រាជធានីភ្នំពេញ ៖ នៅថ្ងៃទី២៤ ខែឧសភា ឆ្នាំ២០១៩ ប្រធានក្រុមការងារចុះជួយខណ្ឌមានជ័យ លោក ប៉ា សុជាតិវង្ស បានដឹកនាំសមាជិកបក្សទាំង ០៧សង្កាត់ សរុបទាំងអស់ចំនួន ៦០០នាក់ បិទយុទ្ធនាការឃោសនាបោះឆ្នោតក្រុមប្រឹក្សាស្រុក/ខណ្ឌ រាជធានី/ខេត្ត និងផ្តាំឲ្យសមាជិកទាំងអស់រៀបចំខ្លួន ឲ្យបានរួចរាល់ចូលរួមការបោះឆ្នោត ជ្រើសរើសក្រុមប្រឹក្សានាថ្ងៃទី២៦ ខែឧសភា ឆ្នាំ២០១៩ ខាងមុខនេះ។
ពិធីជួបសំណេះសំណាលជាមួយ សមាជិកសមាជិកាបក្សទាំង៧សង្កាត់ បានរៀបចំនៅមជ្ឍមណ្ឌល មង្គលឧត្ដម ផ្លូវ៣៧១ ភូមិក្បាលទំនប់២ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ។
ក្នុងពិធីនេះលោក ប៉ា សុជាតិវង្ស បានថ្លែងថា បេក្ខជនក្រុមប្រឹក្សាដែលជាអង្គបោះឆ្នោត ត្រូវតែខុសត្រូវគ្រប់គ្រងសតិ អារម្មណ៍ វត្តមានថែទាំសុខភាព ពង្រឹងសាមគ្គីភាព ឯកភាពផ្ទៃក្នុងឲ្យបានរឹងមាំ ហ្មត់ចត់ ដើម្បីពង្រឹងការចងចាំថែមទៀត អំពីនីតិវិធីបោះឆ្នោត និងត្រូវគោរពតាមការណែនាំរបស់គណៈ កម្មាធិការជាតិរៀបចំការបោះឆ្នោត។ នៅក្នុងអង្គពិធីលោក ប៉ា សុជាតិវង្ស បានបញ្ជាក់បន្ថែមថា អង្គបោះឆ្នោតទាំងអស់ត្រូវតៀមខ្លួន ដើម្បីចូលរួមបោះឆ្នោតជ្រើសរើសក្រុមប្រឹក្សា រាជធានី ខណ្ឌ អាណត្តិទី៣ នាថ្ងៃអាទិត្យទី២៦ ខែឧសភា ឆ្នាំ២០១៩។
វត្តមានចូលរួមក្នុងពិធីរួមមាន ៖ លោក ពេជ្រ កែវមុនី ប្រធានក្រុមការងារចុះជួយសង្កាត់ស្ទឹងមានជ័យទី២, លោកស្រី ទាវ ធីតា អនុប្រធានក្រុមការងារចុះជួយសង្កាត់ស្ទឹងមានជ័យទី២ និង ចៅសង្កាត់ទាំង០៧រួមមាន ចៅចាក់អង្រែលើ ឈ្មោះ កែវ សាវឿន, ចៅសង្កាត់ចាក់អង្រែក្រោម ឈ្មោះ ជា សុខៃ, ចៅសង្កាត់បឹងទំពុនទី១ ឈ្មោះ លុក ជ័យ, ចៅសង្កាត់បឹងទំពុនទី២ ឈ្មោះ សួស សារិន, ចៅសង្កាត់ស្ទឹងមានជ័យ១ ឈ្មោះ សេង សាញ់, ចៅសង្កាត់ស្ទឹងមានជ័យទី២ ទូច សំអុល, ចៅសង្កាត់ស្ទឹងមានជ័យទី៣ អ៊ុ ហឿង ព្រមទាំងសមាជិកសមាជិកាចំនួន៦០០រូបទៀតផងដែរ។
