ខេត្តសៀមរាប៖ នៅព្រឹកថ្ងៃទី១៦ ខែ ធ្នូ ឆ្នាំ២០២៥នេះ លោកជំទាវ អ៊ុច ស្រីស្រស់ ភរិយារបស់លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង ព្រមទាំងបុត្ររួមនិងសហការី បាននាំយកនូវគ្រឿងឧបភោគ បរិភោគអាហារក្រៀម សម្ភារៈប្រើប្រាស់ ជាច្រើនមុខ និងថវិកាមកប្រគេនព្រះគ្រូចៅអធិការវត្តប្រាសាទគោកចកដើម្បីចាត់ចែងចែកបន្តនិងបម្រុងទុកធ្វើម្ហូបអាហារចែកជូនដល់ជនភៀសសឹក ដោយក្នុងនោះដែរលោកជំទាវ អ៊ុច ស្រីស្រស់ ក៍បានធ្វើការចែកជូនកញ្ចប់ស្បៀងអាហារជូនដោយផ្ទាល់ដល់ជនភៀសសឹកដែលកំពុងស្នាក់នៅក្នុងវត្តចំនួនជាង២០០គ្រួសារផងដែរ ។
ក្នុងនាមសប្បុរសជន លោកជំទាវ អ៊ុច ស្រីស្រស់ បានមានប្រសាសន៍ថា ក្នុងស្មារតីខ្មែរតែមួយរួមគ្នា ខ្មែរស្រឡាញ់ខ្មែរជួយគ្នាទៅវិញទៅមកទាំងសម្ភារ និងស្មារតី និងក្នុង កាលៈទេសៈដែលប្រទេសជាតិកំពុងទទួលរងនូវការរំលោភបំពាន និងការគំរាមកំហែងយ៉ាងធ្ងន់ធ្ងរ លើបូរណភាពទឹកដីពីសំណាក់យោធាថៃ សូមឱ្យបងប្អូនប្រជាពលរដ្ឋខ្មែរទាំងអស់ ត្រូវរួបរួមសាមគ្គីជួយគ្នាក្នុងគ្រាលំបាក មានទុក្ខរួមទុក្ខ មានសុខរួមសុខ គ្មានអ្វីដែលល្អប្រសើរជាងពេលបានឃើញប្រទេសជាតិមានសន្តិភាពនោះទេ។
ក្នុងនាមជនភៀសសឹកដែលបានស្នាក់នៅក្នុងវត្ត ព្រះវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចកក៍បានមានថេរដីកាថ្លែងអំណរគុណយ៉ាងជ្រាលជ្រៅចំពោះលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀងនិងលោកជំទាវ ព្រមទាំងបងប្អូនសប្បុរសជន ដែលមានចិត្តសប្បុរសក្នុងស្មារតីខ្មែរជួយខ្មែរដោយចូលរួមឧបត្ថម្ភគាំទ្រនូវធនធានផ្ទាល់ខ្លួន ដល់បងប្អូនប្រជាពលរដ្ឋយើងដែលបានជម្លៀសខ្លួនមកកាន់ខេត្តសៀមរាបរកទីតាំងសុវត្ថិភា។
ព្រះវិចិត្រវង្សា ហែម គឹមសានបានមានថេរដីកាបញ្ជាក់បន្ថែមឲ្យដឹងថា គិតត្រឹមព្រឹកថ្ងៃទី១៦ ខែ ធ្នូ នេះជនភៀសសឹកដែលបានមកស្នាក់នៅក្នុងវត្តប្រាសាទគោកចកគឺមានចំនួន២១១គ្រួសារ ស្មើនឹង៦៧០នាក់ មានស្រីចំនួន៤១០នាក់ ចាស់ជរា២៩នាក់ ស្រ្តីមានផ្ទៃពោះមាន១១នាក់ ក្មេងមាន១៨៥នាក់ និងជនពិការមាន៥នាក់ ក្រោមការទំនុកបម្រុងពីព្រះសង្ឃ គណៈកម្មការ និងអាជ្ញាធរមូលដ្ឋាដោយក្នុងនោះដែរទទួលទានអាហារ៣ពេលក្នុងមួយថ្ងៃហើយក្នុងនោះដែរប្អូនៗកុមារដែលជាសិស្សានុសិស្សចាប់ពីថ្នាក់ទី១ដល់ទី៦ក៍មានលោកគ្រូអ្នកមកជួយបង្រៀនដោយផ្ទាល់នៅក្នុងវត្តតាមមេរៀនបន្តដែលប្អូនមិនបានរៀនហើយត្រូវបានភៀសសឹកឆ្ងាយពីសាលាហើយចំណែកប្អូនៗសិស្សានុសិស្សពីថ្នាក់ទី៧ដល់ថ្នាក់ទី១២គឺឲ្យទៅសិក្សាវិទ្យាល័យហ៊ុនសែនសៀមរាបផងដែរ ។
ព្រះគ្រូចៅអធិការ ក៏សូមអំពាវនាវដល់សប្បុរសជន បន្តជួយឧបត្ថម្ភគាំទ្របន្ថែមទៀត ទាំងស្បៀងអាហារ សម្ភារប្រើប្រាស់ និងថវិកា ដើម្បីជួយផ្គត់ផ្គង់បន្តដល់បងប្អូនជនភៀសសឹកយើង ដែលកំពុងស្នាក់នៅក្នុងវត្ត រួមនឹងទីតាំងផ្សេងៗទៀត ក្នុងភូមិសាស្ត្រខេត្តសៀមរាបផងដែរ ៕
ដោយ ៖ ពន្លឺ
