ព្រះសីហនុ៖ រដ្ឋបាលខេត្តព្រះសីហនុ បានរៀបចំកិច្ចប្រជុំ នៅសាលាខេត្តព្រះសីហនុ នារសៀលថ្ងៃទី២៣ ខែមករា ២០១៨ ជាមួយក្រុមហ៊ុនទូកទេសចរណ៍ និងប្រតិបត្តិករ ដែលធ្វើអាជីវកម្ម ទូកដឹកទេសចរណ៍ផ្លូវសមុទ្រ ក្នុងខេត្តព្រះសីហនុ ដើម្បីតម្រង់ទិស នៃការដាក់អោយដំណើរការ ប្រកបដោយតម្លាភាព របស់សមាគមទូកទេសចរណ៍ ដែលរដ្ឋបាលខេត្ត ទើបបានបង្កើត ។
កិច្ចប្រជុំនេះធ្វើឡើង ក្រោមវត្តមានលោកស្រី គួច ចន្ថា សមាជិកក្រុមប្រឹក្សាខេត្ត និងលោក ផៃ ប៊ុនវណ្ណៈ អភិបាលរងខេត្តព្រះសីហនុ ព្រមទាំងវត្តមានមន្ត្រីតំណាង អង្គភាពស្ថាបន័រដ្ឋពាក់ពន្ធ័ និងវត្តមានលោកឧកញ៉ាទៀ វិចិត្រ ប្រធានប្រតិបត្តិសមាគមទូកទេសចរណ៍ ខេត្តព្រះសីហនុ និងតំណាងក្រុមហ៊ុនទូកទេសចរណ៍ ក្នុងខេត្តព្រះសីហនុ។
បើតាមលោកផៃ ប៊ុនវណ្ណៈ អភិបាលរងខេត្តព្រះសីហនុបញ្ជាក់ ពីវិធានការសំខាន់ៗ មួយចំនួនក្នុងកិច្ចប្រជុំនេះថា ករណីទូកទេសចរណ៍ របស់ក្រុមហ៊ុនណាមួយ មិនមានច្បាប់ អជ្ញាធរ និងបិទផ្អាកមិនអោយធ្វើអាជីវកម្ម ដឹកភ្ញៀវជាដាច់ខាត ចាប់ពីថ្ងៃទី២៥ ខែមករា ឆ្នាំ២០១៨តទៅ។ ដោយឡែកក្រុមហ៊ុនទូកទេសចរណ៍ ដែលមិនទាន់បានចូលក្នុងសមាគម ចាំបាច់ ត្រូវដាក់ពាក្យសុំចូល ក្នុងសមាគមទូកទេសចរណ៍ តាមគោលការណ៍របស់រដ្ឋបាលលខេត្ត ហើយក្នុងករណី មិនព្រមចូលក្នុងសមាគម អជ្ញាធរខេត្ត ក៏នឹងបិទអាជីវកម្មហាមឃាត់ មិនអោយដឹកភ្ញៀវដែរ ដោយទុករយៈពេលរហូតដល់ ថ្ងៃទី២៨ ខែមករា ឆ្នាំ២០១៨ខាងមុខ។
លោកអភិបាលរងខេត្តពន្យល់ថា គោលការណ៍នេះធ្វើឡើង ដើម្បីអោយក្រុមហ៊ុនទូកទេសចរណ៍ទាំងអស់ ប្រកបអាជីវកម្មដោយស្មើភាព មានសុវត្ថិភាព សម្រាប់ភ្ញៀវ និងមានការទទួលខុសត្រូវផ្នែកផ្លូវច្បាប់៕
ដោយ ៖ សំណាង
