ខេត្តព្រះសីហនុ ៖ នៅថ្ងៃទី ១៧ ខែឧសភាឆ្នាំ ២០១៩ ក្រុមការងារចម្រុះដឹកនាំដោយលោក លី ចិត្តនិយម ប្រធានការិយាល័យគ្រប់គ្រងការអភិវឌ្ឍ និងសំណង់សាលាខេត្តព្រះសីហនុ បានចុះណែនាំម្ចាស់ការដ្ឋានសំណង់ របស់អ្នកវិនិយោគបរទេស ដែលសង់រំលោភលើចំណីផ្លូវនៅកណ្ដាលទីក្រុងព្រះសីហនុ។
ការដ្ឋានសំណង់នេះ មន្ត្រីសាលាក្រុងព្រះសីហនុ បានចុះណែនាំចំនួន៤ដងមកហើយ តែក្រុមជាងនៅតែបន្តការងារទាំងបំពាន ទើបនៅថ្ងៃ១៧ ខែឧសភា ឆ្នាំ២០១៩ នេះរដ្ឋបាលខេត្តព្រះសីហនុ បានដឹកនាំមន្ត្រីចុះហាមឃាត់និងបញ្ជាអោយរុះរើចេញវិញតែម្តង។
បើតាមលោក លី ចិត្តនិយម ប្រធានការិយាល័យគ្រប់គ្រងការអភិវឌ្ឍ និងសំណង់សាលាខេត្តព្រះសីហនុ បានបញ្ជាក់ថា៖ ”ទីតាំងសំណង់របស់ក្រុមហ៊ុននេះបានសង់រំលោភចូលលើដីចំណីផ្លូវប្រវែង ៣.៧ ម៉ែត្រ ។ក្រៅពីការរំលោភលើចំណីផ្លូវសំណង់នេះក៏បានសង់ឡើងលើធ្វើអោយប៉ះបង្គោលខ្សែអគ្គិសនីផងដែរ។”
ក្នុងពេលចុះប្រតិបត្តិការលោក លី ចិត្តនិយម បញ្ជាឲ្យម្ចាស់ការដ្ឋានសំណង់រុះរើចេញដោយខ្លួនឯង ករណីប្រសិនជាម្ចាស់សំណង់មិនអនុវត្តតាម រដ្ឋបាលខេត្តព្រះសីហនុនឹងចុះរុះរើ និងចាត់វិធានការទៅតាមផ្លូវច្បាប់។
លោកបានបញ្ជាក់ថា អាជ្ញាធរសំដែងការស្វាគមន៍ចំពោះអ្នកវិនិយោគទាំងអស់ដែលបានមកដាក់ទុនរកស៊ីនៅក្នុងខេត្តព្រះសីហនុក៏ប៉ុន្តែលោកទទូចស្នើសុំឲ្យវិនិយោគិនទាំងអស់ត្រូវគោរពទៅតាមច្បាប់របស់កម្ពុជា។
គួរបញ្ជាក់ផងដែរថាកន្លងមកក្រុមការងារចម្រុះបានចុះហាមឃាត់និងបញ្ជាឲ្យធ្វើការរុះរើចេញនូវសំណង់រំលោភច្បាប់ជាច្រើនកន្លែងដែលម្ចាស់សំណង់មួយចំនួនចេះតែលួចសាងសង់រំលោភច្បាប់។
ដោយឡែកស្ថានភាពសំណង់នៅក្រុងព្រះសីហនុ នាពេលបច្ចុប្បន្ននេះចាប់តាំងពីឯកឧត្តម យន្ត មីន ចូលមកកាន់តំណែងជាអភិបាលខេត្តព្រះសីហនុ រយៈកាល ៣ ឆ្នាំចុងក្រោយនេះការវិនិយោគលើវិស័យសំណង់បាននឹងកំពុងមានសន្ទុះខ្លាំងគួរកត់សំគាល់ មានសំណង់តូច ធំ ជាច្រើនកំពុងតែបណ្ដែតខ្លួនយ៉ាងព្រោងព្រាត សភាពបែបនេះបានធ្វើអោយខេត្តព្រះសីហនុប្រែប្រួលមុខមាត់យ៉ាងលឿន។ រីឯជីវភាពអ្នកខេត្តព្រះសីហនុ ក៏មានភាពប្រសើរឡើងជាលំដាប់ ភាពក្រីក្ររបស់ពលរដ្ឋត្រូវបានកាត់បន្ថយផងដែរ។
ជុំវិញការងារនេះដែលលោក លី ចិត្តនិយម
បង្ហាញជំហរយ៉ាងមុតមាំថាក្នុងនាមជាប្រធានក្រុមកាងារ លោកប្តេជ្ញាបន្តបេសកកម្មនេះដោយអនុវត្តទៅតាមច្បាប់និងសេចក្តីជូនដំណឹង ទាក់ទិនវិស័យសំណង់ របស់រាជរដ្ឋាភិបាល និងរដ្ឋបាលខេត្តព្រះសីហនុ ដើម្បីធានាបរិស្ថានល្អនិងសុខដុមនីយកម្មជាមួយអ្នកជិតខាងនិងសាធារណៈ។
ជាចុងក្រោយលោកក៏បានសំណូមពរឲ្យម្ចាស់ការដ្ឋានសំណង់ទាំងអស់ត្រូវតែគោរពទៅតាមច្បាប់ទាំងអស់គ្នា៕
ដោយ ៖ វិបុល
