ខេត្តកំពង់ស្ពឺ ៖ អធិការរងនគរបាលស្រុកភ្នំស្រួច លោក អ៊ឹង ឡាយឆាយ ត្រូវបានប្រជាពលរដ្ឋរងគ្រោៈ២នាក់ដាក់ពាក្យបណ្តឹងទៅសម្តេចក្រឡាហោម ស ខេង រួចមកក្រុមការងារ អធិការកិច្ចក្រសួងមហាផ្ទៃ បានចុះធ្វើអធិការកិច្ចលើលោកអធិការរងដែលត្រូវបានដើមបណ្តឹងចោទថាបានសុីដាច់ប្រាក់ ចំនួនរាប់សិបលានរៀល រួមនិងយកគ្រឿងអលង្ការអស់ជាច្រើនតម្លឹងពីស្ត្រី២នាក់ដែលត្រូវមីងក្មួយនិងគ្នា។
ដើមបណ្តឹងទាំងពីរនាក់រួមមាន៖
ទី១. ឈ្មោះ ហេង ឈៀង ភេទស្រី អាយុ៣៦ ឆ្នាំ កាន់អត្តសញ្ញាណប័ណ្ណលេខ០៣០៥២៨៨១២ចុះថ្ងៃទី២០ ខែមករា ឆ្នាំ២០១៣ និង
ទី២.ឈ្មោះ សៀវ ហៀង ភេទស្រី កើតឆ្នាំ ១៩៨៤ រស់នៅភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
ក្នុងពាក្យ បណ្តឹងបានរៀបរាប់ថា”យោងក្រមនីតិវិធីព្រហ្មទណ្ឌនិងក្រមព្រហ្មទណ្ឌនៃព្រះរាជាណាចក្រកម្ពុជា បណ្ណអនុញ្ញាតអាជីវកម្ម ស្នូកឃ័រលេខ១៣៩មទខ/កស្ពចុះថ្ងៃទី១៦ ខែឧសភា ឆ្នាំ២០១៨ របស់មន្ទីរទេស ចរណ៍ខេត្ត និងលិខិតផ្តល់សិទ្ខិតំណាង ចែកចាយឆ្នោត KPW lotory”បានប្តឹងចូលទៅសម្តេចក្រឡាហោមស ខេងឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ បានចោទលោកអធិការរងស្រុកភ្នំស្រួច អ៊ឹង ឡាយឆាយ ពីបទលួចមានស្ថានទម្ងន់ ទោសរំលោភលំនៅឋានចាប់ឃុំឃាំងបង្ខាំងដោយខុសច្បាប់និងបទគំរាមកំហែង)។
ហើយការប្ដឹងរបស់ជនរងគ្រោះខាងលើ បានធ្វើឡើងបន្ទាប់ពីអធិការរងស្រុកភ្នំស្រួច អ៊ឹង ឡាយឆាយ បានចុះបង្ក្រាបគ្រឿងញៀននៅផ្ទះបុកប៊ីយ៉ាមួយកន្លែងតែរកមិនឃើញមានថ្នាំញៀននោះទេនៅរសៀលថ្ងៃទី២៨ និងថ្ងៃទី២៩ ខែតុលា ឆ្នាំ២០១៨កន្លងទៅ។
ប្រភពបានបង្ហើបថា ក្រោយម្ចាស់បានដាក់ពាក្យបណ្តឹងចូលទៅសម្តេចក្រឡាហោម ស ខេង រួចមកក្រុមការងារ អធិការកិច្ចក្រសួងមហាផ្ទៃ បានចុះមកបើកការស្រាវជ្រាវនិងអង្កេតហើយទទួលបានលទ្ធផល ដោយមិននឹកស្មានដល់ គឺអធិការរងស្រុកភ្នំស្រួច អ៊ឹង ឡាយឆាយ បានឆ្លើយសារភាពពីទង្វើរបស់ខ្កួននិងបក្ខពួកថាពិតជាបានយកលុយមកចែកគ្នាចាយនៅថ្នាក់ស្រុកអស់មួយចំនួននិងឲ្យទៅមេៗអស់ហើយ ។ ហើយលោកអធិការរង អ៊ឹង ឡាយឆាយ បានឆ្លើយសារភាព ទោសកំហុសរបស់ខ្លួនចំពោះ មុខក្រុមអធិការកិច្ច ព្រមទាំងសុខចិត្តប្រគល់លុយនិងមាសទៅឲ្យម្ចាស់បណ្តឹងវិញ។
