ខេត្តបន្ទាយមានជ័យ៖ ទំនាស់សុំបើកផ្លូវបុរាណសម្រាប់ប្រើប្រាស់ជាប្រយោជន៏រួមរបស់ប្រជាពលរដ្ឋរស់នៅភូមិអូរអំបិល សង្កាត់អូរអំបិល ក្រុងសិរីសោភ័ណ្ឌ ខេត្តបន្ទាយមានជ័យ ដែលមានរយៈពេលយ៉ាងយូរកន្លងមកត្រូវបានចុះវាយកំទេចចោលនាល្ងាចថ្ងៃទី២០ ខែតុលា ឆ្នាំ២០២៥ ត្រូវចំថ្ងៃខួបកំណើតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
តាមប្រភពដែលបានបញ្ជាក់ប្រាប់ថា៖ ទំនាស់សុំបើកផ្លូវបុរាណសាធារណៈដែលមានទទឹងប្រវែង៨ម៉ែត្រ និងបណ្តោយប្រវែងប្រហែលជាង៨០ម៉ែត្រ នោះបានកើតមានជាយូរមកហើយពោលគឺតាំងពីចុងខែធ្នូ ឆ្នាំ២០២២ ដែលម្ចាស់ដីបានប្រើអំណាចសង់ជារបងរឹងមាំរំលោភយកដីជាកម្មសិទ្ធិសាធារណៈរបស់រដ្ឋដែលទុកជាប្រយោជន៏សម្រាប់ប្រជាពលរដ្ឋតជំនាន់ទៅខាងមុខ ។
បើយោងតាមលិខិតលេខ៦១៦/២៥ សជណ របស់រដ្ឋបាលខេត្តបន្ទាយមានជ័យ ចុះថ្ងៃទី០១ ខែតុលា ឆ្នាំ២០២៥ ជម្រាបជូនលោកអភិបាល នៃគណៈអភិបាលខេត្តបន្ទាយមានជ័យ ស្តីពីករណីប្រជាពលរដ្ឋ២០គ្រួសារ ស្នើសុំអន្តរាគមន៍បើកផ្លូវសាធារណៈទំហំ៨ម៉ែត្រ ដែលម្ចាស់ក្បាលដីក្បែរនោះរំលោភបំពានយកដីសាធារណៈរបស់រដ្ឋមកធ្វើជាកម្មសិទ្ធិឯកជន និងបានធ្វើរបងថ្មរឹងមាំ បិទជិតមិនឱ្យប្រជាពលរដ្ឋឆ្លងកាត់បាន មានទីតាំងដីស្ថិតនៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
បើតាមការបញ្ចាក់ពីលោកស្រី ធូ ណាគ្រី ចៅសង្កាត់អូរអំបិល ក្រុងសិរីសោភ័ណ្ឌ ខេត្តបន្ទាយមានជ័យ បានប្រាប់អ្នកសារព័ត៌យើងខ្ញុំថា ម្ចាស់សំណង់របងរឹងមាំនោះមានម្ចាស់គឺ លោកឧត្តមសេនីយន៏ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ។
ដោយឡែកលោក ស្រេង សុផល អភិបាលក្រុងសិរីសោភ័ណ្ឌ បានប្រាប់មកក្រុមអ្នកសារព័ត៌មានយើងតាមទូរស័ព្ទនាល្ងាចថ្ងៃទី២០ ខែតុលា ឆ្នាំ២០២៥ នោះថា៖ ទំនាស់លើផ្លូវនេះគឺដោយការមិនទាន់យល់គ្នានោះឡើយ តែនៅល្ងាចនេះគឺមានការសុះស្រួលគ្នាហើយ ដោយគាត់(លោកអភិបាល) កំពុងនៅកន្លែងទំនាស់រឿងរបងនឹងកំពុងបញ្ជាកម្លាំងវាយកំទេចរបងនោះចោល ប៉ុន្តែដោយមេឃភ្លៀងក៏ដកកម្លាំងសិននិងបន្តវាយកំទេចនិងធ្វើជូនប្រជាពលរដ្ឋនៅថ្ងៃស្អែកបន្ត ។
ប្រជាពលរដ្ឋសប្បាយរីករាយត្រេកអរដោយមានការខិតខំប្រឹងប្រែងចូលរួមដោះស្រាយទំនាស់ទាមទារបើកផ្លូវសម្រាប់ប្រើជាសាធារណៈពីសំណាក់លោកស្រី ធូ ណាគ្រី ចៅសង្កាត់អូរអំបិល ជាពិសេសលោក ស្រេង សុផល អភិបាលក្រុងសិរីសោភ័ណ្ឌ ផងដែរ ។
ទោះយ៉ាងណាអង្គភាពយើងខ្ញុំមិនអាចសុំការបំភ្លឺពីលោកឧត្តមសេនីយទោ សិទ្ធិ ឡោះ នាព្រលប់ថ្ងៃទី២០ ខែតុលា ឆ្នាំ២០២៥ បាននៅឡើយទេ ទោះយ៉ាងណាអង្គភាពយើងនិងរងចាំការបភ្លឺរាងរាល់ម៉ោងធ្វើការ ៕
ដោយ៖ សត្យា
