ខេត្តបាត់ដំបង៖ ព្រឹកថ្ងៃសៅរ៍ ៣រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ២៣ ខែមីនា ឆ្នាំ២០១៩ គណៈកម្មាធិការគណបក្សប្រជាជនកម្ពុជាខេត្តបាត់ដំបង ដឹកនាំដោយ ឯកឧត្តម ច័ន្ទ សុផល សមាជិកគណៈកម្មាធិការកណ្តាលគណបក្ស និងជាប្រធានគណៈកម្មាធិការគណបក្សប្រជាជនកម្ពុជាខេត្តបាត់ដំបង បានអញ្ជើញទទួលស្វាគមន៍គណៈប្រតិភូបក្សកុម្មុយនីស្តវៀតណាម ចំនួន៨២រូប មកបំពេញទស្សនកិច្ចនៅខេត្តបាត់ដំបង ដឹកនាំដោយ លោកវរៈសេនីយ៍ឯក ទ្រិញ វិញផា អនុប្រធានអចិន្រ្តៃយ៍គណៈកម្មការទំនាក់ទំនង អតីតជំនាញការវៀតណាម និងជាអនុប្រធានសមាគមមិត្តភាពកម្ពុជា-វៀតណាម នៅទីស្នាក់ការគណបក្សប្រជាជនកម្ពុជាខេត្តបាត់ដំបង ។
ក្នុងពិធីទទួលស្វាគមន៍នេះ ក៏មានការអញ្ជើញចូលរួមពី ឯកឧត្តម អ៊ុយ រី សមាជិកគណៈកម្មាធិការកណ្តាលគណបក្ស និងជាអនុប្រធានប្រចាំគណៈកម្មាធិការគណបក្សប្រជាជនកម្ពុជាខេត្តបាត់ដំបង ឯកឧត្តម ងួន រតនៈ សមាជិកគណៈកម្មាធិការកណ្តាលគណបក្ស អនុប្រធានគណៈកម្មាធិការគណបក្សប្រជាជនកម្ពុជាខេត្ត និងជាអភិបាល នៃគណៈអភិបាលខេត្តបាត់ដំបង ព្រមទាំងឯកឧត្តម លោកជំទាវ ជាគណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជាខេត្តបាត់ដំបង ។
ឯកឧត្តម ច័ន្ទ សុផល សមាជិកគណៈកម្មាធិការកណ្តាលគណបក្ស និងជាប្រធានគណៈកម្មាធិការគណបក្សប្រជាជនកម្ពុជាខេត្តបាត់ដំបង បានមានប្រសាសន៍ស្វាគមន៍ក្នុងដំណើរទស្សនកិច្ចរបស់គណៈប្រតិភូបក្សកុម្មុយនីស្តវៀតណាម ចំនួន៨២រូប ដែលបានមកបំពេញទស្សនកិច្ចនៅក្នុងខេត្តបាត់ដំបង ព្រមទាំងបានជម្រាបជូនអំពីភូមិសាស្រ្តមួយចំនួន និងការអភិវឌ្ឍ រីកចម្រើន នៅក្នុងខេត្តបាត់ដំបង ជូនដល់គណៈប្រតិភូបានជ្រាប ។
ក្នុងនោះផងដែរ លោកវរៈសេនីយ៍ឯក ទ្រិញ វិញផា អនុប្រធានអចិន្រ្តៃយ៍គណៈកម្មការទំនាក់ទំនង អតីតជំនាញការវៀតណាម និងជាអនុប្រធានសមាគមមិត្តភាពកម្ពុជា-វៀតណាម ក៏បានថ្លែងអំណរគុណដល់ គណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជាខេត្តបាត់ដំបង ដែលបានទទួលស្វាគមន៍ យ៉ាងក់ក្តៅដល់គណៈប្រតិភូបក្សកុម្មុយនីស្តវៀតណាម ចំនួន៨២រូប មកបំពេញទស្សនកិច្ចនៅខេត្តបាត់ដំបង និងជូនដំណើរទស្សនកិច្ចនៅក្នុងក្រុងបាត់ដំបង ។
ប្រភព Face Book CPP បាត់ដំបង
