ខេត្តរតនៈគីរី ៖ នៅថ្ងៃទី៣ ឧសភា ២០១៩ ឯកឧត្តម ថង សាវុន បានអញ្ជើញចូលរួមជាកិត្តិយសជាមួយក្រុមអ្នកកាសែតប្រចាំខេត្តរតនៈគរី ក្នុងទិវាសេរីភាពអ្នកសារព័ត៌មាន ដោយឯកឧត្តមបានថ្លៃសំណេះសំណាលថាថ្ងៃនេះគឺជាទិវាដ៏មហោឡាឬក្ស ខ្ញុំមានកិត្តិយសបានជួបសំណេះសំណាលជាមួយមន្ត្រី នៃមន្ទីរព័ត៌មានខេត្ត និងបងប្អូនអ្នកសារមកពីអង្គភាពនានានៅក្នុងខេត្តរតនគិរី។
ខ្ញុំសូមកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីព័ត៌មាន និងអ្នកសារព័ត៌មានទាំងអស់ ដែលបានចូលរួមបំពេញតួនាទី ភារកិច្ច ប្រកបដោយវិជ្ជាជីវៈក្នុងនាមជាអ្នកឆ្លុះបញ្ចាំងពីទិដ្ឋភាពសង្គម ជាអ្នកនាំសារដ៏ល្អដែលមិនអាចខ្វះបាន។
ស្របគ្នាជាមួយទិវាសេរីភាពសារព័ត៌មានសកលលោកលើកទី២៦ ថ្ងៃទី០៣ ឧសភា នេះផងដែរ ខ្ញុំសូមយកឱកាសនេះ ចូលរួមអបអរសាទរជាមួយអ្នកសារព័ត៌មាន និងសូមឱ្យអ្នកសារព័ត៌មានទាំងអស់ ពង្រឹងនូវក្រមសីលធម៌ វិជ្ជាជីវៈអ្នកសារព័ត៌មាន ពង្រឹងនូវសមត្ថភាព ចំណេះដឹងក្នុងការសរសេរអត្ថបទ ការផលិតព័ត៌មានឱ្យបានត្រឹមត្រូវ មានប្រភពច្បាស់លាស់ និងអាចទុកចិត្តបានដោយឈរនៅលើប្រភពព័ត៌មាន ប៉ុន្តែអ្នកសារព័ត៌មានមិនត្រូវជឿលើប្រភពព័ត៌មានទាំងស្រុងឡើយ គឺត្រូវចេះពិនិត្យ និងផ្ទៀងផ្ទាត់ឱ្យបានច្បាស់លាស់លើព័ត៌មាន ដែលប្រភពផ្តល់ឱ្យ មុននឹងធ្វើការផ្សព្វផ្សាយ និងមិនត្រូវផ្សព្វផ្សាយព័ត៌មានមិនពិតដែលអាចបង្កដល់បញ្ហាសង្គម បរិហារកេរ្តិ៍ ឬការប្រមាថដល់បុគ្គលឬសមត្ថកិច្ចជាដើម ឬជាភ្នាក់ងារដល់អ្នកណាមួយឡើយ។
អ្នកសារព័ត៌មានមិនមែនជាមន្ត្រីនគរបាលយុត្តិធម៌ មិនមែនជាចៅក្រម និងមិនមែនជាអ្នកមានអំណាចបញ្ជាដាច់ខាតឡើយ ប៉ុន្តែគ្រាន់តែជាអ្នកនាំពាក្យប្រកបដោយប្រភពច្បាស់លាស់ និងឈរលើមូលដ្ឋាននៃព័ត៌មានពិត និងត្រឹមត្រូវ ហើយមានសារៈប្រយោជន៍។អ្នកសារព័ត៌មានត្រូវរួមគ្នាប្រយុទ្ធនឹងព័ត៌មានក្លែងក្លាយ តាមរយៈការបញ្ចេញព័ត៌មានពិត ស្របតាមអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី។
ខ្ញុំសូមជូនពរ លោក លោកស្រី បងប្អូនអ្នកសារព័ត៌មានទាំងអស់ ជួបប្រទះតែពុទ្ធពរបួនប្រការ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕
ដោយ ៖ វិបុល
