ខេត្តកំពត៖ នៅថ្ងៃអាទិត្យ៥កើត ខែមាឃ ឆ្នាំរកា ព.ស២៥៦១ ត្រូវនិងថ្ងៃទី២១ ខែមករា ឆ្នាំ ២០១៨ នាវេលាម៉ោង១១.២០នាទី កំលាំងព្រហ្មទណ្ឌកម្រិតស្រាលស្នងការខេត្ត បានសហការជាមួយកំលាំងអធិការនគរបាលក្រុងកំពត បានចុះបង្រ្កាបមុខសញ្ញាចែកចាយ និងប្រើប្រាស់ជួញដូរគ្រឿងញៀនមួយករណីមានទីតាំងស្ថិតនៅភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត។
ប្រតិបត្តការបង្រ្កាបនេះសមត្ថកិច្ចបានធ្វើការឃាត់ខ្លួនជនសង្ស័យ២នាក់រួមមានទី១.ឈ្មោះ KELLY JAMES SIMON ភេទប្រុស អាយុ៧១ឆ្នាំ ជនជាតិអៀរឡង់ (IRISH) កាន់លិខិតឆ្លងដែនលេខ PU23773524 និងទី២.ឈ្មោះ លុយ អៀន ភេទស្រី អាយុ៣២ឆ្នាំ ទីលំនៅបច្ចុប្បន្នភូមិដំណាក់ចំបក់ សង្កាត់អូរក្រសារ ក្រុងកែប ខេត្តកែប។ ព្រមទាំងដកហូតវត្ថុតាងថ្នាំញៀន១កញ្ចប់តូច កញ្ឆាក្រៀម ២កញ្ចប់ និងជញ្ចីងសំរាប់ថ្លឹងថ្នាំចំនួន១គ្រឿងផងដែរ។
ជនសង្ស័យទាំង២នាក់រួមទាំងវត្ថុតាងត្រូវបានសមត្ថកិច្ចជំនាញនៃស្នងការនគរបាលខេត្តកំពតរៀបចំកសាងសំណុំរឿងដើម្បីអនុវត្តទៅតាមនិតិវិធីច្បាប់៕
ដោយ ៖ វិចិត្រ