លោក លោក ប៉ា សុជាតិវង្ស បានធ្វើណែនាំ ផ្ដាំផ្ញើសួរសុខទុក្ខ និងជូនពរពីសម្ដេចតេជោ ហ៊ុន សែន ប្រធានគណបក្ស, សម្ដេចពញាចក្រី ហេង សំរិន ប្រធានកិត្តិយសគណបក្ស, សម្តេចក្រឡាហោម ស ខេង និងសម្ដេចវិបុលសេនាភក្ដី សាយ ឈុំ អនុប្រធានគណបក្សផងដែរ។
បន្ថែមលើនេះ លោកបានថ្លែងកោតសសើរ និងវាយតំលៃខ្ពស់ចំពោះគណៈកម្មាធិការបក្សខណ្ឌ សង្កាត់ កងកម្លាំងប្រដាប់អាវុធ នគរបាល កងរាជអាវុធហត្ថ យោធា អាជ្ញាធរដែនដី សមត្ថកិច្ចគ្រប់ថ្នាក់ បានរួមចំណែកអនុវត្តគោលនយោបាយបក្ស និងរាជរដ្ឋាភិបាល ដឹកនាំដោយសម្តេចតេជោ ហ៊ុន សែន ធ្វើឲ្យបរិយាកាស នៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខណ្ឌមានជ័យ រាជធានី /ខេត្ត ខណ្ឌ/ស្រុក/ក្រុង អាណត្តិទី៣ ឆ្នាំ២០១៩ ប្រព្រឹត្តិទៅដោយសេរី និងមានសុវត្ថិភាព។
ជាមួយគ្នានេះដែរ លោកក៏បានអំពាវនាវ ដល់អាជ្ញាធរដែនដី សមត្ថកិច្ចគ្រប់ថ្នាក់ ត្រូវអនុវត្តន៍ផែនការការពារសន្តិសុខ សណ្តាប់ធ្នាប់ ក្នុងពេលបោះឆ្នោត ក្រុមប្រឹក្សាខណ្ឌមានជ័យ បានល្អធានាបាននូវការបោះឆ្នោតដោយសេរី និងយុត្តិធម៌ គ្មានអំពើហិង្សា ដើម្បីបន្តសន្តិភាព ការអភិវឌ្ឍន៏ និងភាពសុខសាន្ត ជូនប្រជាលរដ្ឋ និងទទួលបានការគាំទ្រ កាន់តែច្រើន ពីសាធារណមតិជាតិ និងអន្តរជាតិ។
ក្រោពីបានជួបសំណេះសំណាល ជាមួយសមាជិកសមាជិកាបក្សរួចមក លោក ប៉ា សុជាតិវង្ស ក៏បានចាប់ផ្ដើមហែរឃោសនារកសម្លេងគាំទ្រ ក្នុងការបោះឆ្នោតក្រុមប្រឹក្សា រាជធានី និងខណ្ឌ គឺចាប់ផ្តើមចេញពីមជ្ឍមណ្ឌល មង្គលឧត្ដម តាមផ្លូវ៣៧១ដល់គល់ស្ពានដែក, ពីត្បូងទៅជើង ដល់ស្ពានអាកាសស្ទឹងមានជយ័ បត់ ស្ដាំតាមផ្លវ៣៧១ ដល់ស្តុបផ្លូវ៦០ម៉ែត្រ បត់ស្ដាំតាមផ្លូវ៦០ម៉ែត្រ ដល់មុខក្រុមហ៊ុនម៉ែកស៊ីដេស បត់ឆ្វេងចូលតាមផ្លូវលោកតា ហ៊ុន នាង ( ផ្លូវ៣០ម៉ែត)ក្នុងសង្កាត់ចាក់អង្រែលើ និង សង្កាត់ ចាក់ អង្រែក្រោម ក៏បំបែកទៅតាមសង្កាត់រៀងៗខ្លួនទាំង០៧សង្កាត់៕
ដោយ ៖ វិបុល 
