ខេត្តព្រះសីហនុ ៖ ឯកឧត្តម យន្ត មិន អភិបាលខេត្តព្រះសីហនុ បានជំរុញឲ្យមន្ត្រីនគរបាលសណ្ដាប់ធ្នាប់ ចរាចរណ៍ ត្រូវរួមសហការជាមួយកម្លាំងកងរាជអាវុធហត្ថនិងប្រជាការពារផង ត្រូវធ្វើយ៉ាងណារួមគ្នាដោះស្រាយនិងជួយសម្រួលចរាចរណ៍តាមដងផ្លូវឲ្យបានល្អប្រសើរដើម្បីកុំឲ្យសភាពកកស្ទះនេះកើតមានធ្វើឲ្យប៉ះពាល់ដល់អារម្មណ៍ប្រជាពលរដ្ឋនិងអ្នកធ្វើដំណើរ។
ការជម្រុញបែបនេះបានធ្វើឡើងក្នុងឱកាសនៃកិច្ចប្រជុំបូកសរុបលទ្ធផលការងារប្រចាំខែឧសភា នាព្រឹកព្រឹកថ្ងៃទី 30 ខែឧសភាឆ្នាំ 2019 ។ គួរបញ្ជាក់ថាស្របពេលដែលខេត្តព្រះសីហនុ កំពុងមានការអភិវឌ្ឍន៏លឿន ជីវភាពពលរដ្ឋ មានភាពធូរធារ កំណើនយានយន្ត និងកំណើនមនុស្សចូលមករស់នៅរកស៊ីឬធ្វើការនៅខេត្តនេះក៏មានកាកើនឡើង នាពេលបច្ចុប្បន្ន។ ការកកស្ទះចរាចរណ៍ក៏កំពុងកើតឡើងស្ទើររាល់ថ្ងៃនិងគ្រប់ផ្លូវ។ បញ្ហានេះបានធ្វើអោយមានការរអ៊ូររទាំជាខ្លាំងផងដែរ។
ជាមួយគ្នានេះដែរ រដ្ឋបាលខេត្តព្រះសីហនុក៏បានបង្ហាញនូវយន្តការដោះស្រាយមួយចំនួនដូចជា៖រៀបចំដាក់របាំងផ្លូវនៅតាមដងផ្លូវសំខាន់ៗធ្វើជាផ្លូវឯកទិស ពង្រីកផ្លូវ ឬជួសជុលផ្លូវ ធ្វើផ្លូវវាងក្រុង ជំរុញឲ្យនគរបាលអាជ្ញាធរតាមមូលដ្ឋានជួយមើលការចាប់ឡានចតគ្មានសណ្តាប់ធ្នាប់នៅតាមដងផ្លូវ ដោះស្រាយការយកចិញ្ចើមផ្លូវធ្វើជាកន្លែងលក់ដូរនិងធ្វើអាជីវកម្មផ្សេងៗ រិតបន្តឹងការអនុវត្តវិធានការច្បាប់និងពិន័យចំពោះជនដែលចតយានយន្តអនាធិបតេយ្យនៅតាមដងផ្លូវជាដើម។ ឯកឧត្តម អភិបាលខេត្តព្រះសីហនុគ្រោងនឹងផ្ដល់រថយន្តស្ទូចមួយគ្រឿងទៀតជូនដល់រដ្ឋបាលក្រុងព្រះសីហនុដើម្បីងាយស្រួលក្នុងការលើកស្ទូចរថយន្តដែលចតចោលនៅតាមដងផ្លូវផងដែរ។
ទន្ទឹមនឹងការរីកចំរើនយ៉ាងគំហុកនេះ បញ្ហាប្រឈមជាច្រើនក៏កំពុងកើតឡើងដែលទាំងអស់គ្នាត្រូវរួមគ្នាដោះស្រាយប្រកបដោយការទទួលខុសត្រូវផងដែរ។ លោកអភិបាលបាលខេត្តព្រះសីហនុបាន គូសបញ្ជាក់ថាបញ្ហាប្រឈមទាំងនោះរួមមាន៖ ការកកស្ទះចរាចរណ៍ សន្តិសុខ សណ្តាប់ធ្នាប់ ការចាប់បង្ខាំងមនុស្សជំរិតយកលុយពីសំណាក់ជនជាតិចិនគ្នាគាត់ ,ការគ្រប់គ្រងសំណង់ ការដ្ឋានសំណង់ សំណល់រឹងរាវ បញ្ហាទឹក ភ្លើង ផ្លូវខូច ការរំលោភដីអូរ ការយកចិញ្ចើមផ្លូវធ្វើជាកន្លែងលក់ដូរ ការដោះស្រាយទំនាស់ដីធ្លី បញ្ហាអានាធិបតេយ្យដីធ្លី និងសេវាសាធារណៈមិនទាន់ល្អប្រសើរជាដើម។