នៅក្នុងលិខិតពាក្យបណ្ដឹងរបស់ជនរងគ្រោះឈ្មោះ ហេង ឈៀង រៀបរាប់ទៀតថា “កាលពីថ្ងៃអាទិត្យទី២៨តុលា២០១៨ ពេលខ្លួនកំពុងនៅយកលុយពីស្នូកឃ័រលោកស្រាប់តែនគរបាលឈ្មោះអ៊ឹង ឡាយឆាយ និងបក្ខពួកស្លៀកពាក់សុីវិលបានចុះមកលំនៅឋានកន្លែងប្រកបអាជីវកម្មខាងលើ ស្ថិតនៅភូមិទី៤ឃុំត្រែងត្រយឹង ដោយគ្មានដីកាឬលិខិតអនុញ្ញាតឲ្យចុះឆែកឆេរពីអាជ្ញាធរណាមួយឡើយ ហើយនៅពេលកំពុងឆែកឆេរនោះលោកអ៊ឹង ឡាយឆាយ បានចាប់យកទូរស័ព្ទដៃរបស់ខ្លួន(ម្ចាស់បណ្តឹង) ព្រោះខ្លាចគាត់ថតសកម្មភាពរបស់ពួកគេ ។ ហើយលោកអ៊ឹង ឡាយឆាយ និងបក្ខពួកបានរើកកាយនិងរឹបអូសយក ទ្រព្យសម្បត្តិរបស់ខ្លួនដូចជាលុយនៅក្នុងទូដែកនិងលុយនៅក្រៅទូដែកមានកុយ ក្នុងថង់ខ្មៅ២ថង់(លុយតុងទីន)សរុបស្មើនឹងទឹកប្រាក់២៩.៩៩២.៥០០រៀល និង ១០០ដុល្លារគ្រឿងអលង្ការក្នុងទូដែកមានខ្សែកមាស១ខ្សែខ្សែដៃមាស១ខ្សែ (សរុប ៤តម្លឹង)និងគ្រឿងប្លាទីនមានដូចជាខ្សែក ចំនួន៣ខ្សែ ចិញ្ចៀន៤វង់ ខ្សែដៃ១ខ្សែ បន្តោង១ ទូឆ្នោតស្មើនឹងទឹកប្រាក់១.០០០ដុល្លារ ទូរស័ព្ទសាំស៊ុង១ និងអាហ្វូន៦ ផ្លឹស១ ។
ក្រោយពីដកហូតជនរងគ្រោះ បានទាមទារថតកំណត់ហេតុនេះទុកដើម្បីចង់ដឹងពីកំណត់ហេតុនោះតែឈ្មោះ អ៊ឹង ឡាយឆាយ និង បក្ខពួកមានបំណងទុច្ចរិតមិនយល់ព្រមឲ្យថតនោះទេ ហើយពួកគេបានឃាត់ពួកខ្លួនជនរងគ្រោះទាំង២នាក់ ចោទប្រកាន់ដោយសំអាងថា គាត់បានផ្តល់ជម្រកឲ្យគេប្រើប្រាស់គ្រឿងញៀនស្របពេលដែល ពួកគេមិនបានរកឃើញភស្តុតាងណាមួយបញ្ជាក់អំពីការចោទប្រកាន់ខាងលើឡើយ។
នៅថ្ងៃ២៩ ខែតុលាដដែល ឈ្មោះអ៊ឹង ឡាយឆាយ និងបក្ខពួក៤នាក់បាននាំខ្លួនម្នាក់ចំណោម២នាក់(ហេង ឈៀង) ត្រឡប់ទៅលំនៅឋាននិងទីតាំងអាជីវកម្មរបស់ខ្លួនជាលើកទី២ ហើយបានដកហូតយកទ្រព្យសម្បត្តិរបស់ខ្លួនបន្ដថែមទៀតដូចជាលុយក្នុងកាបូប២លានរៀលនិង៦០០ដុល្លារ។ហើយក្រោយមកក៏នាំខ្លួន ត្រឡប់មកវិញ ហើយពួកគេនៅតែបន្ត ឃាត់ខ្លួនអស់រយៈពេលជិត៤០ម៉ោង គិតចាប់ពីរសៀលថ្ងៃទី២៨តុលាដល់យប់ថ្ងៃទី២៩ទើបដោះលែងឲ្យត្រឡប់ទៅផ្ទះវិញ ។
