ខេត្តសៀមរាប៖ នៅព្រឹកថ្ងៃទី២៥ ខែតុលា ឆ្នាំ ២០២៥នេះសាលាវេសហ្គេតអន្តរជាតិនៅខេត្តសៀមរាបបានប្រារព្ធពិធីចែកប័ណ្ណសរសើរដល់សិស្សជ័យលាភីនិទ្ទេសA និងBព្រមទាំងវិញ្ញាបនបត្របញ្ចប់ថ្នាក់ទី៦ ទី៩ ទី១២ និងចំណាត់ថ្នាក់ល្អប្រចាំឆ្នាំសិក្សា២០២៤.២០២៥ក្រោមវត្តមានអញ្ជើញជាអធិបតីពីសំណាក់ លោកស្រី ម៉ននី រង្សី អភិបាលរងខេត្តសៀមរាប ។
លោក រ័ត្ន រស្មី នាយកសាលាវេសហ្គេតអន្តរជាតិបានមានប្រសាសន៍ថា៖ ចាប់ពីឆ្នាំ សិក្សា ២០២៥-២០២៦ នេះតទៅ សម្រាប់សាខាទី 2 ផ្សារដើមក្រឡាញ់ទទួលបានអាជ្ញាប័នពីក្រសួងអប់រំនៃរដ្ឋាភិបាលអូស្ត្រាលីដែលអនុញ្ញាតដាក់ឱ្យដំណើរការកម្មវិធីសិក្សាចំណេះទូទៅអង់គ្លេសពីកម្រិតមត្តេយ្យសិក្សាដល់មធ្យមសិក្សាស្របតាមកម្មវិធីសិក្សារដ្ឋប្រទេស អូស្ត្រាលីខាងលិច។ កម្មវិធីសិក្សានេះនឹងសម្រួលអោយសិស្សទាំងអស់អាចធ្វើ ការផ្លាស់ប្តូរការសិក្សាទៅក្រៅប្រទេសបានយ៉ាងងាយ ជាពិសេសកូនៗនឹងទទួលបានការអប់រំជាសកលមួយពីប្រទេស ជឿនលឿន ដូចនឹងការសិក្សានៅប្រទេសអូ ស្ត្រាលីដែរ។ក្នុងរបាយការណ៍សាលាបង្ហាញថា៖ឆ្នាំនេះលទ្ធផល ការប្រឡងសញ្ញាបត្រមធ្យមសិក្សាទុតិយភូមិ (ថ្នាក់ទី១២) ទទួលបានជោគជ័យ៩៦% ក្នុងនោះទទួលបានសិស្សជ័យ លាភីនិទ្ទេស A ចំនួន ៦នាក់ ស្រី ៤នាក់ និងនិទ្ទេស B ចំនួន ១៣ នាក់ ស្រីមានចំនួន៧នា ក់។ ការសិក្សារបស់ សិស្សានុសិស្សនាឆ្នាំកន្លងមក ទទួលបានជោគជ័យប្រមាណ ៩៨% និយាយជារួម និយាយដោយឡែក សម្រាប់សិស្សានុសិស្ស ចូលរួមប្រឡងសញ្ញាបត្រមធ្យមសិក្សាបឋមភូមិ (ថ្នាក់ទី៩) ទទួលជោគជ័យ ៩៨% ក្នុងនោះ សិស្សនិទ្ទេសល្អ ចំនួន ១១នាក់ សិស្សស្រី៤នាក់ សិស្សនិទ្ទេសល្អបង្គួរ ចំនួន ១២នាក់ សិស្សស្រី៥នាក់។
លោក រ័ត្ន រស្មី បានមានប្រសាសន៍បញ្ជាក់បន្ថែមថា ក្រៅពី ផ្តោតលើការបណ្តុះ បណ្តាលចំណេះដឹង និងការអប់រំ សាលា វេសហ្គេតអន្តរជាតិក៏បានបញ្ចូលនូវមេរៀនបំនិនជីវិត (STEAM) ជាប្រចាំថ្ងៃដល់សិស្សគ្រប់ កម្រិតផងដែរ ដើម្បីទទួលបាននូវគុណភាពបែបនេះ គណៈគ្រប់គ្រងសាលាបានយកចិត្តទុកដាក់បំផុតក្នុងការវាយ តម្លៃជ្រើសរើសគ្រូបង្រៀន ទាំងខ្មែរ និងបរទេស ដែលស្របតាមគោលការណ៍ និងគរុកោសល្យអប់រំ មានវិជ្ជាជីវបង្រៀន ច្បាស់លាស់ ប្រកបដោយចិត្តគំនិតមោះមុត និងសមត្ថភាពពេញលេញ។
