រាជធានីភ្នំពេញ៖ ឯកឧត្តម ឃួង ស្រេង អភិបាល អភិបាលនៃគណៈភិបាល រាជធានីភ្នំពេញ កាលពីរាត្រីថ្ងៃទី០២ មេសានេះ បានដឹកនាំមន្ត្រីជំនាញ និងអាជ្ញាធរដែនដីចុះទៅពិនិត្យមើលស្ថានភាពជាក់ស្ដែង នៃការចាក់ដីទៅក្នុងទន្លេបាសាក់ ដែលការចាក់ដីទៅក្នុងទន្លេនេះ ក្នុងបំណងតែមួយគត់ គឺដើម្បីធ្វើការអភិវឌ្ឍន៍ច្រាំងទន្លេឲ្យមានសោភ័ណភាព ខណៈដែលទន្លេច្រាំងទន្លេខាងលើ នឹងត្រូវសាងសង់ជាផ្លូវថ្មើរជើងអមសងខាងទន្លេខាងលើនិងធ្វើអាងចម្រោះទឹកស្អុយផងដែរ។
ថ្លែងក្នុងកិច្ចសម្ភាសន៍ជាមួយ ក្រុមអ្នកយកព័ត៌មាន នៅទីតាំងកន្លែងចាក់ដីលុបនោះ ឯកឧត្តម ឃួង ស្រេង បានបញ្ជាក់ថា រដ្ឋបាលរាជធានីភ្នំពេញ មិនមានបំណងលុបដៃទន្លេបាសាក់ ដូចការរិះគន់របស់អ្នកលេងបណ្ដាញសង្គម Facebook និងសារព័ត៌មានមួយចំនួននោះឡើយ។
ឯកឧត្តម បានមានប្រសាសន៏ថា ការចាក់ដីលុបនេះ គឺជាការសាងសង់ស្ថានីយចម្រោះទឹកកខ្វក់ ដែលហូរចូលទន្លេប៉ុណ្ណោះ ដោយសារតែដៃទន្លេបាសាក់នេះ ទទួលរងនូវការបង្ហូរទឹកកខ្វក់ទឹកស្អុយពីអគារខ្ពស់ៗ និងផ្ទះប្រជាពលរដ្ឋរស់នៅសងខាងដៃទន្លេនេះ ដូច្នេះដើម្បីការពារបរិស្ថាន រដ្ឋបាលរាជធានីភ្នំពេញ ក៏បានសម្រេចធ្វើអាងចម្រោះទឹកស្អុយ ដោយបំពាក់នូវម៉ាស៊ីនបូមទឹកកខ្វក់នេះ ទម្លាក់ទៅប្រឡាយបង្ហូរទឹកបឹងត្របែក។
ឯកឧត្តម បានលសង្កត់ធ្ងន់ថា «ការចាក់ដីនេះ គឺជាការសាងសង់អាងចម្រោះទឹកស្អុយ ដែលជាគម្រោងរបស់រដ្ឋបាលរាជធានីភ្នំពេញ មិនមែនជាការចាក់លុបដីរបស់ឈ្មួញនោះទេ សូមប្រជាពលរដ្ឋកុំយល់ច្រឡំ»។
ឯកឧត្តមរាជធានីបន្តថា ចំពោះការចាក់ដីលុបនេះ នៅពេលដែលការដ្ឋានសាងសង់ ស្ថាបនាអាងចម្រោះទឹកសម្អុយរួចរាល់នោះ នឹងកាយដីដែលបានចាក់ចេញវិញ ហើយគម្រោងនេះក៏មានសង់ច្រាំងទន្លេទប់ដី និងសង់ផ្លូវថ្មីជើងចាប់ពីកោះពេជ្ររហូតដល់ស្ពានអាកាសក្បាលថ្នល់ ដើម្បីលើកកម្ពស់សោភណ្ឌភាពទីក្រុងភ្នំពេញ ដែលមានអាគារសំណង់ខុនដូខ្ពស់ៗ នៅអមសងខាងដៃទន្លេ។
បើយោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញបានឲ្យដឹងថា រដ្ឋបាលរាជធានីភ្នំពេញសូមជម្រាបជូនដំណឹងដល់បងប្អូនប្រជាពលរដ្ឋទាំងអស់ឲ្យបានជ្រាបថា ប៉ុន្មានថ្ងៃនេះមានព័ត៌មានមួយចំនួនបានផ្សព្វផ្សាយ អំពីការចាក់ដីចូលក្នុងដៃទន្លេបាសាក់ទន្លេតូច ស្ថិតនៅសង្កាត់ទន្លេបាសាក់ខណ្ឌចំការមនរាជធានីភ្នំពេញ។ ដើម្បីកុំឲ្យបងប្អូនប្រជាពលរដ្ឋទូទៅមានការភ័ន្តច្រឡំរដ្ឋបាលរាជធានីភ្នំពេញ
សូមគូសបញ្ជាក់ជូនថា ការចាក់បំពេញដីនេះគឺក្នុងបំណងកែលំអច្រាំងដៃទន្លេបាសាក់ឲ្យច្រាំងខាងលិចស្របនឹងច្រាំងខាងកើត ដើម្បីធានាបាននូវសោភ័ណភាពល្អឈានទៅកែប្រែផ្លូវថ្មើរជើងចាប់ពីតំបន់អភិវឌ្ឍន៍កោះពេជ្រគល់ស្ពានព្រះមុនីវង្ស ហៅស្ពានច្បារអំពៅដូចមានគំនូសប្លង់ភ្ជាប់មកជាមួយ។ អាស្រ័យដូចបានជម្រាបខាងលើ សូមបងប្អូនប្រជាពលរដ្ឋទាំងអស់គ្នាជ្រាបជាព័ត៌មាន៕
ដោយ ៖ វិបុល
