ប្រទេសឥណ្ឌា៖ ៤ម៉ោងមុនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជាយើង បានផ្ញើនូវក្តីនឹករលឹកមកកាន់ជនរួមជាតិកម្ពុជាទាំងមូលតី ពីទីក្រុងញ៉ូវដេលី (New Delhi) នៅប្រទេសឥណ្ឌាទីកន្លែងសម្តេចបំពេញបេសកម្ម ដោយសម្តេចមានប្រសាសន៏តាម facebook ផ្លូវការរបស់សម្តេចថា៖
ជម្រាបសួរបងប្អូនពីទីក្រុងញ៉ូវដេល្លី (New Delhi) ប្រទេសឥណ្ឌាធាតុអាកាសពីម្សិលនិងព្រឹកនេះ គឺចុះអ័ព្វដែលមានសីតុណ្ហភាព ២១អង្សា C។ ខ្ញុំសុខសប្បាយជាធម្មតាទេ។
នៅថ្ងៃត្រង់នេះ ខ្ញុំនឹងចូលរួមពិធីលៀងសាយភោជន៍ជាមួយប្រមុខដឹកនាំនៃបណ្តាប្រទេសសមាជិកអាស៊ានទាំង ១០ ដែលរៀបចំទទួលដោយ លោកប្រធានាធិបតីឥណ្ឌា Ram Nath Kovind ។ តាមពិត ឥណ្ឌានិងកម្ពុជាមានទំនាក់ទំនងល្អជាមួយគ្នាជាច្រើនពាន់ឆ្នាំមកហើយ ក្នុងនោះមានទាំងទំនាក់ទំនងជំនួញជួញដូរ សិល្បៈ វប្បធម៍ អក្សរសាស្រ្ត និងជំនឿសាសនាជា ដើម។ ទំនាក់ទំនងការទូតរវាងប្រទេសយើងទាំងពីរត្រូវបានបង្កើតឡើងវិញនៅឆ្នាំ ១៩៨១ ក្រោយពីយើងរំដោះប្រទេសបានពីរបបប្រល័យពូជសាសន៍ប៉ុលពត ហើយឥណ្ឌាជាប្រទេសប្រជាធិបតេយ្យទី១ ដែលបានទទួលស្គាល់រដ្ឋាភិបាលកម្ពុជាមុនគេនៅពេលនោះ។
សព្វថ្ងៃនេះ ឥណ្ឌាកំពុងមានការរីកចម្រើនជាច្រើនវិស័យ ជាពិសេស លើផ្នែកបច្ចេកវិទ្យា ដែលកម្ពុជាអាចសិក្សារៀនសូត្របានពីប្រទេសជាមិត្ត ដើម្បីជំរុញកម្ពុជាអោយក្លាយទៅជារដ្ឋាភិបាលអេឡិចត្រូនិច (e-government) និងប្រជាពលរដ្ឋអេឡិចត្រូនិច (e-people) ដើម្បីជំរុញការកសាង និងអភិវឌ្ឍន៍ប្រទេសអោយកាន់តែឆាប់រីកចម្រើនជឿនលឿននៅក្នុងសម័យកាលឌីជីថលនេះ ដែលជាតម្រូវការចាំបាច់របស់ពិភពលោកសព្វថ្ងៃ។
សូមជូនពរបងប្អូនជនរួមជាតិ ជួបតែសេចក្តីសុខ និងសំណាងល្អគ្រប់ៗគ្នា!
ដកស្រង់ពិ facebook សម្តេចដោយ៖ វិចិត្រ