ខេត្តព្រះសីហនុ៖ នៅវេលាម៉ោងប្រមាណ១៨:៣០នាទី ថ្ងៃទី២២ ខែមករា ឆ្នាំ២០១៨ លើផ្លូវលំហែភូមិន្ទ ជាប់សណ្ឋាគារ វិមានខ្សាច់ស ស្ថិតនៅក្នុងភូមិ៤ សង្កាត់លេខ៤ ក្រុង ខេត្តព្រះសីហនុ មានគ្រោះថ្នាក់ចរាចរណ៍មួយកើតឡើងរវាងងម៉ូតូ១គ្រឿងម៉ាក HONDA C125ពណ៌ខ្មៅ ពាក់ផ្លាកលេខភ្នំពេញ1GD-0898 បើកបរដោយឈ្មោះ វ៉ន និត ភេទ ប្រុស អាយុ៣៥ឆ្នាំ មុខរបរកម្មករសំណង់ មានទីលំនៅភូមិគោកធ្លក ឃុំគោកធ្លកលើ ស្រុកជីក្រែង ខេត្តសៀមរាប និងអ្នករួមដំណើរម្នាក់ ឈ្មោះ ផាន់ ភឿន ភេទ ប្រុស អាយុ ២៨ឆ្នាំ មុខរបរកម្មករសំណង់ ស្នាក់នៅសង្កាត់លេខ៣ ក្រុង ខេត្តព្រះសីហនុ (បើកបរក្នុងស្ថានភាពស្រវឹង មិនពាក់មួកសុវត្ថិភាព) មានទិសដៅពីរង្វង់មូលតោ ឆ្ពោះទៅចុងឆ្មេរអូរឈើទាល បានបុកពីចំហៀងរថយន្ត១គ្រឿងម៉ាក HIGHLANDER ពណ៌ទឹកប្រាក់ ពាក់ផ្លាកលេខ ភ្នំពេញ2U-2372 ដែលកំពុងបត់ឆ្លងផ្លូវ មានទិសដៅស្របគ្នា អ្នកបើកបរ ឈ្មោះ LEE HAENG YEON ភេទប្រុស អាយុ២៦ឆ្នាំ ជនជាតិកូរ៉េ កាន់លិខិតឆ្លងដែនលេខ M06915723 ជាអ្នកទេសចរណ៍ស្នាក់នៅក្នុងសង្កាត់លេខ៤ ក្រុង ខេត្តព្រះសីហនុ។
គ្រោះថ្នាក់នេះ បណ្ដាលឲ្យឈ្មោះ វ៉ន និត អ្នកបើកម៉ូតូរងរបួសធ្ងន់បានបញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុក្រោយមកស្លាប់នៅក្នុងមន្ទីរពេទ្យ និងអ្នករួមដំណើរឈ្មោះ ផាន់ ភឿន រងរបួសស្រាល បានបញ្ជូនទៅសង្គ្រោះនៅមន្ទីរពេទ្យខេត្តព្រះសីហនុ។
ចំណែកអ្នកបើកបររថយន្តឈ្មោះ LEE HAENG YEON រងរបួសស្រាលបាននាំខ្លួនមកសាកសួរនៅការិយាល័យនគរបាលចរាចរណ៍ផ្លូវគោក។
សមត្ថកិច្ចបានអោយដឹងថា រថយន្តនិងម៉ូតូបានយកមករក្សាទុកនៅការិយាល័យនគរបាលចរាចរណ៍ផ្លូវគោកដើម្បីដោះស្រាយបន្តតាមនិតិវិធីរបស់តុលាការ៕
ដោយ ៖ វិចិត្រ