លោកស្រី ម៉ននី រង្សី អភិបាលរងខេត្តលើកឡើងថា៖ការចូលរួមចំណែកពីវិស័យឯកជនក៏មានសារៈសំខាន់ផងដែរ ក្នុងការជួយផ្តល់សេវាអប់រំដល់សិស្ស និស្សិតស្របតាមចក្ខុវិស័យរបស់សាលារៀន និងមានបេសកកម្មក្នុងការកសាងធនធានមនុស្សប្រកបដោយស្មារតី ទទួលខុសត្រូវខ្ពស់ ព្រមទាំងចូលរួមចំណែកក្នុងការធ្វើឲ្យសម្រេចនូវគោលដៅអប់រំជាតិ ដែលត្រូវធានាការ បណ្តុះបណ្តាលមូលធនមនុស្ស ពេញលេញប្រកបដោយវិជ្ជាសម្បទា បំណិតសម្បទា និងចរិយាសម្បទា។
លោកស្រីមានប្រសាសន៍ថា៖ជាពិតណាស់វិស័យអប់រំ មានតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍជាតិ ដោយកុមារ យុវជន និងមនុស្សពេញវ័យ ត្រូវទទួលបានការសិក្សា និងការអប់រំពេញមួយជីវិត ហើយការអប់រំ ត្រូវផ្តោតលើការ កសាងជំនាញ និងការផ្តល់ឱកាសដល់សិស្សគ្រប់រូប ក្នុងការទទួលបាននូវចំណេះដឹងមូលដ្ឋាន សម្រាប់ ឈានទៅសិក្សាលើចំណេះជំនាញបច្ចេកទេស និង ឯកទេសផ្សេងៗ ដើម្បីសម្រេចបានការអភិវឌ្ឍដែលផ្តល់អត្ថប្រយោជន៍ពេញលេញដល់គ្រប់ស្រទាប់យុវជន ក្នុងការកសាងអនាគតរបស់ខ្លួនប្រកប ដោយគុណភាព។លោកស្រីអភិបាលរងខេត្តបញ្ជាក់ថា៖ការរីកចម្រើនលើវិស័យអប់រំ និងវិស័យផ្សេងៗទៀត នៅទូទាំងព្រះរាជាណាចក្រកម្ពុជា ក៏ដូចជាក្នុងខេត្តសៀមរាបផ្ទាល់ គឺផ្តើមចេញពីឆន្ទៈដ៏មោះមុតរបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយចក្ខុវិស័យវែងឆ្ងាយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលបានដាក់ចេញយ៉ាងត្រឹមត្រូវ នូវគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ នីតិកាលទី៧ នៃរដ្ឋសភា ក្នុងការអភិវឌ្ឍប្រកបដោយភាពរីកចម្រើនថ្កុំថ្កើងរុងរឿងនាពេលនេះ។លោកស្រី បានចាត់ទុកលទ្ធផលដែលប្អូនៗនិងក្មួយៗ ទទួលបាននាពេលនេះ គឺភាពជោគជ័យពិតប្រាកដរបស់ប្អូនៗ ហើយមិនមែនត្រឹមតែមានចំណេះដឹងសម្រាប់ខ្លួនម្នាក់ៗប៉ុណ្ណោះទេ តែលទ្ធផលការងារសីលធមម៌ សុជីវធម៌ គុណធម៌ ជាលក្ខណៈសម្បត្តិ និងចាំបាច់មិនអាចខ្វះបាន ដែលជាពិន្ទុសម្រាប់វាស់ស្ទង់ នូវភាពជោគជ័យពិតប្រាកដ។ ក្នុងន័យនេះ សូមប្អូនៗខិតខំហ្វឹកហ្វឺនរៀនសូត្របន្ត លើមុខវិជ្ជាផ្សេងៗ និងភាសាបរទេសបន្ថែមទៀត ដើម្បីបង្កើន សមត្ថភាព ចំណេះដឹង ចំណេះធ្វើ ឈានឱ្យទាន់សភាពការណ៍វិវត្តន៍រីកចម្រើនរបស់សង្គមជាតិ ហើយ ក៏ត្រូវប្រកាន់ខ្ជាប់នូវវិន័យ សេចក្តីថ្លៃថ្នូរ និងរក្សាសាមគ្គីភាពនៅក្នុងគ្រប់ មជ្ឈដ្ឋានជីវភាពរស់នៅ ដើម្បីក្លាយខ្លួនជាកូនល្អ សិស្សល្អ មិត្តល្អនិងជាពលរដ្ឋល្អមានប្រយោជន៍សម្រាប់សង្គជាតិយើង៕
ដោយ៖ ពន្លឺ
