ខេត្តរតនគិរី ៖ សេចក្ដីរាយការណ៍ បានឲ្យដឹងថា មេឈ្មួញរកស៊ីឈើខុសច្បាប់ ឈ្មោះ នី កាចាញ បាននាំគ្រឿងចក្រ និងគៀង គរបក្ខពួក ចូលទៅក្នុងតំបន់ ព្រៃសហគមន៍ពីរកន្លែង ស្ថិតនៅស្រុកអណ្ដូងមាស ខេត្តរតនគិរី ដើម្បីប្រមូលយកឈើទៅលក់ឲ្យឈ្មួញវៀតណាម។
ប្រជាសហគមន៍ការពារព្រៃឈើ បានបញ្ជាក់យ៉ាងច្បាស់ថា សកម្មភាពកាប់ឈើដោយខុសច្បាប់នេះ គឺស្ថិតនៅក្បែរភូមិបាដល ឃុំញ៉ាង ស្រុកអណ្តូងមាស ខេត្តរតនគិរី ដោយប្រើរថយន្តបង្កុងដឹកឈើហ៊ុបមូល ទើបតែកាប់បានថ្មីៗ ស្រស់ៗ ពីដែនព្រៃឈើសហគមន៍ ដោយមានឈ្មោះ ប៉ិច ជាអ្នកផ្ដល់លុយរាប់ម៉ឺនដុល្លារ ទៅឲ្យប្រធានសហគមន៍ ឈ្មោះ ចំ ស្មើល ដើម្បីបើកដៃឲ្យមេឈ្មួញឈើទុច្ចរិតទាំងនេះ អាចដឹកនាំគ្រឿងចក្រ និងកម្មករចូលទៅកាប់បំផ្លាញព្រៃឈើសហគមន៍ទាំងបំពានច្បាប់។ កន្លងមកមេខ្លោងឈ្មួញឈើដ៏ល្បី និងជាអតីតមេភូមិ ឈ្មោះ នីកាចាញ ក៏ធ្លាប់បានជួលកម្មករសម្រុកលួចកាប់ឈើយ៉ាងកក្រើក នៅក្បែរភូមិភិ ឃុំសេសាន ស្រុកអូរយ៉ាដាវ រហូតដល់បង្គោល១៤ និង១៥ ក្នុងឃុំញ៉ាង ស្រុកអណ្តូងមាស ដោយអូសឈើហ៊ុប មូលតាមរថយន្តកែច្នៃ ចូលក្នុងទឹកទន្លេសេសាន រួចបណ្តែតជាក្បូន ឆ្លងដែនចូលទៅក្នុងទឹកដីវៀតណាម ដូចហែកឋិន ប៉ុន្តែគ្មានមន្ត្រី និងសមត្ថកិច្ចណាហ៊ានក្អកជាមួយមេឈ្មួញរូបនេះឡើយ។
ប្រភពដដែល បានបន្ថែមទៀតថា កន្លងមក ឈ្មួញឈើខុសច្បាប់ឈ្មោះ នី កាចាញ បានធ្វើសកម្មភាពដឹកជញ្ជូនឈើប្រណីតជាទ្រង់ទ្រាយធំ ចេញពីស្រុកអូរជុំ ឆ្លងកាត់ទីរួមក្រុងបាលុង ឆ្ពោះទៅកាន់ច្រកទ្វារព្រំដែនអន្តរជាតិអូរយ៉ាដាវ ដោយដឹកតាមរថយន្តយីឌុបភ្លៅ៦ ប៉ុន្តែ ជាបន្តបន្ទាប់ទៀតរហូតសព្វថ្ងៃ ឈ្មួញរូបនេះ បានប្តូររូបភាពដឹកជញ្ជូនឈើប្រណីតដោយខុសច្បាប់តាមរថយន្តប្រភេទទេសចរណ៍វិញ ដើម្បីចូលទៅលក់ក្នុងទឹកដីវៀតណាម តាមច្រកទ្វារព្រំដែនអន្តរជាតិអូរយ៉ាដាវ ដោយមានការឃុបឃិតពីសមត្ថកិច្ច និងអាជ្ញាធរខេត្តរតនគិរី។
ប្រជាពលរដ្ឋ បាននិយាយថាលោក ថងសាវុន អភិបាលខេត្តរតនគិរី ហាក់បីដូចមិនទាន់មានការទទួលខុសត្រូវនៅឡើយក្នុងដែនរបស់ខ្លួនគ្រប់គ្រង ខណៈបទល្មើសកាប់ផ្តួលបំផ្លាញព្រៃឈើ និងដឹកជញ្ជូនឆ្លងដែនទៅប្រទេសវៀតណាម បានកក្រើកឡើងវិញ និងជាប្រភេទឈើហ៊ុបកាប់ថ្មីៗ ប្រើប្រាស់ឡានបាកុង ធ្វើជាមធ្យោបាយដ៏គគ្រឹកគ្រេងនៅស្រុកអណ្តូងមាស ខេត្តរតនគិរី ប្រព្រឹត្តដោយ ក្រុមឈ្មួញដុះស្លែរមុខដដែលៗ គ្មានការរាងចាល។
ប្រជាពលរដ្ឋ ចាំមើលថា តើលោក ថងសាវុន អភិបាលខេត្តរតនគិរី ហ៊ានបង្ក្រាបមេឈ្មួញរកស៊ីឈើខុសច្បាប់ ឈ្មោះ នីកាចាញ ដែរឫទេ…? ខណៈរូបគេបាននាំគ្រឿងចក្រ និងគៀងគរបក្ខពួក ដៃជើងរបស់ខ្លួន តាមជំនាញ មានអ្នកមើលព្រៃ អ្នកឆ្ការព្រៃ អ្នកអារផ្តួលរលំឈើ អ្នកអូសឈើ អ្នកដឹកឈើ អ្នកប្រមូលឈើ ចូលទៅក្នុងតំបន់ ព្រៃសហគមន៍ ស្ថិតនៅស្រុកអណ្ដូងមាស ខេត្តរតនគិរី ដើម្បីប្រមូលយកឈើដឹកជញ្ជូនឆ្លងដែនទៅលក់ឲ្យឈ្មួញវៀតណាម។
រាល់ការចោទប្រកាន់ខាងលើអង្គភាពគេហទំព័រ www. rskynews.com យើងមិនអាចសុំការបំភ្លឺបាននៅឡើយនៅ ពេលនេះ ប៉ុន្ដែដើម្បីរក្សាសេចក្តីថ្លៃថ្នូយើងនឹងរងចាំការបំភ្លឺពីលោក អភិបាល ថង សាវុន និងលោក នី កាចាញ គ្រប់ពេល វេលា៕
ដោយ ៖ វិបុល
