ខេត្តតាកែវ ៖ កាលពីថ្ងៃទី០៤ ខែឧសភា ឆ្នាំ២០១៩ លោក សុខ សំណាង ស្នងការនគរបាលខេត្តតាកែវ បានចុះដឹកនាំបញ្ជាដោយផ្ទាល់កម្លាំងស្នងការដ្ឋាននគរបាលខេត្ត និងកម្លាំងអធិការដ្ឋាននគរបាលស្រុកបាទី សហការជាមួយកំលាំងអន្តរាគមន៍ពិសេស នៃអគ្គស្នងការដ្ឋាននគរបាលជាតិ ដឹកនាំដោយ ឯកឧត្តម ឧត្តមសេនីយ៍ឯក ចាន់ សុីថា អគ្គស្នងការរងនគរបាលជាតិ ទទួលផែនអង្គភាពអន្តរាគមន៍ពិសេស ក្រោមការណែនាំបញ្ជាផ្ទាល់ពីសំណាក់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងមានការសម្របសំរួលពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ ចុះបង្ក្រាបមុខសញ្ញាជួញដូរដោយខុសច្បាប់នូវសារធាតុញៀន និងកាន់កាប់អាវុធដោយគ្មានការអនុញ្ញាតនៅចំនុចភូមិក្រាំងក្រចាង ឃុំពារាម ស្រុកបាទី ខេត្តតាកែវ។
ករណីនេះនៅពេលកម្លាំងជំនាញបានចុះបង្ក្រាបជនសង្ស័យមានគ្នា០៣នាក់ហេីយក្នុងនោះមាន០១នាក់កាន់អាវុធខ្លីបានផ្តើមបាញ់សំដៅមកលើប៉ូលីសចំនួន០៣គ្រាប់ រួចរត់ទៅសំងំក្នុងផ្ទះប្រជាជន កម្លាំងជំនាញបានព្យាយាមប្រើប្រាស់គ្រប់មធ្យោបាយ និងចំណាយពេលវេលាចាប់ពីម៉ោង១១:៣០នាទី ដល់ម៉ោង១៥:០៥នាទី ទេីបឃាត់ខ្លួនជនសង្ស័យបាន០១នាក់ ឈ្មោះ យឹម វន្នី ភេទប្រុស អាយុ២២ឆ្នាំ មុខរបរកម្មករមកពីប្រទេសថៃ ស្រុកកំណើតភូមិដូង ឃុំដូង ស្រុកបាទី ខេត្តតាកែវ ជនសង្ស័យដែលឃាត់ខ្លួនបាននេះជាមុខសញ្ញាចាស់ធ្លាប់ជាប់ពន្ធនាគារព្រៃសររយៈពេល០២ឆ្នាំ ៦ខែ កាលពីអំឡុងឆ្នាំ២០១៦ ពាក់ព័ន្ធករណីគ្រឿងញៀន។
ជុំវិញកិច្ចប្រតិបត្តិការនេះពុំមានរងរបួសដល់មនុស្សទេ សមត្ថកិច្ចដកហូតវត្ថុតាងបានរួមមាន៖ ១.ថ្នាំញៀន០៦កញ្ចប់ ២.អាវុធខ្លី០១ដើមម៉ាក RETAY G19C លេខ180901278 មានគ្រាប់ចំនួន០៥គ្រាប់ ៣.ម៉ូតូ០១គ្រឿងម៉ាកឌ្រីម ( Dream C១២៥ ) សេរី២០១៨ ពណ៌ខ្មៅ ពាក់ស្លាកលេខ ភ្នំពេញ ១HH-៩០៦៩ ៤.ដាវសាំម៉ូរ៉ៃ០២ដើម ៥.ទូរស័ព្ទ០៤គ្រឿង ៦.ស្នាប់ដៃ០១។
ក្រោយពេលបង្ក្រាប អង្គភាពអន្តរាគមន៍ពិសេសបានប្រគល់ជនសង្ស័យជូនស្នងការដ្ឋាននគរបាលខេត្តតាកែវ ចាត់ការតាមនីតិវិធីច្បាប់។
បច្ចុប្បន្នកម្លាំងជំនាញការិយាល័យប្រឆាំងគ្រឿងញៀនកំពុងកសាងសំណុំរឿងបញ្ជូនជនសង្ស័យទៅសាលាដំបូងខេត្តតាកែវដើម្បីដាក់ទោសទណ្ឌតាមផ្លូវច្បាប់៕
ដោយ ៖ សិរីបុត្រ
