ខេត្តមណ្ឌលគិរី ៖ ប្រភពពីមន្ត្រីនគរបាលនៅក្នុងស្នងការដ្ឋាននគរបាលខេត្តមណ្ឌលគិរី បានឲ្យដឹងថាលោក កែវ ចិន្ដា ហៅធូ ស្នងការរងនគរបាលខេត្តមណ្ឌលគិរី ហ៊ានប្រើអំណាចនិងតួនាទីរបស់ខ្លួនដើម្បីប្រមូលទិញឈើនិងដឹកជញ្ជូនឈើចេញទៅស្រុកយួន គឺមានការឃុបឃិតបើកដៃពីសំណាក់លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ផងដែរទើបអ្វីៗអាចប្រព្រឹត្តទៅដោយរលូន។
សកម្មភាពដឹកជញ្ជូនឈើចេញទៅស្រុកយួនយ៉ាងរលូនតាមច្រកទ្វេភាគីនិងច្រករបៀងមួយចំនួនក្នុងខេត្តមណ្ឌលគិរី ដោយ មន្ត្រីជំនាញនិងសមត្ថកិច្ចពាក់ព័ន្ធមិនហ៊ានប៉ះពាល់ឈ្មួញឈើឈ្មោះ កែវ ចិន្ដា ដែលជាស្នងការរងនគរបាលខេត្តមណ្ឌលគិរី នោះទេព្រោះដឹងថា ឈ្មួញម្នាក់នេះមានខ្នងបង្អែករឹងមាំ។
ប្រភពដែលស្និទ្ធនឹងលោក កែវ ចិន្ដា ហៅធូ បានឲ្យដឹងថា កាលពីមុនលោក កែវ ចិន្ដា មានតួនាទីត្រឹមតែជានាយការិយាល័យអត្តសញ្ញាណប័ណ្ណនៃស្នងការដ្ឋាននគរបាលខេត្តមណ្ឌលគិរី ប៉ុណ្ណោះហើយក្រោយមកស្រាប់តែលោក កែវ ចិន្ដា ទទួលបានតំណែងជាស្នងការរងនគរបាលខេត្តមណ្ឌលគិរី យ៉ាងឆាប់រហ័ស។
ទន្ទឹមនឹងនេះគឺលោក កែវ ចិន្ដា ហៅធូ ក៏បានប្រើប្រាស់តួនាទីនិងអំណាចរបស់ខ្លួនដើម្បីធ្វើសកម្មភាពប្រមូលទិញឈើនិងដឹកជញ្ជូនឈើចេញទៅស្រុកយួនដោយគ្មានញញើតអ្វីទាំងអស់។ ប្រភពខ្លះបានឲ្យដឹងថា សព្វថ្ងៃលោក កែវ ចិន្ដា ហៅធូ គឺជាអ្នកប្រមូលប្រាក់ចំណូលពីបទល្មើសព្រៃឈើសម្រាប់ថ្វាុយជូនលោក ឡោ សុខា ផងដែរទើបលោក ឡោ សុខា បណ្ដោយឲ្យលោក កែវ ចិន្ដា ហៅធូ ធ្វើអ្វីៗតាមអំពើចិត្តរបស់ខ្លួនយ៉ាងគឃ្លើន។
មន្ត្រីនគរបាលនៅក្នុងស្នងការដ្ឋាននគរបាលខេត្តមណ្ឌលគិរី បានរំលឹកឡើងវិញថា កាលពីមុនលោក កែវ ចិន្ដា ហៅធូ ធ្លាប់ជាប់ពាក់ព័ន្ធក្នុងសំណុំរឿងឃុបឃិតឲ្យជនជាតិយួនយកត្រាក់ទ័រ៧៨គ្រឿងចូលមកកាប់ឈើតាមច្រកប៉ុស្ដិ៍៤និងប៉ុស្ដិ៍៥ ក្នុងស្រុកកោះញែក ខេត្តមណ្ឌលគិរី ផងដែរ។ ក៏ប៉ុន្តែបច្ចុប្បន្នសំណុំរឿងនោះត្រូវបានស្ងាត់ៗហើយលោក កែវ ចិន្ដា ហៅធូ ក៏ក្លាយទៅជាស្នងការរងនគរបាលខេត្តមណ្ឌលគិរី និងប្រើអំណាច តួនាទីរបស់ខ្លួនដើម្បីដឹកជញ្ជូនឈើចេញទៅស្រុកយួនយ៉ាងរលូនទៀតផង។
ដូច្នេះហើយទើបមានសេចក្ដីអំពាវនាវឲ្យថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការទប់ស្កាត់ទង្វើមិនប្រក្រតីរបស់លោក កែវ ចិន្ដា ហៅធូ ដែលកំពុងធ្វើសកម្មភាពដឹកជញ្ជូនឈើចេញទៅស្រុកយួនយ៉ាងរាលដាល។ ដោយហេតុថា សកម្មភាពរបស់លោក កែវ ចិន្ដា ហៅធូ ស្នងការរងនគរបាលខេត្តមណ្ឌលគិរី ក្នុងការដឹកជញ្ជូនឈើចេញទៅស្រុកយួនកំពុងធ្វើឲ្យប៉ះពាល់ដល់កេរ្តិ៍ឈ្មោះស្ថាប័ននគរបាលជាតិទាំងមូលផងដែរ៕
ដោយ ៖ សិរីបុត្រ
