រាជធានីភ្នំពេញ ៖ នាព្រឹកថ្ងៃ អាទិត្យ ១រោច ខែ ពិសាខ ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី១៩ ខែឧសភា ឆ្នាំ២០១៩ ស្ថិត នៅទីស្នាក់ការគណបក្សប្រជាជនសង្កាត់ព្រែកកំពឹស ឯកឧត្កម រ័ត្ន ស្រ៊ាង ប្រធានក្រុមការងារគណបក្សប្រជាជនកម្ពុជា ចុះជួយសង្កាត់ព្រែកកំពឹស ខណ្ឌដង្កោ រាជធានីភ្នំពេញ បានអញ្ជើញជាអធិបតីក្នុងពិធីសំណេះសំណាល ជាមួយមន្ត្រីមូលដ្ឋានរបស់គណបក្សប្រជាជនកម្ពុជា។
ក្នុងពិធីនោះក៏មានការចូលរួមពី លោក អ៊ុយ សុន អនុប្រធានក្រុមការងារ និងជាបេក្ខភាពក្រុមប្រឹក្សាខណ្ឌ ព្រមទាំងលោក លោកស្រីជាមន្ត្រីក្រុមការងារ ចុះជួយមូលដ្ឋានផងដែរ ដែលវត្តមានសមាជិកចូលរួម សរុបមានចំនួន៥០៦នាក់។
ក្រៅពីការសំណេះសំណាលសួរសុខទុក្ខសមាជិកអង្គពិធី ឯកឧត្តមគណៈធិបតី បានលើកឡើងពីគោលនយោបាយ របស់គណបក្សប្រជាជនកម្ពុជា និងផលប្រយោជន៍ដែលទទួលបានពីនយោបាយឈ្នះៗ បង្កើតឡើងដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺបាននាំមកនូវសន្តិភាពពេញលេញ ជូនជាតិ និងមានការអភិវឌ្ឍន៍លើគ្រប់វិស័យ ។
បន្ថែមលើពិធីសំណេះសំណាល ឯកឧត្តម រ័ត្ន ស្រ៊ាង បានអះអាងបញ្ជាក់ថាគ្រាន់តែសង្កាត់ព្រែកកំពឹសមួយ ដើមឡើយ គឺជាឃុំរបស់ស្រុកកណ្តាលស្ទឹង ខេត្តកណ្តាល ហើយត្រូវបានកាត់មកជារដ្ឋបាលសង្កាត់ ក្នុងខណ្ឌដង្កោ រាជធានីភ្នំពេញ គឺបានទទួលការអភិវឌ្ឍន៍យ៉ាងច្រើនរាប់មិនអស់ទាំង រួមមាន ៖ ផ្លូវ ចាក់កៅស៊ូ ផ្លូវចាក់បេតុង ជាច្រើនខ្សែ ប្រឡាយទឹក ប្រព័ន្ធលូរំដោះទឹក ប្រព័ន្ធទឹស្អាត ប្រព័ន្ធភ្លើងអគ្គិសនី រមណីដ្ឋានកំសាន្ត បុរីផ្ទះថ្ម ភោជនីយ ដ្ឋាន និងហាងទំនើបៗ។
អាស្រ័យហេតុនេះសូមមន្ត្រីមូលដ្ឋានទាំងអស់ក្នុងសង្កាត់ព្រែកកំពឹស យកចិត្តទុកដាក់ផ្សព្វផ្សាយឲ្យប្រជាពលរដ្ឋ បានយល់ច្បាស់អំពីការអភិវឌ្ឍន៍ជាក់ស្តែង មើលឃើញផ្ទាល់ភ្នែក ដែលកើតចេញពីការខិតខំប្រឹងប្រែងរបស់រាជរដ្ឋាភិបាល ដឹកនាំដោយសម្តេចតេជោ ហ៊ុន សែន និងធ្វើយ៉ាងណាពន្យល់ឲ្យប្រជាពលរដ្ឋ កុំជឿលើការភូតភរ ញុះញង់បោកប្រាស់របស់ទណ្ឌិត សម រង្ស៊ី ដែលជាក្រុមឧទ្ទាមក្រៅវច្បាប់ និងធ្វើការទប់ស្កាត់ ព្រមទាំងវាយបកចំពោះល្បិចកលដ៏ខ្មៅកខ្វក់ពិសពុលឲ្យបានទាន់ពេលវេលា៕
ដោយ ៖ វិបុល
