រាជធានីភ្នំពេញ ៖ នៅរសៀលថ្ងៃទី២៣ ខែមករា ឆ្នាំ២០១៨ នេះសមត្ថកិច្ចបានបញ្ជូនខ្លួបនមន្រ្តីនគរបាល ខណ្ឌពោធិ៍ សែនជ័យម្នាក់ ដែលបានផ្ទុះអាវុធពេលចុះទៅបង្ក្រាបសង្វៀនជល់មាន់ បណ្តាលឲ្យចំបុរសម្នាក់ស្លាប់ដោយអចេតនា ទៅ ដល់តុលាការហើយ ។ មន្រ្តីនគរបាលរូបនោះ មានឈ្មោះ ចន វិរៈ មានឋានន្តរស័ក្តិអនុសេនីយ៍ត្រី (ស័ក្តិ១) បម្រើផ្នែក អន្តរាគមន៍ នៃអធិការដ្ឋាននគរបាលខណ្ឌពោធិ៍សែនជ័យ ។ លោកអនុសេនីយ៍ត្រី ចន វីរៈ កំពុងស្ថិតក្រោមការសួរ នាំរបស់តំណាងអយ្យការ ដើម្បីចាត់ការបន្តទៀត ។
នៅថ្ងៃទី២២ ខែ មករា ឆ្នាំ ២០១៨ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានបញ្ជាយ៉ាងដាច់ណាត់ ដល់ ស្នងការនគរបាលរាជធានីភ្នំពេញ ឲ្យចាត់វិធានការដោយចាប់បញ្ជូនមន្រ្តីនគរបាលរូបនេះ ដែលមានការធ្វេសប្រហែស បាញ់បង្ក្រាបនៅសង្វៀនជល់មាន់ ១កន្លែង ក្នុងខណ្ឌពោធិ៍សែនជ័យ បានបណ្តាលឲ្យត្រូវបុរសម្នាក់ស្លាប់ ពេលជនរង គ្រោះ អើតពីលើបន្ទប់ជួលជាន់ទី៣ មើលការចុះបង្ក្រាបនោះ ។ ទោះបីមន្រ្តីនគរបាលដែលបានផ្ទុះ អាវុធពេលចុះបង្ក្រាបបទ ល្មើស ល្បែងស៊ីសង ហើយទៅចំជនរងគ្រោះបណ្តាលឲ្យស្លាប់ដោយកំហុសអចេតនាយ៉ាងណាក៏ដោយ តែសម្រាប់ការ អនុវត្ត ច្បាប់ត្រូវតែធ្វើឡើង ដើម្បីជាការព្រមាន ក៏ដូចជាសារមួយប្រាប់ទៅគ្រប់សមត្ថកិច្ចផ្សេងទៀតថា នៅពេលចុះបំពេញ បេសក កម្មការងារ និងក្នុងរង្វង់ប្រតិបត្តិការបង្ក្រាបបទល្មើស ត្រូវប្រើប្រាស់កាំភ្លើងដោយមានប្រុងប្រយ័ត្ន មិនត្រូវធ្វេសប្រហែសនាំ ឲ្យរងគ្រោះថ្នាក់ដល់ជនស្លូតត្រង់នោះឡើយ ។
នាយឧត្តមសេនីយ៍ស្នងការ បានឲ្យដឹងថា បន្ទាប់ពីកម្លាំងនគរបាលជំនាញធ្វើកោសល្យវិច្ច័យទៅលើកាំភ្លើងចំនួន ៥ដើម សំបកគ្រាប់ និងក្បាលគ្រាប់នៅលើសាកសពជនរងគ្រោះនោះ យើងបានរកឃើញមន្រ្តីម្នាក់ ដែលជាអ្នកបាញ់ ហើយនៅ ថ្ងៃទី២៣ ខែមករា ឆ្នាំ២០១៨ នេះ យើងនឹងកសាងសំណុំរឿងបញ្ជូនទៅតុលាការ ពោលបញ្ជូនទាំងមនុស្ស និងវត្ថុតាង ទាំងអស់។
បើតាមនាយឧត្តមសេនីយ៍ ជួន សុវណ្ណ តាមរយៈការស្រាវជ្រាវ និងធ្វើកោសល្យវិច្ច័យរួចមក ក៏បានរកឃើញថាក្បាល គ្រាប់នៅលើសពជនរងគ្រោះមានសភាពបែក និងកំពឹត មានន័យថា ពេលបាញ់នោះគ្រាប់បានទៅបុកជញ្ជាំងថ្ម ហើយក៏ ផ្លាតទៅចំជនរងគ្រោះបណ្តាលឲ្យស្លាប់តែម្តង ខណៈជនរងគ្រោះកំពុង តែឈរកាន់បង្កាប់ដៃបន្ទប់ឈរ ពីលើមើលសមត្ថ កិច្ចបង្ក្រាបល្បែងជល់មាន់ ។
សូមបញ្ជាក់ថា កាលពីវេលាម៉ោងជាង ១១ព្រឹក ថ្ងៃទី២១ ខែមករា ឆ្នាំ២០១៨ ស្ថិតនៅចំណុចដីឡូតិ៍ខាងក្រោយផ្សារកាណា ស៊ីធី ក្នុងភូមិចោមចៅ សង្កាត់ចោមចៅទី២ ខណ្ឌពោធិ៍សែនជ័យ កម្លាំងសមត្ថកិច្ច បានចុះបង្ក្រាបសង្វៀនជល់មាន់ និងបាញ់ អាប៉ោងដ៏ធំមួយ រហូតមានការផ្ទុះអាវុធ (បាញ់ឡើងលើ) ដោយសារខ្លាចក្រុមចូលលេងល្បែងជល់មាន់តដៃ ហើយក៏រាលកៃ បណ្ដាលឱ្យត្រូវបុរសជាកម្មកររោងចក្រម្នាក់ ខណៈកំពុងអឺតមើលនៅលើផ្ទះជួលជាន់ទី៣ បណ្ដាលឱ្យស្លាប់ ពេលបញ្ជូនទៅ មន្ទីរពេទ្យ ។ ជនរងគ្រោះឈ្មោះ សៀក រ៉ន អាយុ ៣៣ឆ្នាំ មុខរបរ កម្មកររោងចក្រ ស្នាក់នៅក្បែរផ្សារកាណាស៊ីធី មានស្រុក កំណើតនៅ ខេត្តកំពង់ស្ពឺ មានប្រពន្ធឈ្មោះ ណុប ផានី អាយុ ២៧ឆ្នាំ មុខរបរ កម្មការីនីរោងចក្រ មានស្រុកកំណើត ភូមិសែន អោក ឃុំគុស ស្រុកត្រាំកក់ ខេត្តតាកែវ ៕
ដោយ ៖ វិចិត្រ