ហួសចិត្តនឹកស្មានមិន ដល់ក្នុងចំណោមគ្រឿងអលង្ការប្លាទីន ទូរស័ព្ទសាំស៊ុងបានត្រឡប់មកវិញចំណែកទូរស័ព្ទអាយហ្វូន៦ផ្លឹសបាត់ ចំណែកគ្រឿងមាសត្រូវបានពួកគេដូរមកជារបស់ក្លែងក្លាយសុទ្ធសាធ។ រីឯប្រាក់ដែលពួកគេដកហូតយកក៏មិនបានប្រគល់មកឲ្យវិញដែរ។ ស្របពេលនោះមានបក្ខពួករបស់ អ៊ឹង ឡាយឆាយ បានមកសម្លុតពួកខ្លួនថាបើសិនជាគាត់ហ៊ានប្តឹងទាមទារប្រាក់ពីពួកគេ ពួកគេនឹងបញ្ជូនរឿងទៅតុលាការភ្លាម ។
ចំណែកប្រាក់ដែលគេដកហូតយកពីការឆែកឆេរនោះបក្ខពួករបស់គេនឹងយកទៅចែកគ្នាដោយអះអាងថា ជាថ្នូរនឹងការដោះលែងឲ្យគាត់បានត្រឡប់ទៅផ្ទះវិញ។ អំពើចេតនាទុច្ចរិតរបស់លោក អ៊ឹង ឡាយឆាយ និងបក្ខពួកក្នុងការប្រើប្រាស់តួនាទីរបស់ខ្លួនប្រឌិតរឿងឡើងដើម្បីគំរាមកំហែងនិងលេបយកប្រាក់បែបនេះ ទើបគាត់បានប្តឹងទៅសម្តេចក្រឡាហោម ជួយរកយុត្តធ៌ម និងទាមទារយកប្រាក់និងទ្រព្យសម្បត្តិ ទាំងអស់ត្រឡប់មកវិញស្មើនឹងចំនួនទឹកប្រាក់៣១.៩២២.៥០០រៀលនិង៦០០ ដុល្លារព្រមទាំងទារសំណងគ្រឿងអលង្ការខ្សែកមាស១ខ្សែ ខ្សែដៃមាស១ខ្សែចំនួន ៤តម្លឹង ទូរស័ព្ទអាហ្វូន៦ផ្លឹសរួមទាំងសំណង ជំងឺចិត្តនិងសេវាមេធាវីថែមទៀត។
ជនរងគ្រោះឈ្មោះ ហេង ឈៀង ក៏បានសំណូមពរដល់សម្តេចក្រឡាហោម មេត្តាជួយចាត់វិធានការ ចាប់ជនល្មើសយកមកផ្តន្ទាទោសតាមផ្លូវច្បាប់ផងដែរ ។
លោក អ៊ឹង ឡាយឆាយ បានឆ្លើយសារភាពកំហុស នៅចំពោះមុខក្រុមអធិការកិច្ច ហើយសន្យាថានឹងប្រគល់លុយនិងមាសទៅឲ្យម្ចាស់បណ្តឹងវិញ នាពេលឆាប់ៗនេះ ប៉ុន្តែការសន្យានេះមិនដឹងថា លោក អ៊ឹង ឡាយឆាយ ឆ្លើយអោយរួចតែពីម៉ាត់នៅចំពោះមុខក្រុមអធិការកិច្ចក៏មិនដឹង?។
ទង្វើរបស់លោក អ៊ឹង ឡាយឆាយ និងបក្ខពួកនេះមិនគួរណាដាក់ត្រឹមវិន័យ រដ្ឋបាលនោះទេគួរតែលុបឈ្មោះចេញពី ក្របខ័ណ្ឌមន្ត្រីនគរបាលជាតិ។
ទាក់ទង់ព័ត៌មានខាងលើ គេហទំព័រ www.rskynews.com មិនអាចទំនាក់ទំនងសុំការបំភ្លឺពីលោក អ៊ឹង ឡាយឆាយ អធិការរងស្រុកភ្នំស្រួចដែលកំពុងរងការចោទប្រកាន់បាននោះទេដោយគ្មានលេខទូរស័ព្ទ។
ដោយ ៖ វិបុល
