះឈប់នោះ។
ឯកឧត្ដមបានបញ្ជាក់ថា ចាប់ពីពេលនេះក្រសួងនឹងចាត់វិធានការក្តៅហើយ មិនទុកឱ្យខូចមុខមាត់ប្រទេសជាតិ និងរាជរដ្ឋាភិបាលបន្តទៀតនោះទេ ព្រោះច្រើនដងពេកហើយ កាលពីមុនធ្លាប់ដូរម្តងហើយ ១៥ស្ថានីយបានដូរអស់ម្តងហើយចំពោះស្ថានីយ៍ទាំងនោះ ហើយឯកសារគឺមាននៅក្នុងតុលារការនៅឡើយទេ មន្ត្រីក្រសួងបានដោះដូរចេញម្តងហើយ ដោយដាក់អ្នកថ្មីមកសង្ឃឹមថាល្អ មិនដូចអ្នកចាស់ទៀតទេ ឥលូវដាក់មកដូចអ្នកមុនទៀត។
ឯកឧត្ដមទេសរដ្ឋមន្ត្រី ស៊ុន ចាន់ថុល ក៏បានសំណូមពរឱ្យមន្ត្រីទាំងអស់នោះ ដែលកំពុងបំពេញការងារតាមកន្លែងជញ្ជីងថ្លឹងរថយន្ត ត្រូវធ្វើការឱ្យបានហ្មត់ចត់ ត្រឹមត្រូវ ឡានត្រូវថ្លឹងឱ្យបានពិតប្រាកដ ទម្ងន់លើសត្រូវផាកពិន័យ មិនអាចឱ្យគេឆ្លងកាត់ ដោយមិនថ្លឹង ឫថ្លឹងហើយយកលុយគេ ឱ្យគេទៅមុខទៀតបាននោះទេ រឿងនេះសុំបញ្ចប់ហើយ មន្ត្រីទាំងអស់ត្រូវឈប់បន្តល្មើសសកម្មភាពទាំងនេះទៀត ។
សូមបញ្ជាក់ថា ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន បានប្រកាសចាត់វិធានការមន្ដ្រីតាមស្ថានីយជញ្ជីងណាដែលបណ្ដោយឱ្យមានការដឹកលើសទម្ងន់និងធ្លាប់បានដកមន្ដ្រី១៤នាក់បញ្ជូនទៅតុលាការផ្ដន្ទាទោសផងដែរ។
ឯកឧត្ដមទេសរដ្ឋមន្ត្រី ស៊ុន ចាន់ថុល បានប្រកាសព្រមាន ចាត់ វិធានការផ្លូវច្បាប់ប្រឆាំងនឹងមន្ត្រីជំនាញខាងជញ្ជីងថ្លឹងរថយន្តដែលដឹកទំនិញលើសទម្ងន់ គឺត្រូវប្តឹងទៅតុលាការផ្តន្ទាទោស តាមច្បាប់ ចំពោះមន្ដ្រីដែលប្រព្រឹត្តកំហុសឆ្គងបណ្តោយឲ្យមានរថយន្តដឹក ទំនិញលើសទម្ងន់បន្តបើកបរបំផ្លាញផ្លូវ ហើយត្រូវ ចាប់រថយន្តដឹកទំនិញលើសទម្ងន់ទាំងអស់ មិនថារបស់អ្នកធំ អ្នកមានអំណាចរូបណាទេនោះទេ។
ឯកឧត្ដមទេសរដ្ឋមន្ត្រី បានថ្លែងបែបនេះខណៈដែលឯកឧត្ដមដឹកនាំមន្ដ្រីចុះពិនិត្យការដ្ឋានជួសជុលផ្លូវជាតិលេខ ៤៨ ដែលបំបែកចេញពីផ្លូវជាតិលេខ៤ ឆ្ពោះទៅកាន់ខេត្តកោះកុងកាលពីថ្ងៃទី១៤ ខែតុលា ឆ្នាំ២០១៨កន្លងទៅ។
រាល់សេចក្តីរាយការណ៏ចោទប្រកាន់លើកលោក ពេជ្រ រត្ថា ខាងលើអង្គគេហទំព័រ www.rskynews.com យើងមិនអាចសុំ ការបំភ្លឺពីលោក ពេជ្រ រត្ថា បានឡើយនារសៀលថ្ងៃទី០១ ខែមិថុនា ឆ្នាំ២០១៩ នេះ តែទោះយ៉ាងណាអង្គភាពយើងនិងរងចាំស្វាគមន៏ការបំភ្លឺពីភាគីពាក់ព័ន្ធរហូត និងគ្រប់ពេលវេលា៕
ដោយ ៖ វិបុល
