រាជធានីភ្នំពេញ៖ គ្រឿងឥស្សរិយយស និងមេដាយការងារចំនួន៣៥៦ ត្រូវបានបំពាក់ និងផ្តល់ជូនមន្ត្រីរាជការចំណុះឲ្យរដ្ឋបាលរាជធានីភ្នំពេញ ដើម្បីជាការលើកទឹកចិត្តបន្ទាប់ពីបងប្អូនបានខិតខំបំពេញការងារជូនប្រជាពលរដ្ឋ និងបំពេញភារកិច្ចជូនរដ្ឋបាលរាជធានីភ្នំពេញបានល្អនាពេលកន្លងមកនិងក្រោយពីមានការស្នើសុំដោយ លោក ឃួង ស្រេង អភិបាល នៃគណៈអភិបាលរាជធានីភ្នំពេញ ទៅសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីស្នើសុំការប្រោសព្រះរាជទានពីអង្គព្រះមហាក្សត្រព្រះរាជទាននូវគ្រឿងឥស្សរិយយស និងមេដាយការងារជូនបងប្អូននាពេលនេះ។
ពិធីបំពាក់មេដាយនេះធ្វើឡើង នៅរសៀលថ្ងៃទី២៩មិនា នៅសាលារាជធានីភ្នំពេញ ដោយមានការអញ្ជើញចូលរួមពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ។
តាម លោក ឃុន វណ្ណា នាយកទីចាត់ការគ្រប់គ្រងធនធានមនុស្ស នៃរដ្ឋបាលរាជធានីភ្នំពេញបានឲ្យដឹងពីការគ្រប់គ្រងធនធានមនុស្សក្នុងរដ្ឋបាលរាជធានីភ្នំពេញពីស្ថានភាពទូទៅ,ពីការអនុវត្តគោលនយោបាយវិមជ្ឈការ,ការអនុវត្តការងាររបស់ទីចាត់ការគ្រប់គ្រងធនធានមនុស្សស្របតាមគោលការដឹកនាំដែលពាក់ព័ន្ធនឹងផលប្រយោជន៍របស់មន្ត្រីរាជការដែលក្នុងនោះមានការស្នើសុំដំឡើងឋានន្តរសក្ដិ ប័ណ្ណសរសើរ ការរៀបចំស្នើសុំ គ្រឿងឥស្សរិយយសជាដើម។
លោកឲ្យដឹងទៀតថា ចំពោះគ្រឿងឥស្សរិយយស និងមេដាយការងារដែលត្រូវបំពាក់ និងផ្តល់ជូនមន្ត្រីរាជការ នៃរដ្ឋបាលរាជធានីភ្នំពេញនាពេលនេះរួមមាន គ្រឿងឥស្សរិយយសព្រះរាជាណាចក្រកម្ពុជាថ្នាក់មហាសេនាចំនួន១រូប, ថ្នាក់សេនាចំនួន១៧រូប,គ្រឿងឥស្សរិយយសព្រះរាជាណាចក្រកម្ពុជាថ្នាក់អស្សឬទ្ធិចំនួន៨០រូប និងមេដាយការងារជាច្រើនរូបទៀត៕
ដោយ៖ វិបុល
