រាជធានីភ្នំពេញ ៖ ឯកឧត្ដម ឃួង ស្រេង ប្រធាន គណៈបញ្ជាការឯកភាពរាជធានីភ្នំពេញ នៅព្រឹកថ្ងៃទី៣១ ខែឧសភា ឆ្នាំ២០១៩នេះ បានដាក់ចេញជាវិធានការក្ដៅលើការ បង្ក្រាបបទល្មើសនានា និង បង្ក្រាបល្បែង ស៊ីសង គ្រប់ប្រភេទទាំងអស់ នៅទូទាំងខណ្ឌ ទាំង១៤ ក្នុងរាជធានីភ្នំពេញ ដើម្បីឱ្យប្រជាពលរដ្ឋ ទទួល បាន រស់នៅ ដោយភាពកក់ក្តៅ និងសុខសាន្ត ខណៈដែលប្រទេស ជាតិ មានសន្តិភាពពេញបរិបូណ៌។ ការដាក់ចេញនូវវិធានការបែបនេះ បានធ្វើឡើង ក្នុងកិច្ចប្រជុំគណៈបញ្ជាការឯកភាព រាជ ធានីភ្នំពេញ ដោយមានការចូលរួមពីកម្លាំងមានសមត្ថកិច្ចទាំងពីរប្រភេទ លោកអភិបាលខណ្ឌទាំងទាំង១៤ ខណ្ឌ និងមន្ត្រីពាក់ព័ន្ធមួយចំនួនទៀត។
ឯកឧត្ដម ឃួង ស្រេង បានមានប្រសាសន៍ថា ការបង្កើតឱ្យមានកិច្ចប្រជុំគណៈបញ្ជាការឯកភាពនេះ គឺធ្វើឡើងក្នុងគោលបំណង ដើម្បីដាក់ចេញជាផែនការ និងវិធានការផ្សេងទៀត ក្នុងការទប់ស្កាត់ បទល្មើសគ្រប់ប្រភេទ ដើម្បីភាពសុខសាន្ត ជូនប្រជាពលរដ្ឋនៅក្នុងរាជធានីភ្នំពេញ ដូចជា បញ្ហា ពាក់ព័ន្ធ នឹង ការទប់ស្កាត់រថយន្តធំៗចូលក្នុងរាជធានីភ្នំពេញ ការដោះស្រាយបញ្ហាការកកស្ទះចរាចរ វិធានការទៅលើអ្នកបង្កគ្រោះថ្នាក់ចរាចរណ៍ជាដើម។
ពាក់ព័ន្ធ នឹងល្មើសល្បែងស៊ីសងនៅក្នុងរាជធានីភ្នំពេញវិញ ឯកឧត្ដម ឃួង ស្រេង បានដាក់ចេញ ជា វិធានការយ៉ាងម៉ឺងម៉ាត់ផងដែរ ដោយ ឯកឧត្ដម អភិបាល បានបញ្ជាក់ថា នៅក្នុងរាជធានីភ្នំពេញ កើតឡើងនូវល្បែងស៊ីសងគ្រប់ប្រភេទ ដែលនេះជាបញ្ហាមួយក្តៅគគុក។
ដូច្នេះ ឯកឧត្ដមជំរុញ ឱ្យអភិបាលខណ្ឌទាំង១៤ ត្រូវយកចិត្តទុកដាក់ក្នុងការបង្ក្រាបល្បែងស៊ីសង ខុស ច្បាប់ទាំងនេះ ព្រោះល្បែងស៊ីសងខុសច្បាប់ ទាំងនេះ វាជាចំណុចដែលផ្ដើមឱ្យមាន បទល្មើសផ្សេងៗ ធ្វើឱ្យបាត់បង់ស្ថេរភាព នៅក្នុងសង្គមដូចជា អំពើ ឆក់ ប្លន់ ឬលួចជាដើម។ ចំពោះ បញ្ហាគ្រឿងញៀន ក៏ជាបញ្ហាប្រឈមមួយដែលអាជ្ញាធរបាន នឹងកំពុងធ្វើការដោះស្រាយផងដែរ។
នៅក្នុងកិច្ចប្រជុំនោះដែរ ឯកឧត្ដម ឃួង ស្រេង ក៏បានដាក់ចេញនូវវិធានការមួយចំនួនទៀត ដូចជាការរៀបចំសណ្ដាប់ធ្នាប់ចិញ្ចើមផ្លូវសាធារណៈនៅក្នុងមូលដ្ឋានរាជធានីភ្នំពេញ។ ការមាន វិធានការ ទៅលើទូកនេសាទដែលចត យ៉ាង អាណាធិបតេយ្យ នៅតាមដងទន្លេ ពិសេសនៅក្បែរ សណ្ឋាគារសុខា ដែលធ្វើឱ្យបាត់បង់សណ្ដាប់ធ្នាប់ និងប៉ះពាល់ នូវសោភ័ណភាពនៅរាជធានីភ្នំពេញ និងការមានវិធានការទៅលើបែរត្រីមួយចំនួននៅតាមបណ្ដោយដងទន្លេសាបជាដើម ដូច្នេះ អភិបាល រាជធានីភ្នំពេញ បានជំរុញ និង ដាក់ចេញជាផែនការឱ្យអាជ្ញាធរ ខណ្ឌដែលមានដែនដី របស់ខ្លួន នៅតាមបណ្ដោយដងទន្លេសាបនេះ ត្រូវតែមានវិធាន ការទប់ស្កាត់ ដើម្បីធ្វើយ៉ាងណាឱ្យទន្លេមានសោភ័ណ្ឌភាពទាក់ទាញភ្ញៀវទេសចរជាតិ និងអន្តរជាតិ៕
ដោយ ៖ វិបុល
