រាជធានីភ្នំពេញ៖ ថ្ងៃព្រហស្បត្តិ៍ ១៥រោច ខែផល្គុន ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី ០៤ ខែមេសា ឆ្នាំ២០១៩ នៅសាលប្រជុំរបស់អគ្គស្នងការដ្ឋាននគរបាលជាតិ មានរៀបចំពិធីបើកសន្តិបាតបូកសរុបលទ្ធផលកិច្ចប្រតិបត្តិការឆ្នំា២០១៨ និងលើកទិសដៅឆ្នាំ២០១៩ របស់ផែនសណ្តាប់ធ្នាប់សាធារណៈ ដែលមានបីនាយកដ្ឋានចូលរួមគឺ គ្រប់គ្រងអាវុធជាតិផ្ទុះ បង្ការពន្លត់អគ្គិភ័យនឹងសង្គ្រោះ និងការពារបេតិកភណ្ឌ ក្រោមអធិបតីភាពឯកឧត្តម ឧត្តមសេនីយ៍ឯក សេក ភូមី អគ្គស្នងការរងនគរបាលជាតិផែន ។
បន្ទាប់មកនាយកដ្ឋាននីមួយៗបានឡើងអានរបាយការណ៏បូកសរុបលទ្ធផលការងារឆ្នាំ២០១៨ និងលើកទិសដៅឆ្នាំ២០១៩ ព្រមទាំងលើកឡើងពីបញ្ហាប្រឈមចំនួន ៣០នាទី រួមទាំងមានការចូលរួមរបស់ស្នងការរង និងនាយការិយតាមបណ្តាលរាជធានី-ខេត្តបានឡើងអានលទ្ធផលការងាររបស់ខ្លួនចំនួន ១០នាទី ។
ជាកិច្ចបញ្ចប់ឯកឧត្តម ឧត្តមសេនីយ៍ឯក សេក ភូមី បានបូកសរុបលទ្ធផលការងារទាំងបីនាយកដ្ឋាន ព្រមទាំងដោះស្រាយរាល់បញ្ហាប្រឈមដែលនាយកដ្ឋាននីមួយៗបានលើកឡើង និងដាក់ទិសដៅបន្តឲ្យនាយកដ្ឋានទាំងបីយកទៅអនុវត្តន៏សំរាប់ឆ្នាំ២០១៩ រីឯនាយកដ្ឋាននគរបាលការពារបេតិកភណ្ឌរូមមាន៖
១.ពិនិត្យពិចារណាលើរចនាសម្ព័ន្ធក្របខ័ណ្ឌពីថ្នាក់ជាតិដល់ថ្នាក់ក្រោមជាតិឲ្យស្របតាមស្ថានភាពបច្ចុប្បន្ន ។
២.គ្រប់ខេត្ត-ក្រុងធ្វើរបាយការណ៏ជាក់ស្តែងអំពីរចនាសម្ព័ន្ធរបស់នគរបាលការពារបេតិកភណ្ឌ មកនាយកដ្ឋាននគបាលការពារបេតិកភណ្ឌ ហើយនាយកដ្ឋានត្រូវធ្វើការបូកសរុប និងលើកសំណើសុំគោលការណ៏ឲ្យបានសមស្រប ។
៣.ខិតខំលើការងារជំនាញពង្រឹងសមត្ថភាពមន្រ្តីស្រាវជ្រាវគោលដៅបេតិកភណ្ឌថ្មីៗ លើកកំពស់ការផ្សព្វផ្សាយ និងទំនាក់ទំនងឲ្យបានទូលំទូលាយជាមួយស្ថាប័នរដ្ឋ និងឯកជន ។
៤.ពង្រីកការងារស្រាវជ្រាវ ដើម្បីបង្ការទប់ស្កាត់បទល្មើសបេតិកភណ្ឌឲ្យបានជាមុន ដូចជាតម្លើងបញ្ជីក្រុមហ៊ុនរកស៊ីវត្ថុបុរាណ ផ្សារលក់ដូរ ព្រមទាំងបញ្ចីមុខសញ្ញាជួញដូរវត្ថុបុរាណ ស្រាវជ្រាវ និងចងក្រងបញ្ជីសារពើបេតិកភណ្ឌទូទាំងប្រទេស ។
៥.ខិតខំយកចិត្តទុកដាក់ដល់ការងារអប់រំ បើកវគ្គបំប៉នខ្លី និងដោះស្រាយរបស់មន្រ្តីឈរជើងនៅតាមគោលដៅឆ្ងាយៗ ៕
ដោយ ៖ វិបុល
