លោកឧត្តមសេនីយន៍ អ៊ុំ អមរា ស្នងការរងទទួល ផ្នែកប្រឆាំងគ្រឿងញៀន បានឲ្យដឹងនៅល្ងាច ថ្ងៃទី១៩ ខែឧសភា ឆ្នាំ ២០១៩នេះថា ប្រតិបត្តិការបង្ក្រាបនេះ ដឹកនាំដោយលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាបដែលធ្វើប្រតិបត្តការឆែកឆេរនៅចំណុចមុខវត្តព្រះឥន្ទកោសីយ៍ស្ថិតនៅភូមិទ្រាំង សង្កាត់ស្លក្រាម ឃាត់ខ្លួនបានជនសង្ស័យម្នាក់ ដោយម្នាក់ទៀតបានគេចខ្លួន ហើយកំលាំងជំនាញបានបន្តតាមនិតីវិធី ចាប់ជនសង្ស័យជាបក្សពួកម្នាក់ទៀតដោយរត់ទៅសង្ងំពូននៅ ក្នុងបន្ទប់ជួលមួយក្បែរផ្ទះម្តាយក្មេកស្ថិតនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។
បន្ទាប់ពីបានឃាត់ខ្លួនកាលពីថ្ងៃទី១៦ ខែឧសភាកន្លងទៅនេះ នៅព្រឹកថ្ងៃទី១៩ ខែឧសភាជនសង្ស័យទាំង២នាក់ ៖ ទី ១៖ឈ្មោះ ស្រឿន វីរៈ ឆ្នាំកំណើត១៩៩៣ និង ទី២៖ឈ្មោះ ដួង សំអឿន ហៅម៉ាប់ ឆ្នាំកំណើត១៩៩៤ ត្រូវបានបញ្ជូនទៅកាន់សាលាដំបូងខេត្តសៀមរាប ដើម្បីចាត់វិធានការតាមនិតីវិធីផ្លូវច្បាប់។
ក្នុងប្រតិបត្តិការដ៏ស្មុគស្មាញ នេះកម្លាំងសមត្ថកិច្ចយើងបានដកហូត ម្សៅមេតំហ្វេតាមីន ប្រភេទទឹកកកចំនួន១២កញ្ចប់, ជញ្ជីងថ្លឹងគ្រឿងញៀនចំនួន០១គ្រឿង, សម្ភារវេចខ្ចប់គ្រឿងញៀនមួយចំនួន និងទូរស័ព្ទដៃ ចំនួន០២គ្រឿង៕
ដោយ ៖ សិរីបុត្រ
