រាជធានីភ្នំពេញ ៖ នាព្រឹកថ្ងៃចន្ទ ១០រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២៩ ខែមេសា ឆ្នាំ២០១៩នេះ រដ្ឋ្ឋបាលរាជធានីភ្នំពេញបានបើកកិច្ចប្រជុំក្រោមការចូលរួមជាអធិបតីភាពឯកឧត្តម ឃួង ស្រេង អភិបាលរាជធានីភ្នំពេញ ព្រមទាំងសមត្ថកិច្ចពាក់ព័ន្ធ ដើម្បីត្រៀមរៀបចំសន្តិសុខ សណ្ដាប់ធ្នាប់ក្នុងពិធីអបអរសាទរខួបលើកទី១៥៦ ទិវាពិភពលោកកាកបាទក្រហម អឌ្ឍចន្ទក្រហម ០៨ ឧសភា ២០១៩ ដើម្បីធានាឲ្យបាននូវដំណើរការនៃអង្គពិធីប្រព្រឹត្តទៅដោយរលូន និងរក្សាអោយបានសន្តិសុខ សណ្ដាប់ធ្នាប់សាធារណៈ ជូនថ្នាក់ដឹកនាំ និងមហាជនចូលរួមក្នុងអង្គពិធី។
បើតាមគណៈកម្មាធិការ កាកបាទក្រហមកម្ពុជា ដើម្បីត្រៀមរៀបចំខួបទី១៥៦ បានឲ្យដឹងថា ទិវាអន្តរជាតិកាកបាទក្រហម អឌ្ឍចន្ទក្រហម ៨ឧសភា នៅថ្ងៃទី០៨ ខែឧសភា ឆ្នាំ២០១៩ ខាងមុខនេះ ក្រោមប្រធានបទ «ខ្ញុំស្រលាញ់កាកបាទក្រហមកម្ពុជា-I Love Cambodian Red Cross»។
ទិវាអន្តរជាតិកាកបាទក្រហម អឌ្ឍចន្ទក្រហម ៨ឧសភា និងអបអរខួប១០០ឆ្នាំ នៃការបង្កើតសហព័ន្ធអន្តរជាតិ នៃសមាគមកាកបាទក្រហមអឌ្ឍចន្ទក្រហម (១៩១៩–២០១៩) នឹងប្រព្រឹត្តទៅនៅទីស្នាក់ការកណ្ដាល កាកបាទក្រហមកម្ពុជា នៅថ្ងៃទី០៨ ខែឧសភា ឆ្នាំ២០១៩ ក្រោមអធិបតីភាពសម្ដេចតេជោ នាយករដ្ឋមន្ដ្រីនៃកម្ពុជា និងមានវត្តមានឥស្សរជនថ្នាក់ជាតិ និងអន្តរជាតិ ព្រមទាំងសប្បុរសជនចូលរួម ប្រមាណរាបពាន់នាក់៕
ដោយ ៖ វិបុល