ទោះយ៉ាងណាឯកឧត្តម យន្ត មីន បានលើកទឹកចិត្តចំពោះការខិតខំរបស់មន្ត្រីទាំងអស់ក្នុងការបំពេញការងាររបស់ខ្លួនបានទទួលលទ្ធផលគួរកត់សំគាល់។ ជាមួយគ្នានេះដែរ ឯកឧត្ត យន្ត មីន ក៏បានរំលឹកបន្ថែមថាទាក់ទិននឹងបញ្ហាប្រឈមនៅតាមមូលដ្ឋាន អាជ្ញាធរមូលដ្ឋាននៅកៀកកិតជាងគេ។ ឯកឧត្តម រំលឹកថា មន្ត្រីមូលដ្ឋានត្រូវតែមានវិធានការណ៍ទប់ស្កាត់ដោះស្រាយភ្លាមឬរាយការបន្ទាន់តែបើមិនអាចដោះបានត្រូវរាយការណ៍មកថ្នាក់លើដើម្បីមានវិធានការណ៍ដោះស្រាយចៀសវាងចូលរួមឃុបឃិតជាមួយគេដែរ។
ក្រៅពីនេះ ឯកឧត្តម បានរលឹកជាថ្មីទៀតចំពោះមន្ទីររៀបចំដែនដី ត្រូវរៀបចំធ្វើបណ្ណ័កម្មសិទ្ធិដីធ្លីជូនពលរដ្ឋនៅតំបន់ឃ្លាំងលើអោយបានឆាប់រហ័សផងដែរបន្ទាប់ពីតំបន់នេះត្រូវបានរាជរដ្ឋាភិបាលបានកាត់ឆ្វៀលជូនពលរដ្ឋ។
ករណីនេះ ឯកឧត្តម អភិបាលខេត្តបានបញ្ជាក់ថា កន្លងមកលោកបានស្នើមន្ទីររៀបចំដែនដីម្តងហើយតាំងពីលោក នួន ប៉ុក នៅកាន់តំណែងជាប្រធានមន្ទីរ។ បន្ថែមលើនេះ ឯកឧត្តម អភិបាលខេត្ត ក៏បានជម្រាបដល់តំណាងអយ្យការសាលាដំបូងខេត្តព្រះសីហនុ ផងដែរចំពោះការលើកសំណុំរឿងដីធ្លីនៅតំបន់ក្បាលឆាយបន្ទាប់ពីមានបុគ្គលខ្លះបានប្តឹងទាមទារសិទ្ធកាន់កាប់គ្រប់គ្រងដីដោយបានយកបណ្ណ័ចាស់ដែលរដ្ឋាភិបាលបានិរាករណ៍អស់ទៅហើយមកសំអាង។ ឯកឧត្តមបានបញ្ជាក់ថា ដីនៅតំបន់ក្បាលឆាយនេះកន្លងរដ្ឋាភិបាលបាននិរាករណ៍និងដកហូតអស់ហើយតែបានផ្តល់មួយផ្នែកជូនរដ្ឋាបាលខេត្តព្រះសីហនុ ដើម្បីចាត់ចែងដោះដូរជូនពលរដ្ឋដែលបានរស់នៅជាក់ស្តែង។ ករណីនេះ ឯកឧត្តម អភិបាលបានស្នើអោយសាលាដំបូងខេត្តព្រះសីហនុ ជ្រាបផង។
ចំពោះករណីអ្នកយកបណ្ណ័ដែលរដ្ឋបាននិរាករន៍យូរហើយមកប្តឹងទាមទាសិទ្ធគ្រប់គ្រងនោះ ឯកឧត្តម អភិបាលខេត្តព្រះសីហនុ យល់ឃើញថា នេះគ្រាន់តែជាការប្តឹងក្រែងបានវិញខ្លះប៉ុណ្ណោះ តែករណីនេះមិនអាចទេ។
ក្រៅពីបញ្ហាទាំងឡាយដែលត្រូវបានលើកឡើង អភិបាលខេត្តព្រះសីហនុក៏បានជំរុញនិងរំលឹកដល់មន្ត្រីបម្រើសេវាទាំងអស់ត្រូវតែបំពេញការងារឲ្យបានត្រឹមត្រូវ មានតម្លាភាព លឿន ទុកចិត្តបាន ធ្វើយ៉ាងណាបំរើសេវាជូនប្រជាពលរដ្ឋបានល្អប្រសើរកុំឲ្យពលរដ្ឋមានការរអ៊ូរទាំខណៈដែលកន្លងមកមានការលើកឡើងថាសេវាកម្មរបស់មន្ត្រីមួយចំនួនហាក់មានភាពយឺតយ៉ាវ៕
ដោយ ៖ វិបុល
