ក្រុងប៉ោយប៉ែត ៖ វេលាម៉ោង៨ព្រឹក ថ្ងៃទី១៨ ខែឧសភា ឆ្នាំ២០១៩ត្រូវនឹងថ្ងៃសៅរ៍ ១៥កើត ខែពិសាខ ព.ស២៥៦៣ ត្រូវនឹងថ្ងៃដែលប្រទេសកម្ពុជាប្រារព្ធពិធីបុណ្យវិសាខបូជានៅទូទាំងប្រទេសដោយនៅក្នុងទឹកដីអាណាចក្រក្រុងប៉ោយប៉ែតបានប្រារព្ធពិធីបុណ្យវិសាខបូជា នៅវត្តឃោសត្ថារាមហៅវត្តស្រះត្រាច ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រោមអធិបភាពដ៏ខ្ពង់ខ្ពស់របស់លោក គាត ហ៊ុល អភិបាលក្រុងប៉ោយប៉ែត និង ព្រះតេជគុណ ប៉ុក ចំរើន ព្រះគ្រូអនុគណក្រុងប៉ោយប៉ែត។ នៅក្នុងពិធីនេះផងដែល ក៏មានការចូលរួមពីលោក ម៉ែន សោភ័ណ អភិបាលរងក្រុងប៉ោយប៉ែត និង មន្ត្រីសាលាក្រុងជាច្រើនអ្នក ព្រមទាំងលោកចៅសង្កាត់ ជំទប់សង្កាត់ និង មន្ត្រីសាលាសង្កាត់ និងលោកមេភូមិ ព្រមទាំងប្រជាការពារ បងប្អូនប្រជាពលរដ្ឋយ៉ាងច្រើនកុះករ ។
សូមបញ្ជាក់ថា លោក គាត ហ៊ុល អតីតចៅសង្កាត់ផ្សារកណ្ដាល ជាបុគ្គលមួយរូបដែលត្រូវបានប្រជាជនគាំទ្រដល់រូបលោក ដោយសារតែលោកជាចៅសង្កាត់ថាហើយធ្វើ ព្រមជាមួយការខិតខំប្រឹងប្រែងក្នុងការអភិវឌ្ឍន៍ មូលដ្ឋាន និងការយកចិត្តទុកដាក់ ដល់ជីវភាពរស់នៅ របស់ប្រជាពលរដ្ឋ ដែលធ្វើអោយរូបលោក ត្រូវបានប្រជាពលរដ្ឋ បោះឆ្នោតជូនលោក ធ្វើជាប្រធានក្រុមប្រឹក្សាសង្កាត់ផ្សារកណ្ដាល រហូតដល់លោក ត្រូវបានប្រមុខរាជរដ្ឋាភិបាលកម្ពុជា សម្រេចតែងតាំងលោក ជាអភិបាល នៃ គណៈអភិបាលក្រុងប៉ោយប៉ែត ។
ក្រោយពីបានឡើងកាន់ដំណែង ជា អភិបាល ក្រុងប៉ោយប៉ែត រូបលោកបានចំណាយពេលវេលា យ៉ាងច្រើន ដើម្បីរៀបចំសេរីណាយ៉ូ ក្នុងការអភិវឌ្ឍន៍ក្រុងប៉ោយប៉ែត ដូចភ្លៀងរលឹម ដែលធ្វើអោយ មហាជន តាមតុគុយទាវ នៅពេលព្រឹកៗឡើងនាំគ្នានិយាយសសើរ គ្រប់ៗគ្នា ថាលោក ជាមនុស្សអភិវឌ្ឍន៍ មិនចេះនឿយណាយឡើយ។
នៅក្នុងទឹកមុខប្រកបដោយ ប្រជាប្រិយភាព លោក គាត ហ៊ុល បានមានប្រសាសន៍នៅ ក្នុងអង្គពិធីបុណ្យវិសាខបូជា ថា ថ្ងៃនេះរូបលោក មានសេចក្តីសោមនស្សរីករាយ យ៉ាងក្រៃលែង ដែលបានចូលរួមនៅក្នុងពិធីបុណ្យតាមបែប ប្រពៃណីខ្មែរយើង ដែលដូនតាយើងបានបន្សល់ ទុកនូវពិធីបុណ្យដ៏យូរលង់ របស់ជាតិខ្មែរយើង តាំងពីបូរាណរៀងមក ហើយវិស័យព្រះពុទ្ធសាសនា ជាផ្នែកមួយយ៉ាងសំខាន់ ក្នុងការចូលរួម អភិវឌ្ឍន៍ប្រទេសជាតិរបស់យើង៕
ដោយ ៖ វិបុល
