រាជធានីភ្នំពេញ ៖ ជាទីបំផុតទីតាំង ដែលត្រូវអភិវឌ្ឍន៍សាងសង់ព្រលានយន្តហោះអន្តរជាតិថ្នាក់4F ដែលមហាជនកំពុងទន្ទឹងរង់ចាំចង់ដឹងព័ត៌មាននោះ ពេលនេះ ឯកសារបានទម្លាយមក ហើយក្រោយពីការបំពេញទស្សកិច្ចរបស់នាយករដ្ឋមន្រ្តីចិន។
ទីតាំងដែលត្រូវសាងសង់នេះស្ថិតនៅក្រុងតាខ្មៅ និងស្រុកកណ្តាលស្ទឹង ខេត្តកណ្តាល ដោយប្រើប្រាស់ផ្ទៃដីរហូតដល់ ២៦០០ ហិកតា ។
យោងតាមលិខិតរបស់ទីស្ដីការគណៈរដ្ឋមន្ដ្រី លេខ ១៣១៩ សជណ.ផក ចុះថ្ងៃព្រហស្បតិ៍ ៤កើត ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២១ ខែធ្នូ ឆ្នាំ២០១៧ ផ្ញើជូន ឯកឧត្តមទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ធមុនីរ័ត្ន និងឯកឧត្តម ម៉ៅ ហាវណ្ណាល់ រដ្ឋលេខាធិការ នៃរដ្ឋលេខាធិការដ្ឋាន អាកាសចរស៊ីវិល ដើម្បីស្នើសុំគោលការណ៍អនុញ្ញាតបង្កើតក្រុមហ៊ុន “ខេមបូឌា អ៊ែរផត អ៉ិនវេសមិន ខូអិលធីឌី” (Cambodia Airport Investment Co., Ltd) ជាក្រុមហ៊ុនភាពជាដៃគូវិនិយោគរវាងវិស័យសាធារណៈ និងឯកជន (PPP) ក្នុងគោលបំណងអភិវឌ្ឍន៍សាងសង់អាកាសយានដ្ឋានអន្តរជាតិលំដាប់ថ្នាក់4F។
អាកាសយានដ្ឋានអន្តរជាតិលំដាប់ថ្នាក់ 4F ថ្មីនេះគ្រោងនឹងចំណាយដើមទុនវិនិយោគរហូតដល់ទៅ ១.៥០០លានដុល្លារអាមេរិកក្នុងនោះទឹកប្រាក់១.១០០លានដុល្លារអាមេរិក ជាកម្ចីពីធនាគារបរទេស និង ២៨០ លានដុល្លារអាមេរិក ជាទុនវិនិយោគរបស់ក្រុម OCIC របស់លោកឧកញ៉ា ពុង ឃាវសែ ដោយមានដើមទុនចុះបញ្ជីរហូតដល់ ១២០លានដុល្លារអាមេរិក ។ ជាមួយគ្នានេះ ក្រុមហ៊ុន OCIC មាន ៩០{cd5bdb6ac61e7c4949e2b5eddea10f7a39669d1fb1784b7fffa616dbf3eb4004} និងរដ្ឋលេខាធិការដ្ឋានអាកាសចរស៊ីវិល តំណាងរាជរដ្ឋាភិបាលកម្ពុជាមាន ១០{cd5bdb6ac61e7c4949e2b5eddea10f7a39669d1fb1784b7fffa616dbf3eb4004}។
សូមបញ្ជាក់ថា កាលពីថ្ងៃព្រហស្បតិ៍ ១០រោច ខែបុស្ស នព្វស័ក ព.ស២៥៦១ ត្រូវនឹងថ្ងៃទី១១ ខែមករា ឆ្នាំ២០១៨ លោកឧកញ៉ា ពុង ឃាវសែ ប្រធានក្រុមប្រឹក្សាភិបាល ក្រុមហ៊ុនវិនិយោគទុនអណិកជនកម្ពុជា (OCIC) និងឯកឧត្តម ហ៊ូ ហ៊ួយប៉ាង ប្រធានធនាគារអភិវឌ្ឍន៏ចិន (CDB) ដែលដៃជាដៃគូវិនិយោគនោះ បានចុះហត្ថលេខារួចរាល់ហើយ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម លី ខឺឈាង នាយករដ្ឋមន្ត្រី នៃសាធារណរដ្ឋប្រជាមានិតចិន៕
ដោយ ៖ សំណាង
