ខេត្តតាកែវ៖ នាព្រឹកថ្ងៃអាទិត្យ ៣កើត ខែចេត្រ ឆ្នាំច សំរឹទ្ធិស័ក ព.ស ២៥៦២ ត្រូវនិងថ្ងៃទី០៧ ខែមេសា ឆ្នាំ២០១៩ វេលាម៉ោង០៩ និង៣០នាទី នៅសាលប្រជុំស្នងការដ្ឋាននគរបាលខេត្តតាកែវ មានរៀបចំកិច្ចប្រជុំផ្សព្វផ្សាយអនុសាសន៍ណែនាំដ៏ខ្ពង់ខ្ពស់របស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងបទបញ្ជារបស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ពាក់ព័ន្ធសកម្មភាពក្រុមអាណាធិបតេយ្យខុសច្បាប់ចូលចាប់យកដីសាធារណៈរបស់រដ្ឋ។
ពិធីនេះស្ថិតក្រោមអធិបតីភាពដ៏ខ្ពង់ខ្ពស់ លោក ឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ ដោយមានការចូលរួមពីលោក ស្នងការរងទទួលផែនការងារសន្តិសុខ លោក នាយ នាយរងការិយាល័យចំណុះផែនសន្តិសុខ លោកអធិការ អធិការរងទទួលផ្នែកសន្តិសុខគ្រប់ស្រុង ក្រុង និងមន្ត្រីពាក់ព័ន្ធមួយចំនួនទៀត។
មានមតិណែនាំក្នុងឱកាសនោះដែរ លោកឧត្តមសេនីយ៍ទោ ស្នងការ បានណែនាំដល់សមាជិកអង្គប្រជុំត្រូវយកចិត្តទុកដាក់អនុវត្តន៍តាមអនុសាសន៍ដ៏ខ្ពង់ខ្ពស់របស់ សម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងការណែនាំរបស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ក្នុងការក្តាប់មុខសញ្ញាពាក់ព័ន្ធសកម្មភាពកងកម្លាំងអាណាធិបតេយ្យ និងប្រជាពលរដ្ឋក្នុងការចាប់យកដីសាធារណៈរបស់រដ្ឋ នៅក្នុងភូមិសាស្រ្តខេត្ត។
ព្រមជាមួយគ្នានេះលោកស្នងការក៏បានធ្វើការណែនាំដល់ លោក អធិការនគរបាលតាមបណ្តាក្រុង ស្រុកត្រូវបង្កើនការស្រាវជ្រាវព័ត៌មានពាក់ព័ន្ធសន្តិសុខ តាមបណ្តោញទំនាក់ទំនងសង្គម និងព័ត៌មានទាន់ហេតុការណ៍ ដេីម្បីវិភាគវាយតម្លៃឱ្យបានទាន់ពេលវេលា ជាពិសេសក្តាប់រាល់សកម្មភាពក្រុមឧទ្ទាមក្រៅច្បាប់ ក្រុមហាមសិទ្ធិធ្វេីនយោបាយ និងសកម្មភាពក្រុមដេីរធ្វេីវិទ្ធង្សនាបង្កការអុកឡុក។ ទន្ទឹមនោះត្រូវពង្រឹងកិច្ចការពារសន្តិសុខសណ្តាប់ធ្នាប់តាមទីប្រជុំជន វត្តអារាម ក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខនេះ ជាពិសេសពង្រឹងការអនុវត្តន៍គោលនយោបាយភូមិ ឃុំ មានសុវត្ថិភាព ដេីម្បីធានាភាពសុខសាន្តជូនប្រជាពលរដ្ឋ៕
ប្រភព Facebook ស្នងការខេត្តតាកែវ
