រាជធានីភ្នំពេញ ៖ នៅព្រឹកថ្ងៃទី២៧ ខែឧសភា ឆ្នាំ២០១៩នេះ ឯកឧត្តម នាយឧត្តមសេនីយ៍សន្តិ បណ្ឌិត នេត សាវឿន អគ្គស្នងការនគរបាលជាតិ បានអញ្ជើញជាអធិបតីភាព ក្នុងកិច្ចប្រជុំការងារព្រំដែននគរបាលជាតិ ដោយមានការអញ្ជើញចូលរួមពី មន្ត្រីជាន់ខ្ពស់ក្រសួងមហាផ្ទៃ និង មន្ត្រីជាន់ខ្ពស់នគរបាលជាតិច្រើនរូបទៀតដែលជាប់ពាក់ព័ន្ធ ព្រមទាំងមានការអញ្ចើញចូលរួមពី ឯកឧត្តមសំរិទ្ធ ឌី រដ្ឋលេខាធិការក្រសួងមហាផ្ទៃ និងឯកឧត្តម ស៊ឹម សុផល អនុរដ្ឋលេខាធិការក្រសួងមហាផ្ទៃ ផងដែរ។
ក្នុងកិច្ចប្រជុំនោះ ឯកឧត្តមរដ្ឋលេខាធិការ និងអនុរដ្ឋលេខាធិការក្រសួងមហាផ្ទៃបានលើកឡើងជុំវិញសភាពការណ៍សន្តិសុខ និងស្ថានការណ៍តាមបណ្តោយព្រំដែន ដែលគ្រប់គ្រងដោយកងកម្លាំងនគរបាលព្រំដែននៃប្រទេសកម្ពុជា និងបានលើកឡើងការវាយតម្លៃលើស្ថានភាពរស់នៅ និងការងាររបស់កងកម្លាំងនគរបាលព្រំដែន និង ការស្នើលើចំណុចសំខាន់មួយចំនួនទៀត ទាក់ទងនឹងការពង្រឹងសមត្ថភាពកងកម្លាំង និងការធ្វើឲ្យកាន់តែប្រសើរលើការអនុវត្តការងាររបស់កងកម្លាំងនគរបាលនៅតាមបណ្តោយព្រំដែន។
ឯកឧត្តម នាយឧត្តមសេនីយ៍សន្តិ បណ្ឌិត នេត សាវឿន ក្រោយការតាមដានយ៉ាងយកចិត្តទុកដាក់ នូវប្រសាសន៍លើកឡើងរបស់រដ្ឋលេខាធិការ និងអនុរដ្ឋលេខាធិការក្រសួងមហាផ្ទៃ បានថ្លែងគាំទ្ររាល់ចំណុចដែលបានលើកឡើង និងបានគាំទ្រការស្នើមួយចំនួនទៀតរបស់មន្ត្រីជាន់ខ្ពស់ក្រសួងមហាផ្ទៃ សំដៅ ការធ្វើឲ្យកាន់តែប្រសើរលើ ការអនុវត្តការងាររបស់កងកម្លាំងនគរបាលនៅតាមបណ្តោយព្រំដែន។
ឯកឧត្តម នាយឧត្តមសេនីយ៍ សន្តិ បណ្ឌិត នេត សាវឿន បានគូសបញ្ជាក់លើចំណុច៣សំខាន់ ទាក់ទងនឹងកិច្ចការព្រំដែនមានដូចជា ៖ ១. កត្តារចនាសម្ព័ន្ធនៃការដឹកនាំ និងគ្រប់គ្រងកម្លាំងនគរបាលការពារព្រំដែន ២. យន្តការថ្នាក់ ជាតិដែលគ្រប់គ្រងលើកិច្ចការព្រំដែន និង ៣. គឺទិសដៅឆ្នាំ២០១៩របស់អគ្គស្នងការដ្ឋាននគរបាលជាតិ ដែលត្រូវជួយឧបត្ថម្ភលើកម្លាំងនគរបាលការពារព្រំដែន ក្នុងនោះរួមមានការគាំទ្រលើសំណើ បន្ថែមនិងបំពេញកម្លាំង, ការហ្វឹកហាត់កម្លាំងឆ្នាំ២០១៩ និងជម្រុញការឧបត្ថម្ភនូវសម្ភារៈរដ្ឋ និងឯកជនផងទៀត។
ឯកឧត្តមអគ្គស្នងការនគរបាលជាតិ បានមានប្រសាសន៍ដាស់ តឿនមន្ត្រីក្រោមឱវាទ ត្រូវពង្រឹងបន្ថែមនូវកិច្ចការងារជាពិសេសរាល់ព័ត៌មានដែលជាប់ទាក់ទងនឹងស្ថានការណ៍ព្រំដែន ដោយត្រូវផ្តល់របាយការណ៍ជាទៀងទាត់ដល់មន្ត្រីថ្នាក់លើ ដើម្បីងាយតាមដាននិងការវាយតម្លៃលើសភាពការណ៍ព្រំដែនអោយបានជាប់ជាប្រចាំ ផងដែរ៕
ប្រភព គេហទំព័រ ស្នងការនគរបាលជាតិ
