ខេត្តក្រចេះ៖ យោងតាមច្បាប់ស្ដីពីព្រៃឈើដែលត្រួវបានដាក់ឲ្យប្រើប្រាស់នៅឆ្នាំ២០០២ បានចែងថាបទល្មើសព្រៃឈើជាបទឧក្រិដ្ឋ។ឈ្មួញនៅតែបន្តសកម្មភាពដឹកជញ្ជូនឈើពីខេត្តស្ទឹងត្រែង ឆ្លងកាត់ខេត្តក្រចេះ ចេញទៅស្រុកយួនតាមច្រកព្រំដែនក្នុងស្រុកស្នួល ខេត្តក្រចេះ និងច្រកព្រំដែនក្នុងស្រុកមេមត់ ខេត្តត្បូងឃ្មុំ យ៉ាងរលូនដោយគ្មានការបង្ក្រាបពីសំណាក់មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធឡើយ។
ចំណែកលោក វ៉ា ថន អភិបាលខេត្តក្រចេះ និងលោក ទ្រី សុភ័ក្ត្រ នាយខណ្ឌរដ្ឋបាលព្រៃឈើខេត្តក្រចេះ(បច្ចុប្បន្នទើបឡើងកាន់ដំណែងជាប្រធានមន្ទីរខេត្តក្រចេះ) បានរក្សាភាពស្ងប់ស្ងាត់ទុកឲ្យក្រុមឈ្មួញដឹកជញ្ជូនឈើឆ្លងកាត់ខេត្តក្រចេះ ចេញទៅស្រុកយួនយ៉ាងពេញបន្ទុក ដោយមិនយកចិត្តទុកដាក់អនុវត្តន៍តាមបទបញ្ជាលេខ០០២ របស់រាជរដ្ឋាភិបាលនោះទេ។
ប្រភពពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងឃុំ២ធ្នូ ស្រុកស្នួល ខេត្តក្រចេះ បានឲ្យដឹងថា នៅក្នុងខែមករា ឆ្នាំ២០១៩នេះ មេឈ្មួញ គង់ ក្រឹង ដែលជាមន្រ្តីយោធា និងទទួលងារជាឧកញ៉ាផងនោះពីចំណូលបទល្មើសព្រៃឈើ បានសម្រុកដឹកជញ្ជូនឈើចេញទៅស្រុកយួនតាមច្រករបៀងដេ២ ដេ៣ និងដេ៤ ក្នុងភូមិត្រពាំងស្រែ ឃុំ២ធ្នូ យ៉ាងអនាធិបតេយ្យ។
ប្រភពពីមន្ត្រីយោធាក្នុងអង្គភាពវរការពារព្រំដែនលេខ២០៤ បានបង្ហើបឲ្យដឹងថា ការដែលមេឈ្មួញ គង់ ក្រឹង ក្លាយជាឧក្រិដ្ឋជនបំផ្លាញព្រៃឈើក្នុងភូមិភាគឦសាន យ៉ាងមហន្តរាយគឺមានការឃុបឃិតជាលក្ខណៈប្រព័ន្ធ។ ដោយក្នុងនោះមានមន្ត្រីសំខាន់ៗក្នុងខេត្តដូចជា ៖ លោកឧត្តមសេនីយ៍ទោ លន់ សុផាត ស្នងការនគរបាលខេត្តក្រចេះ និងលោកឧត្តមសេនីយ៍ត្រី សាន្ត ប៊ុនថាន មេបញ្ជាការអាវុធហត្ថខេត្តក្រចេះ ក៏ជាខ្នងបង្អែកដ៏រឹងមាំរបស់មេឈ្មួញ គង់ ក្រឹង ដែលល្បីល្បាញខាងដឹកជញ្ជូនឈើចេញទៅស្រុកយួនផងដែរ។
ប្រភពដែលស្និទ្ធនឹងមេឈ្មួញ គង់ ក្រឹង បានបង្ហាញឈ្មោះក្រុមមន្ត្រីធំៗដែលទទួលលុយប្រចាំខែពីមេឈ្មួញម្នាក់នេះ ហើយក្នុងចំណោមមន្ត្រីទាំងនោះគឺមានមន្ត្រីអាវុធហត្ថពាក់ផ្កាយ៣ នៅក្នុងស្ថាប័នកងរាជអាវុធហត្ថលើផ្ទៃប្រទេសទៀតផងដែរ។ ដោយសារអាងមានខ្នងបង្អែករឹងមាំបែបនេះហើយទើបមេឈ្មួញ គង់ ក្រឹង ហ៊ានបង្កើនសកម្មភាពប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងរលូន ព្រោះមានមន្ត្រីពុករលួយជាច្រើននាក់ចាំទទួលផលប្រយោជន៍ជាប្រចាំ។
លើសនេះទៅទៀតថ្នាក់ដឹកនាំក្រសួងមហាផ្ទៃ បានរក្សាភាពស្ងៀមស្ងាត់ក្នុងខណៈដែលមន្ត្រីធំៗនៅខេត្តក្រចេះ ឃុបឃិតឲ្យមេឈ្មួញ គង់ ក្រឹង និងឈ្មួញច្រើននាក់ទៀតដឹកជញ្ជូនឈើចេញទៅស្រុកយួនយ៉ាងគគ្រឹកគគ្រេង។
ពាក់ព័ន្ធព័ត៌មានខាងលើនេះគេហទំព័រ រស្មីក្រុងយើង បានទំនាក់ទំនងតាមទូរស័ព្ទដែរតែមិនមានអ្នកទទួល។ ពលរដ្ឋកត់សម្គាល់ថាចាប់តាំងពីលោក វ៉ា ថន ឡើងកាន់តំណែងជាអភិបាលខេត្តក្រចេះ ជំនួសលោក សរ ចំរ៉ុង រួចមកគឺបទល្មើសព្រៃឈើក្នុងខេត្តក្រចេះ នៅតែកើតឡើងយ៉ាងរាលដាលពុំមានការថយចុះនោះឡើយថែមកក្រើកលើសដើមទៀតផង។
ដោយ ៖ សិរីបុត្រ
