ឯកឧត្តម យន្ត មីន អបដំណើរដោយលោក ណុប ហេង ប្រធានមន្ទីរសាធារណការ និងដឹកជញ្ជូន ខេត្តព្រះសីហនុ បានចុះពិនិត្យ មើលការដ្ឋានសាងសង់ផ្លូវ និងប្រព័ន្ធលូ នៅក្នុងក្រុងព្រះសីហនុ

ខេត្តព្រះសីហនុ ៖ នៅព្រឹកថ្ងៃអាទិត្យ ២កើត ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៥ ខែឧសភា ឆ្នាំ២០១៩ ឯកឧត្តម យន្ត មីន អភិ បាលខេត្តព្រះសីហនុ អមដំណើរដោយលោក ណុប ហេង ប្រធានមន្ទីរសាធារណការនិងដឹកជញ្ជូនខេត្តព្រះសីហនុបានចុះពិនិត្យ មើលការដ្ឋានសាងសង់ផ្លូវ និងប្រព័ន្ធលូ នៅឆ្នេរអូរឈើទាល ផ្លូវ LV ម្លប់តាប៉ាង និងជុំវិញក្រុងព្រះ សីហនុ ដើម្បីធ្វេីបច្ចុប្បន្នភាព រៀបចំផែនការឲ្យកាន់តែប្រសើរថែមទៀត ព្រមទាំងរៀបចំសណ្តាប់ផ្លូវថ្នល់ឆ្លើយតបនិងកំណើនរីកចំរើនគ្រប់វិស័យ ដោយខេត្តព្រះសីហនុជាប៉ូលសេដ្ឋកិច្ចទី២នៃប្រទេសកម្ពុជា។

ក្នុងឱកាសនោះ ឯកឧត្តមអភិបាលខេត្ត បានជម្រុញឲ្យមន្ត្រីជំនាញ នៃមន្ទីរសាធារណការ និងដឹកជញ្ជូនខេត្ត ត្រូវខិតខំធ្វើយ៉ាងណារៀបចំក្រុមការងារចុះស្ថារ កាយប្រព័ន្ធលូនានាក្នុងក្រុង ដើម្បីឱ្យទឹកហូរ បញ្ចៀសការលេចលង់នៅ
រដូវវស្សានៅតាមដងផ្លូវសំខាន់មួយចំនួនក្នុងក្រុងព្រះសីហនុ ។

ឯកឧត្តម យន្ត មីន ក៏បានអំពាវនាវដលប្រជាពលរដ្ឋ មន្ត្រីរាជការ ចូលរួមសហការស្ដារប្រព័ន្ធអូរ លូរឲ្យបានស្អាតគ្រប់កន្លែង ដើម្បីសម្រួលចរន្តទឹកហូរ កាត់បន្ថយការកកស្ទះសំរាមនិងកាកសំណល់ផ្សេងៗបង្កឱ្យជនលេចផ្ទះប្រជាពលរដ្ឋនៅរដូវវស្សា។ដោយសារតែកំណើនវិនិយោគក្នុងក្រុងព្រះសីហនុរយៈពេល២ឆ្នាំចុងក្រោយនេះ មានការកើនយ៉ាងគំហ៊ុក បញ្ហាប្រព័ន្ធលូរ បរិស្ថាន និងហេដ្ឋារចនាសម្ព័ន្ធនានា ក្នុងខេត្តមានការខូចខាតយ៉ាងច្រើន ទន្ទឹមនឹងការ
ខូចខាតនោះ រដ្ឋបាលខេត្ត បាននឹងកំពុងធ្វើជួសជុល កែលម្អរឱ្យមានសោភ័ណភាពកាន់តែប្រសើរឡើងវិញជាបណ្តើរៗ ហើយសង្ឃឹមថា បញ្ហាបរិស្ថាន អនាម័យ និងបញ្ហាទឹកកខ្វក់និងត្រូវបានដោះស្រាយបាននាពេលខាងមុខ ។

ដូច្នេះឯកឧត្តអភិបាលខេត្ត សំណូមពរដល់បងប្អូនប្រជាពលរដ្ឋមានការយោគយល់ ដើម្បីចូលរួមអភិវឌ្ឍន៍ខេត្តរបស់យើងអោយមានការរីកចំរើនមួយកំរិតទៀត ដើម្បីកាត់បន្ថយភាព
ក្រីក្ររបស់ប្រជាពលរដ្ឋ តែជំរុញអោយជីវភាពកាន់តែល្អប្រសើរឡើងពីមួយ ថ្ងៃទៅមួយថ្ងៃជាក់ជាមិនខាន ៕

ដោយ ៖ វិបុល