ខេត្តតាកែវ : នៅរសៀលថ្ងៃទី០៣ ខែមេសា ឆ្នាំ២០១៩ នៅសាលប្រជុំស្នងការដ្ឋាននគរបាលខេត្តតាកែវ បានរៀបចំពិធីបិទវគ្គបំប៉ន និងផ្តល់បទពិសោធន៍ ជំនាញសន្តិសុខ ជូនដល់មន្ត្រីនគរបាលទទួលការងារសន្តិសុខ នៃស្នងការដ្ឋាននគរបាលខេត្តតាកែវ។
ពិធីនេះដែរស្ថិតក្រោមអធិបតីភាព លោក គង់ សារ៉ន អនុប្រធាននាយកដ្ឋានកណ្ដាលសន្តិសុខ តំណាងដ៏ខ្ពង់ខ្ពស់ ពីលោក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ និងលោក សុខ សំណាង ស្នងការ នៃស្នងការដ្ឋាននគរបាលខេត្តតាកែវ ដោយមានការអញ្ជើញចូលរួមមាន លោក ឧត្តមសេនីយ៍ វរសេនីយ៍ឯក ជាស្នងការរង ព្រមទាំងសិក្ខាកាមក្នុងវគ្គសិក្សាចំនួន១៤៨នាក់ ស្រី០២នាក់ មកពីការិយាល័យជំនាញចំណុះផែនការងារសន្តិសុខ លោកអធិការរង លោកនាយ នាយរងផ្នែក និងមន្ត្រីនគរបាលទទួលការងារសន្តិសុខគ្រប់ស្រុក-ក្រុង លោកនាយរងប៉ុស្តិ៍ ជំនួយការប៉ុស្តិ៍ និងមន្ត្រីនគរបាលប៉ុស្តិ៍រដ្ឋបាលឃុំ-សង្កាត់ទូទាំងខេត្ត ដោយសិក្សាយៈពេល០២ថ្ងៃចាប់ពីថ្ងៃទី០២ដល់ ថ្ងៃទី០៣ ខែមេសា ឆ្នាំ២០១៩។
មានប្រសាសន៍ក្នុងពិធីបិទវគ្គបំប៉ន និងផ្តល់បទពិសោធន៍ជំនាញសន្តិសុខ ជូនមន្រ្តីនគរបាលទទួលការងារសន្តិសុខ លោក ឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានថ្លែងអំណរគុណចំពោះ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ និងនាយកដ្ឋានកណ្តាលសន្តិសុខ ដែលបានចាត់តាំងក្រុមការងារចុះមកធ្វេីបទបង្ហាញពាក់ព័ន្ធជំនាញសន្តិសុខ ដល់មន្ត្រីនគរបាលទទួលការងារសន្តិសុខ នៃស្នងការដ្ឋាននគរបាលខេត្តតាកែវនាពេលនេះ។
ទន្ទឹមនោះបានផ្តាំផ្ញេីដល់សិក្ខាកាមក្នុងវគ្គសិក្សាទាំងអស់ត្រូវយកចំណេះដឹង និងបទពិសោធន៍ដែលទទួលបានពីវគ្គសិក្សានេះ ដើម្បីយកទៅអនុវត្តឲ្យចំគោលការណ៍ និងទិសដៅក្នុងមូលដ្ឋាន ក្នុងកិច្ចការពារ បង្ការទប់ស្កាត់បទល្មើស រក្សាបាននូវសន្តិសុខសុវត្ថិភាព និងសណ្តាប់ធ្នាប់សង្គមជូនប្រជាពលរដ្ឋឲ្យមានប្រសិទ្ធភាពខ្ពស់។
មានមតិនាឱកាសនោះដែរលោក គង់ សារ៉ន អនុប្រធាននាយកដ្ឋានកណ្តាលសន្តិសុខបានមានប្រសាសន៍បញ្ជាក់ថា៖ ឆ្លងកាត់ការសិក្សាសិក្ខាកាមរបស់កងកម្លាំងមានការយល់ដឹងច្រើនចំពោះការក្តាប់ព័ត៌មានសន្តិសុខនានា ដូច្នេះក្រោយបញ្ចប់នៅវគ្គបំប៉ននេះទៅមន្ត្រីជំនាញទាំងអស់ត្រូវខិតខំអនុវត្តការងារឱ្យបានល្អជាងនេះ និងដើម្បីសម្រេចតាមទិសដៅដែលបានដាក់ចេញផងដែរ៕
ដោយ ៖ វិបុល
