រាជធានីភ្នំពេញ ៖ នៅល្ងាចថ្ងៃទី២៩ ខែឧសភា ឆ្នាំ២០១៩នេះ កម្លាំងសមត្ថកិច្ចនៃប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ បានឃាត់ខ្លួនជនជាតិចិនម្នាក់ទៀត នៅអាកាសយានដ្ឋានអន្តរជាតិភ្នំពេញ ដោយដកហូតលុយ៧២ដុំ ស្មើនឹង ៨៥៥,០០០ដុល្លារអាមេរិក ដោយលុយនោះ បាននាំចូលពីទីក្រុងហុងកុង ។
យោងតាមកំណត់ហេតុប្រគល់ និងទទួល នៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ រវាងថ្នាក់ដឹកនាំនៃអគ្គនា យកដ្ឋានអន្តោប្រវេសន៍ និងមន្ត្រីប្រចាំទ្វារអាកាសយានដ្ឋានអន្តរ ជាតិភ្នំពេញ បានផ្អាកដំណើរជនជាតិចិនម្នាក់ ដែលមាន ឈ្មោះថា LIAO JINGQING កើតថ្ងៃទី១៦ ខែវិច្ឆិកា ឆ្នា១៩៧១ កាន់លិខិត ឆ្លងដែនលេខ EG0115690 ពាក់ព័ន្ធករណីនាំប្រាក់ចំនួន ៧២ដុំ ស្មើនិងចំនួន ៨៥៥,០០០ដុល្លារអាមេរិក ពីទីក្រុងហុងកុង ចូលមកប្រទេសកម្ពុជា ដោយពុំមានបញ្ជាក់ពីប្រភពច្បាស់លាស់។
សមត្ថិកិច្ចបានសាកសួរបឋម លើជនសង្ស័យបបានសារភាពថា ខ្លួន មានមុខរបរនៅប្រទេសចិន ជាអ្នកធ្វើការផ្នែកដេគ័រ នៅសណ្ឋាគារ ហើយបានចូលមកប្រទេស កម្ពុជាចំនួន០២លើក ក្នុងនោះលើកទី១ កាលពីថ្ងៃទី២៦ ខែឧសភា ឆ្នាំ២០១៩ និងលើកចុងក្រោយ ថ្ងៃទី២៩ ខែឧសភា ឆ្នាំ២០១៩នេះ ក៏ត្រូវសមត្ថកិច្ចឃាត់ខ្លួនតែម្តង។
នៅចំពោះមុខសមត្ថកិច្ច ជនសង្ស័យរូបនេះ បានបញ្ជាក់ប្រាប់ថា គោលបំណងនៃការនាំប្រាក់មកកម្ពុជា ដើម្បីយកមកធ្វើដើមលើក ផ្នែកដេគ័រ ជាមួយប្អូនជីដូនមួយឈ្មោះ LIAO YUPENG (ប៉ុន្តែមិនស្គាល់ឈ្មោះក្រុមហ៊ុន)។ ដោយប្រាក់ខាងលើបានបើកពីធនាគារឈ្មោះឡុង យៀក ក្នុងទីក្រុងហុងកុង។
យោងតាមកំណត់ហេតុប្រគល់ និងទទួល របស់សមត្ថកិច្ច បានបង្ហាញថា ភស្តុតាងដែលត្រូវបានដកហូតរួមមាន ៖ លិខិតឆ្លងដែនចំនួន១ក្បាល, ទូរស័ព្ទដៃ oppo ចំនួន០១គ្រឿង ,ប្រាក់៧២ដុំ= ៨៥៥,០០០ដុល្លារអាមេរិក ។ដោយឡែកជនសង្ស័យត្រូវបានឃាត់ខ្លួនដើម្បីសាកសួរ និងអនុវត្តនីតិវិធីបន្ត។
ដោយ ៖ វិបុល
