ខេត្តកណ្ដាល៖ បុរស០២នាក់ក្រោយពីផឹកស្រារួចបានបបួលគ្នាទៅឆក់ត្រីភ្លាត់ស្នៀតឆក់ស្លាប់ទាំងពីរនាក់ត្រូវបានសមត្ថកិច្ចប្រទះឃើញកាលពីថ្ងៃច័ន្ទ ០៦កើត ខែមាឃ ឆ្នាំរកា ព.ស២៥៦១ ត្រូវនឹងថ្ងៃទី ២២ ខែមករា ឆ្នាំ២០១៨ វេលាម៉ោង១៤ៈ២០នាទី នៅក្នុងអូរដីស្រូវប្រាំង ក្នុងភូមិសំបួរ ឃុំសំបួរ ស្រុកល្វាឯម ខេត្តកណ្តាល ។
បើតាមការរៀបរាប់ពីឈ្មោះ យឺន ទូច ជាប្រពន្ធប្រពន្ធនៃសពបានឲ្យដឹងថាប្ដីរបស់ខ្លួនមានឈ្មោះ ជៀប វណ្ណី អាយុ៣៦ឆ្នាំ ជនជាតិខ្មែរ មុខរបរកសិករ និងមិត្តភក្ដិឈ្មោះ ឃ្លី វិសាល ហៅតិន ភេទប្រុស ជនជាតិខ្មែរ មុខរបរកសិករដូចគ្នា មានទីលំនៅភូមិព្រែកចារ ឃុំសំបួរ ស្រុកល្វាឯម ខេត្តកណ្តាល។ ក្រោយពីហូបស្រារួច បានបបួលគ្នាទៅឆក់ត្រីនៅក្នុងបឹងដែលមានចម្ងាយប្រមាណ២គីឡូម៉ែត្រពីភូមិកាលពីថ្ងៃទី២១ ខែមករា គ្រឹស្តសករាជ២០១៨ វេលាម៉ោង២១.០០នាទី។ លុះព្រឹកឡើងខ្លួនជាប្រពន្ធមិនឃើញប្តីត្រឡប់មកផ្ទះវិញក៏នាំគ្នាចុះទៅបឹងតាមរកប្ដី តែរកមិនឃើញក៏បានមកប្តឹងនគរបាលប៉ុស្តិ៍រដ្ឋបាលសំបួរពីមូលហេតុបាត់ប្តីព្រោះទៅឆក់ត្រីមួយយប់ហើយមិនឃើញត្រឡប់មកផ្ទះវិញខ្លាចក្រែងមានសមត្ថកិច្ចជលផលចាប់ខ្លួន ។
ក្រោយទទួលព័ត៌មានកម្លាំងប៉ុស្តិ៍នគរបាលរដ្ឋបាលសំបួរបានធ្វើការស្រាវជ្រាវព័ត៌មាន រហូតមកដល់វេលាម៉ោង១៤ៈ២០នាទី ថ្ថ្ងៃទី២២ ខែមករា ឆ្នាំ២០១៨ ក៏បានទទួលដំណឹងពីប្រជាពលរដ្ឋឈ្មោះ ហ៊ុន ហួន បានប្រាប់ថា ឃើញឈ្មោះ ជៀប វណ្ណី និងឈ្មោះ ឃ្លី វិសាល ដើរទៅឆក់ត្រីនៅចំណុចអូរដីស្រូវប្រាំង ក្នុងភូមិសំបួរ ឃុំសំបួរ ស្រុកល្វាឯម ខេត្តកណ្តាល កម្លាំងនគរបាលប៉ុស្តិ៍ ក៏ចុះដល់ចំណុចខាងលើទើបប្រទះឃើញសាកសពបុរសទាំងពីរនាក់ដេកស្លាប់នៅក្នុងទឹកដោយឈ្មោះ ជៀប វណ្ណី កាន់ខ្សែភ្លើងជាប់ដៃស្តាំ មានស្នាមរលាត់នៅត្រង់កខាងស្តាំផងដែរ និងឈ្មោះ ឃ្លី វិសាល ដៃឆ្វេងកាន់សំណរជើងអួន មានស្នាមរលាត់លើចញ្ចើមខាងស្តាំផងដែរ។
ចំណែកវត្ថុតាងបន្សល់ទុកនៅនឹងកន្លែងកើតហេតុមានអាគុយ៤០ អំពែ០១គ្រឿង អាំងវែទ័រ០១គ្រឿង អួនប្រវែង០៧ម៉ែត្រ ។
ក្រោយពិនិត្យរួចសមត្ថកិច្ចបានសន្និដ្ឋានថា សាកសពទាំងពីរនាក់ពិតជាស្លាប់ដោយសារឆក់ត្រីប្រាកដមែន និងបានប្រគល់ជូនក្រុមគ្រួសារធ្វើបុណ្យតាមប្រពៃណី៕
ដោយ ៖ វិចិត្រ
